പഠനം രസകരമാക്കാം.
ഡോ. പ്രിയ ദേവദത്ത്
ജീവശാസ്ത്രപരമായ ഒരു പ്രക്രിയയാണ് പഠനം. ശാരീരികവും മാനസികവും ബുദ്ധിപരവും സാമൂഹികവുമായ അറിവുകള്‍ കുട്ടികള്‍ കൈവരിക്കുന്നത് പഠനത്തിലൂടെയാണ്. ലഭിക്കുന്ന അറിവുകളെ തുടര്‍ച്ചയായി സ്വീകരിക്കുകയും വ്യക്തമായ ധാരണ ഉണ്ടാക്കുകയും ചെയ്യുന്നത് മസ്തിഷ്കമാണ്. വീണ്ടും ഓര്‍ത്തെടുക്കാന്‍ പറ്റുന്ന രീതിയിലാണ് മസ്തിഷ്കം വിവരങ്ങള്‍ ശേഖരിക്കുന്നത്. എന്നാല്‍ അശ്രദ്ധമായി പഠിക്കുന്ന കാര്യങ്ങളൊന്നുംതന്നെ മസ്തിഷ്കത്തില്‍ ശേഖരിക്കാറില്ല. മനസ്സിരുത്തി താല്‍പ്പര്യത്തോടും ശ്രദ്ധയോടുമുള്ള വായന പഠനത്തെ മികവുറ്റതാക്കുന്ന സുപ്രധാന ഘടകമാണ്. പഠനത്തിന് കുട്ടിയുടെ സ്വമേധയായുള്ള പഠനം, അധ്യാപകന്‍ പഠിപ്പിക്കുന്നത്, സഹപാഠികളുമായി ചര്‍ച്ചചെയ്ത് പഠിക്കുന്നത് എന്നിങ്ങനെ മൂന്നു തലങ്ങളുണ്ട്. ഇതിനുപുറമെ കാലക്രമേണയുള്ള അനുഭവങ്ങളിലൂടെയാണ് പഠനം പൂര്‍ണമാകുന്നതെന്നും ആയുര്‍വേദം പറയുന്നു.
ഒരുക്കാം പഠനമുറി
ശബ്ദമില്ലാത്ത നല്ല വായുസഞ്ചാരമുള്ള മുറി വേണം പഠനത്തിന് തെരഞ്ഞെടുക്കാന്‍. ഭക്ഷണസാധനങ്ങള്‍, ടിവി, റേഡിയോ, മൊബൈല്‍ ഫോണ്‍, ശ്രദ്ധതിരിക്കുന്ന ചിത്രങ്ങള്‍ ഇവ പഠനമുറിയില്‍നിന്ന് ഒഴിവാക്കണം. കുട്ടികളുടെ പഠനത്തിനനുസരിച്ച് വീട്ടിലെ സാഹചര്യങ്ങള്‍ മാറ്റണം. കുട്ടികള്‍ പഠിക്കുമ്പോള്‍ വീട്ടിലുള്ളവരും ടിവി കാണുന്നത് ഒഴിവാക്കാം.
ടൈംടേബിള്‍ തയ്യാറാക്കാം
പഠിക്കാനും മനസ്സിലാക്കാനുമുള്ള കഴിവിന്റെയും പഠനത്തിന് ലഭിക്കുന്ന സമയത്തിന്റെയും അടിസ്ഥാനത്തില്‍ വ്യത്യസ്തമായ ടൈംടേബിള്‍ ഓരോ വിദ്യാര്‍ഥിക്കും തയ്യാറാക്കാം. എല്ലാ പാഠ്യവിഷയങ്ങളും ഒരുപോലെ ശ്രദ്ധിക്കാനും ലഭ്യമായ സമയം ഫലപ്രദമായി ഉപയോഗിക്കാനും ടൈംടേബിള്‍ ഉപകരിക്കും. പഠിപ്പിച്ചത് അന്നന്നുതന്നെ പഠിക്കാന്‍ ശ്രദ്ധിക്കണം. 35–40 മിനിറ്റ്വരെ ഓരോ വിഷയത്തിനും നീക്കിവയ്ക്കുകയും 5–10 മിനിറ്റ്വീതം ഗ്യാപ്പ് നല്‍കാനും ശ്രദ്ധിക്കണം. തുടര്‍ച്ചയായി ഒരു വിഷയത്തില്‍ മോശം മാര്‍ക്കാണെങ്കില്‍ ആ വിഷയം ആദ്യം പഠിക്കണം.
