കോളേജുകളിൽ പഠിക്കാൻ കുട്ടികളില്ല! ഉന്നതവിദ്യാഭ്യാസത്തിലെ രാഷ്ട്രീയാഭാസങ്ങൾ ഇനി വേണ്ടാ .
കേരളത്തിലെ ഉന്നതവിദ്യാഭ്യാസരംഗം ഇന്ന് ഗുരുതരമായ പ്രതിസന്ധിയിലൂടെയാണ് കടന്നുപോകുന്നത്. ഒരുകാലത്ത് വിദ്യാർത്ഥികളുടെ തിരക്കുകൊണ്ട് സജീവമായിരുന്ന നമ്മുടെ കോളേജ് ക്യാമ്പസുകൾ ഇന്ന് പലതും വിദ്യാർത്ഥികളില്ലാതെ നിശ്ശബ്ദമാകുകയാണ്. പ്രവേശനത്തിന് ആവശ്യമായ വിദ്യാർത്ഥികളെ ലഭിക്കാതെ കോഴ്സുകൾ അടച്ചുപൂട്ടേണ്ടിവരുന്നു. ചില കോളേജുകൾ നിലനിൽപ്പിനുവേണ്ടി പോരാടുന്നു. ഈ സാഹചര്യം കേരളത്തിന്റെ വിദ്യാഭ്യാസമേഖലയ്ക്ക് നൽകുന്ന മുന്നറിയിപ്പ് ചെറുതല്ല.എന്തുകൊണ്ടാണ് നമ്മുടെ കുട്ടികൾ കോളേജുകളിലേക്ക് വരാൻ മടിക്കുന്നത്? എന്തുകൊണ്ടാണ് കേരളത്തിലെ വിദ്യാർത്ഥികൾ ഉപരിപഠനത്തിനായി അന്യസംസ്ഥാനങ്ങളിലേക്കും വിദേശരാജ്യങ്ങളിലേക്കും പോകുന്നത്? നമ്മുടെ വിദ്യാഭ്യാസരംഗത്ത് എന്തോ തകരാറുണ്ടെന്നതിന്റെ സൂചനയല്ലേ ഇത്?
ഉന്നതവിദ്യാഭ്യാസ സ്ഥാപനങ്ങൾ അറിവിന്റെ കേന്ദ്രങ്ങളാകണം. അവിടെ പഠനത്തിനും ഗവേഷണത്തിനും നൂതന ആശയങ്ങൾക്കും പ്രാധാന്യം ലഭിക്കണം. എന്നാൽ പലപ്പോഴും രാഷ്ട്രീയ സംഘടനകളുടെ പ്രവർത്തനങ്ങളും വിദ്യാർത്ഥി രാഷ്ട്രീയത്തിലെ അനാവശ്യ സംഘർഷങ്ങളും ക്യാമ്പസുകളുടെ അന്തരീക്ഷത്തെ പ്രതികൂലമായി ബാധിക്കുന്നു. വിദ്യാർത്ഥികളുടെ അക്കാദമിക താൽപര്യങ്ങളെക്കാൾ രാഷ്ട്രീയ താൽപര്യങ്ങൾക്ക് മുൻഗണന ലഭിക്കുന്ന സാഹചര്യം ആശാസ്യമല്ല.വിദ്യാർത്ഥി രാഷ്ട്രീയം പാടില്ലെന്നല്ല പറയുന്നത്. ജനാധിപത്യബോധവും സാമൂഹിക ഉത്തരവാദിത്വവും വളർത്തുന്നതിൽ വിദ്യാർത്ഥി സംഘടനകൾക്ക് വലിയ പങ്കുണ്ട്. എന്നാൽ രാഷ്ട്രീയ പ്രവർത്തനം പഠനത്തെ തടസ്സപ്പെടുത്തുന്ന തരത്തിലേക്ക് വളരരുത്. വിദ്യാഭ്യാസ സ്ഥാപനങ്ങളെ രാഷ്ട്രീയ പോരാട്ടങ്ങളുടെ വേദികളാക്കി മാറ്റുന്നതും ശരിയല്ല
അതോടൊപ്പം അധ്യാപനത്തിന്റെ നിലവാരം, തൊഴിൽസാധ്യതയുള്ള കോഴ്സുകൾ, ഗവേഷണ സൗകര്യങ്ങൾ, അടിസ്ഥാന സൗകര്യങ്ങൾ എന്നിവയും ഗൗരവമായി പരിശോധിക്കേണ്ടതുണ്ട്. കാലത്തിനനുസരിച്ച് മാറാൻ കഴിയാത്ത വിദ്യാഭ്യാസ സമ്പ്രദായത്തിന് വിദ്യാർത്ഥികളെ ആകർഷിക്കാനാവില്ല.നമ്മുടെ കോളേജുകൾക്ക് വിദ്യാർത്ഥികളെ നഷ്ടപ്പെടുന്നത് കേവലം ജനസംഖ്യാ കുറവിന്റെ മാത്രം പ്രശ്നമല്ല. വിദ്യാഭ്യാസത്തിന്റെ ഗുണനിലവാരവും വിശ്വാസ്യതയും ഭാവിയെക്കുറിച്ചുള്ള പ്രതീക്ഷകളും ഇതിൽ ഉൾപ്പെടുന്നു.രാഷ്ട്രീയക്കാർക്കും വിദ്യാഭ്യാസ വിചക്ഷണന്മാർക്കും സർവകലാശാലാ അധികൃതർക്കും ഇതിൽ ഉത്തരവാദിത്വമുണ്ട്. ഇനിയെങ്കിലും ഉന്നതവിദ്യാഭ്യാസരംഗത്തെ രാഷ്ട്രീയാഭാസങ്ങൾ അവസാനിപ്പിച്ച് പഠനത്തിനും ഗവേഷണത്തിനും പ്രാധാന്യം നൽകണം.
