ഹൃദ്രോഹം കണ്ടുപിടിക്കാൻ A. I ആപ്പ് 14 വയസ്സുള്ള സിദ്ധാർത്ഥ് നന്ദ്യാല വികസിപ്പിച്ചു.

 

ഹൃദ്രോഹം കണ്ടുപിടിക്കാൻ A. I ആപ്പ് 14 വയസ്സുള്ള സിദ്ധാർത്ഥ് നന്ദ്യാല വികസിപ്പിച്ചു.

“Circadian AI” ആപ്പ് ലോകമെമ്പാടും ശ്രദ്ധ നേടുകയാണ്. വെറും ഏഴ് സെക്കൻഡിനുള്ളിൽ ഹൃദയസംബന്ധമായ അസാധാരണതകൾ കണ്ടെത്താൻ കഴിയുന്ന ഈ ആപ്പിന് 96 ശതമാനത്തിലധികം കൃത്യതയുണ്ടെന്ന് പരീക്ഷണങ്ങളിൽ തെളിഞ്ഞിട്ടുണ്ട്. അമേരിക്കയിലും ഇന്ത്യയിലുമായി ഏകദേശം പതിനെട്ട് ആയിരത്തിയഞ്ചു നൂറോളം രോഗികളിൽ ഇത് പരീക്ഷിച്ചു. അമേരിക്കയിൽ പതിനയ്യായിരത്തോളം പേരും, ഇന്ത്യയിൽ മൂന്നായിരത്തിയഞ്ചു നൂറോളം പേരും പങ്കെടുത്ത പരിശോധനകൾ ഫലപ്രദമായിരുന്നു. 

ആപ്പ് പ്രവർത്തിക്കുന്ന രീതി വളരെ ലളിതമാണ്. ഹൃദയത്തിന്റെ സമീപത്ത് സ്മാർട്ട്ഫോൺ പിടിച്ചു ഹൃദയധ്വനി റെക്കോർഡ് ചെയ്യുമ്പോൾ, അതിലെ ശബ്ദത്തെ noise cancellation സാങ്കേതിക വിദ്യ ഉപയോഗിച്ച് ശുദ്ധീകരിക്കുകയും, തുടർന്ന് AI മാതൃകകൾ വഴി ഹൃദയത്തിലെ രോഗലക്ഷണങ്ങൾ വിലയിരുത്തുകയും ചെയ്യുന്നു. ഇത് ഡോക്ടർമാർക്കായി പ്രാഥമിക പരിശോധനാ ഉപകരണമായി മാറുന്നു. ഇലക്ട്രോകാർഡിയോഗ്രാം (EKG), ഇക്കോ കാർഡിയോഗ്രാം പോലുള്ള പരമ്പരാഗത പരിശോധനകളെ മാറ്റിനിര്‍ത്തുന്നതല്ലെങ്കിലും, രോഗലക്ഷണങ്ങൾ നേരത്തേ കണ്ടെത്തി വൈദ്യ സഹായം തേടാൻ പ്രേരിപ്പിക്കുന്നതിനാണ് ഇത് ഏറെ സഹായകരം. 

ഈ ആപ്പ് ഇപ്പോൾ ക്ലിനിക്കൽ പ്രൊഫഷണലുകൾ മാത്രമേ ഉപയോഗിക്കുന്നുള്ളൂ. പൊതുജനങ്ങൾക്ക് നേരിട്ട് ഉപയോഗിക്കാൻ ഇതുവരെ ലഭ്യമാക്കിയിട്ടില്ല. എന്നാൽ ആരോഗ്യ രംഗത്തെ ഭാവിയിൽ വലിയ മാറ്റം കൊണ്ടുവരാൻ കഴിയുന്ന ഒരു സാധ്യതയായാണ് വിദഗ്ധർ ഇതിനെ കാണുന്നത്. 

സിദ്ധാർത്ഥ് ഇതിനോടകം തന്നെ STEM-IT എന്ന പേരിൽ ഒരു സ്റ്റാർട്ടപ്പ് ആരംഭിച്ചിട്ടുണ്ട്. വിദ്യാർത്ഥികൾക്ക് ശാസ്ത്രം, സാങ്കേതികവിദ്യ, എഞ്ചിനീയറിംഗ്, ഗണിതശാസ്ത്രം എന്നീ വിഷയങ്ങളിലേക്കുള്ള പ്രവേശനം കൂടുതൽ എളുപ്പവും കുറഞ്ഞ ചിലവിലും ഒരുക്കുന്നതിനാണ് ഇതിന്റെ ലക്ഷ്യം. കൂടാതെ, യു.ടി. ഓസ്റ്റിനിൽ കമ്പ്യൂട്ടർ സയൻസ് പഠനം തുടരുന്നതിനിടെ, ശ്വാസകോശ രോഗങ്ങൾ നേരത്തെ കണ്ടെത്താനുള്ള ഗവേഷണങ്ങളിലും അദ്ദേഹം പ്രവർത്തിച്ചുകൊണ്ടിരിക്കുന്നു.

അത്രയും ചെറുപ്പത്തിൽ തന്നെ ആരോഗ്യ സംരക്ഷണ രംഗത്ത് നവീകരണത്തിന് വഴി തെളിക്കുന്ന സിദ്ധാർത്ഥിന്റെ ശ്രമം കൗമാരക്കാരുടെ കരുത്തും സാധ്യതകളും തെളിയിക്കുന്നതാണ്.

പ്രൊഫ്. ജോൺ കുരാക്കാർ