പഠിച്ചതെല്ലാം ഓര്‍മിക്കാന്‍
* ഏകാഗ്രതയോടും താല്‍പ്പര്യത്തോടുംകൂടി പഠിക്കുകയും ശരിയായി ഓര്‍ത്തെടുക്കാന്‍ കഴിയുന്നതുവരെ പഠനം തുടരുകയും ചെയ്യണം.* പ്രധാന പോയിന്റുകള്‍ എഴുതിവയ്ക്കുക.
പരീക്ഷാപേടി അകറ്റാം
ചെറിയതോതിലുള്ള സമ്മര്‍ദം കുട്ടികള്‍ ഉഴപ്പാതെ പഠിക്കാന്‍ സഹായിക്കുന്ന ഇന്ധനമാണ്. എന്നാല്‍ സമ്മര്‍ദം മനസ്സിനെ കീഴ്പ്പെടുത്തിയാല്‍ പേടിമൂലം പരീക്ഷാവേളയില്‍ പഠിക്കുന്നത് ഗ്രഹിക്കാനോ ഓര്‍ത്തെടുക്കാനോ കഴിയാതെവരും. ചിട്ടയില്ലാതെ പഠിക്കുന്നവരില്‍ പരീക്ഷാപേടി കൂടുതലായി കാണാറുണ്ട്. കൂടാതെ മാതാപിതാക്കളുടെ അമിതസമ്മര്‍ദം, പഠിക്കാന്‍ സഹായകരമല്ലാത്ത രീതിയിലുള്ള വീട്ടിലെ സാഹചര്യങ്ങള്‍ ഇവയും പരീക്ഷാപേടിക്ക് ഇടയാക്കാറുണ്ട്. ചിലരില്‍ പരീക്ഷാപേടി രോഗങ്ങളുടെ രൂപത്തിലും പ്രകടമാകും. കൈ വിറയല്‍, ശ്വാസതടസ്സം, നെഞ്ചുവേദന, നെഞ്ചിടിപ്പ്, വയറിളക്കം, പഠിച്ചത് മറന്നുപോവുക ഇവയുണ്ടാകാം. ചില കുട്ടികളില്‍ പരീക്ഷാപേടി വിഷാദമായി മാറാം. കടുത്ത വിഷാദം അകറ്റാന്‍ മരുന്നുകള്‍ നല്‍കേണ്ടിവരും. യോഗാസനങ്ങളും ശീലമാക്കണം. ജയവും തോല്‍വിയും പഠനത്തിന്റെ ഭാഗമാണെന്ന് കുട്ടികളെ ബോധ്യപ്പെടുത്തുന്നതോടൊപ്പം അവരെ സമ്മര്‍ദങ്ങളില്‍നിന്ന് മോചിതരാക്കാനും രക്ഷിതാക്കള്‍ ശ്രദ്ധിക്കേണ്ടതുണ്ട്.