സ്വാശ്രയ-എയ്ഡഡ് സ്വയംഭരണ കോളജുകളിൽ പുതിയ കോഴ്സുകൾ തുടങ്ങാൻ സർക്കാരിന്‍റെ മുൻകൂർ അനുമതിയോ നിരാക്ഷേപ പത്രമോ (നോ ഒബ്ജക‌്ഷൻ സർട്ടിഫിക്കറ്റ്) ആവശ്യമില്ലെന്ന സർക്കാർ ഉത്തരവ് ധീരമാണ്. കാരണം, വിദ്യാഭ്യാസമേഖലയുടെ തോളിൽ കയറിപ്പറ്റിയ രാഷ്‌ട്രീയവേതാളങ്ങളുടെ ആരോപണങ്ങൾക്കു മറുപടി പറഞ്ഞ് കേരളം നഷ്‌ടമാക്കിയ സമയത്തിനു കണക്കില്ല. എതിർപ്പുകൾക്കു മറുപടി ഉണ്ടാകണം. പക്ഷേ, പ്രതിപക്ഷനേതാവ് പിണറായി വിജയൻ ഉൾപ്പടെ കച്ചവടം, കൊള്ള എന്നീ പതിവ് വാക്കുകൾ ഉത്തരവാദിത്വമില്ലാതെ ആവർത്തിച്ചതല്ലാതെ എന്തുകൊണ്ട് ഇത് എതിർക്കപ്പെടണം എന്നു പറയുന്നില്ല. ചിലർ പാവപ്പെട്ടവരുടെയും സംവരണത്തിന്‍റെയും കാർഡും ഇറക്കിയിട്ടുണ്ട്.
ആഗോള മാറ്റങ്ങളെ ഉൾക്കൊണ്ട് പുതിയ കോഴ്സുകൾ തുടങ്ങാനുള്ള ചുവപ്പുനാടയല്ലാതെ മറ്റൊന്നും മാറ്റിയിട്ടില്ല. ബന്ധപ്പെട്ട റെഗുലേറ്ററി അഥോറിറ്റികൾ, സർവകലാശാലകൾ എന്നിവയുടെ അനുമതികളൊക്കെ പഴയതുപോലെ തന്നെയാണ്. 10 വർഷത്തിനിടെ ലക്ഷക്കണക്കിനു വിദ്യാർഥികളെ ഇതരസംസ്ഥാനങ്ങളിലേക്കും വിദേശങ്ങളിലേക്കും ഓടിച്ച, സർവകലാശാലകളിലെയും കോളജുകളിലെയും കാലഹരണപ്പെട്ട കോഴ്സുകളിൽ പഠിക്കാൻ ആളില്ലാതാക്കിയ, സ്വന്തം മക്കളെ വിദേശത്തയച്ചു പഠിപ്പിക്കുകയും കേരളത്തിലെ കലാലയങ്ങളെ കലാപകേന്ദ്രങ്ങളാക്കുകയും ചെയ്യുന്ന പിന്തിരിപ്പൻ രാഷ്‌ട്രീയത്തെ ഇനിയും പ്രോത്സാഹിപ്പിക്കരുത്. മാറ്റത്തിന്‍റെ കാറ്റ് വീശിത്തുടങ്ങട്ടെ.