കളിച്ചുവളരാം; ഭക്ഷണവും പ്രധാനം
ഓടിച്ചാടി നടക്കേണ്ടവരാണ് കുട്ടികള്‍. നിര്‍ഭാഗ്യവശാല്‍ നമ്മുടെ കുട്ടികള്‍ക്ക് വേണ്ടത്ര വ്യായാമം ലഭിക്കുന്നില്ല. കായികപരിശീലനമൊന്നും ഇല്ലാതെ വളരുന്ന കുട്ടികള്‍ക്ക് മധ്യവയസ്സെത്തും മുമ്പേ ജീവിതശൈലിരോഗങ്ങള്‍ വരാനുള്ള സാധ്യത വളരെ കൂടുതലാണ്. കുട്ടികളില്‍ ശാരീരികവും മാനസികവും വൈകാരികവും ബുദ്ധിപരവുമായ കഴിവുകളെ മെച്ചപ്പെടുത്താന്‍ കളികളും വ്യായാമങ്ങളും നല്ല പങ്കുവഹിക്കാറുണ്ട്. ഓര്‍മയും ഏകാഗ്രതയും കൂട്ടുക, ഇന്‍സുലിന്‍ ഹോര്‍മോണിന്റെ പ്രവര്‍ത്തനം കാര്യക്ഷമമാക്കുക, പൊണ്ണത്തടി കുറയ്ക്കുക, രോഗപ്രതിരോധശേഷി മെച്ചപ്പെടുത്തുക, അസ്ഥികളുടെയും പേശികളുടെയും ബലം കൂട്ടുക തുടങ്ങിയ നല്ല ഫലങ്ങള്‍ കളികളിലൂടെയും വ്യായാമത്തിലൂടെയും നേടാനാകും. മാനസികസംഘര്‍ഷം, അലസത, അമിതവികൃതി, അശ്രദ്ധ, ആകാംക്ഷ ഇവ കുറയ്ക്കാനും കളികള്‍ക്കാകും. സൂര്യനമസ്കാരം, വൃക്ഷാസനം, ശശാങ്കാസനം ഇവയും നല്ല ഫലം നല്‍കും.
പോഷകഭക്ഷണം: ശാരീരികവും മാനസികവുമായ പ്രവര്‍ത്തനങ്ങള്‍ക്കാവശ്യമായ ഊര്‍ജം ലഭിക്കാന്‍ കുട്ടികള്‍ക്ക് കളികള്‍ക്കൊപ്പം നല്ല പോഷകഭക്ഷണവും കൂടിയേതീരൂ. അളവിലല്ല, കഴിക്കുന്ന ഭക്ഷണം പോഷകസമ്പന്നമാകണമെന്നതാണ് പ്രധാനം. തിരക്കിട്ട ദിനചര്യയാണ് കുട്ടികളുടേത്. സമാധാനമായിരുന്ന് ഭക്ഷണം കഴിക്കാനുള്ള സമയം അവര്‍ക്ക് കിട്ടാറില്ല. ട്യൂഷന്‍, നൃത്ത–സംഗീത പഠനങ്ങള്‍ ഇവയ്ക്കിടയില്‍ ഭക്ഷണം കഴിക്കാന്‍ സമയംകിട്ടാതെ പോകുന്നു. പ്രഭാതഭക്ഷണം ഒഴിവാക്കുക, ഉച്ചഭക്ഷണം വേണ്ട രീതിയില്‍ കൊണ്ടുപോകാതിരിക്കുക, പഠനത്തിന്റെയും കളികളുടെയും ക്ഷീണത്തില്‍ രാത്രി ഭക്ഷണം ഒഴിവാക്കുക തുടങ്ങിയ സാഹചര്യങ്ങള്‍ കുട്ടികള്‍ക്ക് പോഷകക്കുറിവിന് ഇടയാക്കാറുണ്ട്. ദീര്‍ഘനേരത്തെ ഉറക്കത്തിനുശേഷം കഴിക്കുന്ന പ്രഭാതഭക്ഷണം ഏകാഗ്രത, ഓര്‍മ ഇവയെ കൂട്ടുമെന്നതിനാല്‍ ഒഴിവാക്കരുത്. പുട്ട്–പയര്‍, ദോശ–കടല, ഇഡ്ഡലി–സാമ്പാര്‍, ഇടിയപ്പം–മുട്ടക്കറി, ചപ്പാത്തി–കിഴങ്ങുകറി ഇവയില്‍ ഏതെങ്കിലുമൊന്നിനൊപ്പം ഒരു പഴവും കഴിക്കണം.