എന്താണ് സംഭവം? ഗവൺമെന്‍റ് കോളജുകളിലും എയ്ഡഡ് കോളജുകളിലുമല്ല, സ്വാശ്രയ സ്വയംഭരണ കോളജുകൾക്കും എയ്ഡഡ് സ്വയംഭരണ കോളജുകൾക്കും സ്വാശ്രയ സ്കീമിന് കീഴിൽ പുതിയ കോഴ്സുകൾ തുടങ്ങാൻ ഇനി സർക്കാരിന്‍റെ അനുമതി ആവശ്യമില്ല. അറിയിച്ചാൽ മതി. മാത്രമല്ല, സ്വാശ്രയ കോളജുകൾ ഓരോ വർഷവും എൻഒസി പുതുക്കുന്നതിനു പകരം മൂന്നു വർഷത്തിൽ ഒരിക്കൽ പുതുക്കിയാൽ മതി. യുക്തിസഹമായ ചോദ്യങ്ങൾക്ക് ഉന്നതവിദ്യാഭ്യാസമന്ത്രി റോജി എം. ജോൺ ഇതിനകം വിശദീകരണവും നൽകിയിട്ടുണ്ട്. “സർക്കാരിനു നയാപൈസ നഷ്‌ടമില്ല. യുജിസി മാനദണ്ഡപ്രകാരം സ്വയംഭരണ കോളജുകള്‍ക്ക് കോഴ്സുകള്‍ തുടങ്ങാന്‍ സര്‍വകലാശാലയുടെ അനുമതി മാത്രം മതി. കേരളത്തിൽ മാത്രം സര്‍ക്കാരിന്‍റെ എന്‍ഒസി നിര്‍ബന്ധമാക്കുന്നത് കാലതാമസത്തിനും അഴിമതിക്കും വഴിവയ്ക്കും. പുതിയ പരിഷ്‌കാരം വഴി മെറിറ്റോ സംവരണതത്വങ്ങളോ ഫീസ് മാനദണ്ഡങ്ങളോ അട്ടിമറിക്കപ്പെടില്ല.”
സ്വാശ്രയ സ്വയംഭരണ കോളജ് പ്രതിനിധികൾ ഉന്നതവിദ്യാഭ്യാസ മന്ത്രിയുമായി നടത്തിയ കൂടിക്കാഴ്ചയ്ക്കു തൊട്ടുപിന്നാലെയാണ് സർക്കാർ ഉത്തരവെന്നതാണ് മറ്റൊരു ആരോപണം. ഈ സംസ്ഥാനത്ത് വിദ്യാഭ്യാസ സ്ഥാപനങ്ങൾ നടത്തുന്നവർ സർക്കാരിനെ കാര്യങ്ങൾ ധരിപ്പിക്കുന്നതിൽ എന്താണു തെറ്റ്? സ്വകാര്യ വിദ്യാഭ്യാസമേഖലയെ അധോലോകമായി ചിത്രീകരിച്ചവരാണ് തിരുത്തേണ്ടത്. സ്വന്തം മക്കളെ യൂറോപ്പിലും അമേരിക്കയിലും പഠിപ്പിക്കുന്ന പാർട്ടി മുതലാളിമാർ വികാരജീവികളായ വിദ്യാർഥികളെ തെരുവിലിറക്കി ഭാവി തകർക്കുകയാണ്.
എൻഒസി ഇല്ലാതെ കോഴ്സുകൾ തുടങ്ങിയതിന്‍റെ പേരിൽ ഏതെങ്കിലും നിയമവിരുദ്ധ പ്രവൃത്തി ഏതെങ്കിലും വിദ്യാഭ്യാസ സ്ഥാപനം നടത്തിയാൽ അതിനെ നിലയ്ക്കു നിർത്താൻ സർക്കാരിനു കഴിയണം. വിദ്യാഭ്യാസ-ആതുരശുശ്രൂഷാ രംഗങ്ങൾ കച്ചവടമുക്തമാണെന്ന് ആരും അവകാശപ്പെടുന്നില്ല. അവിടെ കള്ളനാണയങ്ങളുണ്ടെങ്കിൽ ഇവിടെ ചെലവാക്കാൻ അനുവദിക്കരുത്. അല്ലാതെ അടച്ചാക്ഷേപിക്കുകയല്ല വേണ്ടത്. സംസ്ഥാനത്തെ പിന്നോട്ടടിപ്പിച്ച പ്ലസ്ടു, സ്വാശ്രയ വിദ്യാഭ്യാസ, കംപ്യൂട്ടർ വിരുദ്ധ കലാപകാരികളെ നിയന്ത്രിച്ചേ തീരൂ.
കേരളത്തിലെ ഉന്നതവിദ്യാഭ്യാസരംഗം ലോകനിലവാരത്തിലേക്ക് ഉയരട്ടെ. ഇടതു-വലതു രാഷ്‌ട്രീയപാർട്ടികൾ തിരുത്തണം. നിങ്ങൾ വിജനമാക്കിയ സർവകലാശാലകളിലേക്കു നോക്കൂ, കാന്പസുകളിലെ ചോര കാണൂ, ഇടിമുറികൾ കാണൂ, നേതാവ് ജാതി പറഞ്ഞ് ആക്ഷേപിച്ചെന്നും മാറിൽ പിടിച്ചെന്നും വിളിച്ചുപറയുന്ന സ്ത്രീശബ്ദം കേൾക്കൂ, രാഷ്ട്രീയം തലയ്ക്കു പിടിച്ച അധ്യാപകരെയും ജീവനക്കാരെയും കാണൂ, സിദ്ധാർഥിന്‍റെ മാതാപിതാക്കളുടെ അടങ്ങാത്ത തേങ്ങലുകൾ കേൾക്കൂ, പാർട്ടിക്കാർക്കായി തുറന്നിട്ട പിൻവാതിലുകൾ കാണൂ, ആർക്കും വേണ്ടാത്ത നിങ്ങളുടെ കോഴ്സുകളും സിലബസുകളും ലോകം ചവറ്റുകുട്ടയിലെറിഞ്ഞതു ശ്രദ്ധിക്കൂ, പിഎസ്‌സിയുടേത് ഉൾപ്പടെയുള്ള ചരിത്ര അഴിമതിക്കാലത്ത് ശവാസനത്തിലായിരുന്ന വിദ്യാർഥിസംഘടനകളെ തിരിച്ചറിയൂ... പരാതി കേൾക്കാമെന്നു വാക്കു കൊടുത്തിട്ടും സുപ്രധാനമായ ഒരു പരിപാടി തുടരണമെങ്കിൽ തങ്ങളുടെ ശാഠ്യങ്ങൾ സാധിച്ചിട്ടു മതിയെന്നു പറഞ്ഞ് മന്ത്രിയെയും വിദ്യാർഥികളെയും ബന്ദികളാക്കുന്ന ഗുണ്ടായിസത്തെ വിദ്യാർഥിരാഷ്‌ട്രീയമെന്നു വിളിക്കരുത്.
കലാപരാഷ്‌ട്രീയത്തിൽനിന്ന് വിദ്യാർഥിരാഷ്‌ട്രീയത്തെ വേർതിരിക്കാൻ സമയമായി. സ്വാശ്രയ വിദ്യാഭ്യാസത്തിന്റെ സാധ്യതകളെ ഉപയോഗിക്കുക. അതിലും മികച്ച കോഴ്സുകൾ തുടങ്ങി സർക്കാർ-എയ്ഡഡ് മേഖലയിൽ മാതൃകകൾ ഉണ്ടാക്കുക. അപ്പോൾ സ്വാശ്രയ കോളജുകളിൽനിന്ന് വിദ്യാർഥികൾ കച്ചവടവും കൊള്ളയും അഴിമതിയുമില്ലാത്ത സർക്കാർ സ്ഥാപനങ്ങളിലേക്ക് ഒഴുകും. അതുവരെയെങ്കിലും സ്വാശ്രയ, സ്വയംഭരണ കോളജുകളെ പ്രവർത്തിക്കാൻ അനുവദിക്കുക. വിദ്യാഭ്യാസക്കച്ചവടമെന്ന പഴയ അശ്ലീലം പൊക്കിപ്പിടിച്ച് ആ ചുവപ്പുനാട തിരിച്ചുകെട്ടിക്കാൻ ഇറങ്ങിയവർക്കു മുന്നിൽ ഇനി യുവത്വത്തെ ബലികൊടുക്കരുത്.
കോളേജുകൾ രാഷ്ട്രീയക്കാരുടെ താൽപര്യങ്ങൾ സംരക്ഷിക്കാനുള്ള വേദികളല്ല; ഭാവിതലമുറയെ വാർത്തെടുക്കാനുള്ള ക്ഷേത്രങ്ങളാണ്. അവിടെ വിദ്യാർത്ഥികളില്ലെങ്കിൽ നാളെ കേരളത്തിന്റെ ഭാവി തന്നെ ശൂന്യമാകും.നമ്മുടെ കോളേജുകളിലേക്ക് കുട്ടികളെ തിരികെ കൊണ്ടുവരാൻ ഇനിനമുക്ക് കഴിയുമോ?
പ്രൊഫ്. ജോൺ കുരാക്കാർ