വൈവിധ്യംനിറഞ്ഞ ഭക്ഷണമാണ് കുട്ടികള്‍ ഇഷ്ടപ്പെടുക. എളുപ്പം കഴിക്കാന്‍പറ്റുന്നവയാകുകയും വേണം. ഉച്ചഭക്ഷണം ചോറു തന്നെ വേണമെന്ന് ശഠിക്കേണ്ടതില്ല. ചെറുപയര്‍, തുവര, കടുംപച്ചനിറമുള്ള ഇലക്കറികള്‍, മുരിങ്ങയില, ബീന്‍സ്, മത്തങ്ങ, കാരറ്റ്, മത്തി, ചൂട, പശുവിന്‍ നെയ്യ്, മോര്, ഏത്തപ്പഴം, ഈന്തപ്പഴം, മുട്ട, എള്ള്, കപ്പലണ്ടി, നാടന്‍ കോഴിയിറച്ചി ഇവ ഉള്‍പ്പെട്ട ഭക്ഷണമാണ് കുട്ടികള്‍ക്ക് ഉചിതം. ഒപ്പം ബേക്കറി–ഫാസ്റ്റ്ഫുഡ് വിഭവങ്ങള്‍ പരമാവധി കുറയ്ക്കാനും ശ്രദ്ധിക്കണം. പകരം ഇടനേരങ്ങളില്‍ അവല്‍ നനച്ചത്, ഏത്തപ്പഴം നെയ്യില്‍ വരട്ടിയതോ പുഴുങ്ങിയതോ, ചെറുപയര്‍ പുഴുങ്ങി തേങ്ങയിട്ടത്, ഓംലറ്റ്റോള്‍ ചീര ചേര്‍ത്തത് ഇവ നല്‍കാം. ദിവസവും 7–8 ഗ്ളാസ് വെള്ളം നല്‍കാനും ശ്രദ്ധിക്കണം.
ഉറങ്ങാം... ഉന്മേഷത്തോടെ ഉണരാം
മസ്തിഷ്കത്തെ ഉത്തേജിപ്പിക്കുന്ന ഘടകങ്ങളില്‍ പ്രധാനമാണ് ഉറക്കം. പകല്‍ നേടുന്ന അറിവുകളെയും അനുഭവസമുച്ചയങ്ങളെയും ഓര്‍മച്ചെപ്പുകളായി മസ്തിഷ്കം സൂക്ഷിക്കുന്നത് നിദ്രാവേളകളിലാണ്. മസ്തിഷ്കത്തിന്റെ കഴിവുകള്‍ വികസിക്കാന്‍ കുട്ടികള്‍ ദിവസവും 7–8 മണിക്കൂറെങ്കിലും ഉറങ്ങണം. രാത്രിയില്‍ നേരത്തെ കിടന്ന് രാവിലെ 5–6 മണിക്കുള്ളില്‍ എഴുന്നേല്‍ക്കുന്ന രീതിയില്‍ ഉറക്കം ക്രമപ്പെടുത്താം
മാതാപിതാക്കളും അധ്യാപകരും സഹായിക്കണം
വഴിതെറ്റിപ്പോകാനുള്ള സാധ്യത ഏറെയുള്ള ലോകത്താണ് കുട്ടികള്‍ ജീവിക്കുന്നത്. അതുകൊണ്ടുതന്നെ മടിയോ സങ്കോചമോ കൂടാതെ കുട്ടികള്‍ക്ക് എന്തും തുറന്നുപറയാവുന്ന സാഹചര്യം ഉണ്ടാക്കിയെടുക്കാന്‍ മാതാപിതാക്കള്‍ ശ്രദ്ധിക്കണം. കുട്ടികള്‍ പറയുന്നത് താല്‍പ്പര്യത്തോടെ കേള്‍ക്കണം. കുട്ടികള്‍ക്കൊപ്പം ഏറെസമയം ചെലവിടുന്നു എന്നതിനെക്കാള്‍ ഫലപ്രദമായ രീതിയില്‍ സമയം എത്രത്തോളം ഉപയോഗപ്പെടുത്തുന്നു എന്നതാണ് പ്രധാനം.
ആവശ്യങ്ങളുടെ പ്രാധാന്യം അനുസരിച്ചുമാത്രം കുട്ടികള്‍ക്ക് സാധനങ്ങള്‍ വാങ്ങിക്കൊടുക്കണം. നല്ല കൂട്ടുകാരുമായും ബന്ധുക്കളുമായും കുട്ടികള്‍ ഇടപഴകാന്‍ അവസരം നല്‍കണം. വീട്ടില്‍ കംപ്യൂട്ടര്‍ പൊതുവായ റൂമില്‍ വയ്ക്കാനും ശ്രദ്ധിക്കണം.ഇടയ്ക്കിടെ സ്കൂളില്‍ പോയി കുട്ടിയുടെ വിവരങ്ങള്‍ അധ്യാപകരോട് അന്വേഷിക്കുകയും വേണം. പഠനത്തിന്റെ ഇടവേളകളില്‍ വായനശീലം വളര്‍ത്തിയെടുക്കാനും കഴിയണം. അന്നന്നുള്ള പാഠഭാഗങ്ങള്‍ പഠിക്കാനും ഗൃഹപാഠം വീട്ടില്‍വച്ചുതന്നെ ചെയ്യാനും ശ്രദ്ധിക്കണം. ഒപ്പം ചിട്ടകള്‍ കുട്ടികളുടെ പുറത്ത് അടിച്ചേല്‍പ്പിക്കാതിരിക്കുകയും വേണം. പ്രമേഹം, ആസ്ത്മ, അപസ്മാരം ഇവയുള്ള കുട്ടികളുടെ രോഗവിവരം അധ്യാപകരോടു പറയുകയും മരുന്നു നല്‍കുന്നത് അവരെ ബോധ്യപ്പെടുത്തുകയും വേണം.
അധ്യാപകരുടെ പങ്ക്: കുട്ടികളുടെ ബൌദ്ധികവും മാനസികവും വൈകാരികവുമായ വളര്‍ച്ചയില്‍ അധ്യാപകര്‍ക്കുള്ള പങ്ക് വളരെ വലുതാണ്. ഒപ്പം സ്കൂള്‍ അന്തരീക്ഷവും മികച്ചതാകണം. പഠനത്തില്‍ പിന്നോക്കാവസ്ഥയിലുള്ളവരെ കൂടുതല്‍ ശ്രദ്ധിക്കുകയും അവരെ മറ്റു കുട്ടികള്‍ക്കൊപ്പം ഉയര്‍ത്തിക്കൊണ്ടുവരുന്നതും അധ്യാപകരാണ്. കൂടാതെ കുട്ടികളുടെ കഴിവും കഴിവുകേടും കണ്ടെത്തുന്നത് അധ്യാപകരാണ്. ഇക്കാര്യം രക്ഷിതാക്കളുമായി പങ്കുവയ്ക്കുകയും വേണം.
പഠനവൈകല്യം കണ്ടെത്താം
പഠനവൈകല്യമുള്ള കുട്ടികളില്‍ ചില സവിശേഷ പെരുമാറ്റരീതികള്‍ കാണാറുണ്ട്. ഏകാഗ്രതയില്ലായ്മ, പെട്ടെന്ന് വികാരാധീനനാകുക, ഒരു പ്രവൃത്തിയില്‍ ശ്രദ്ധകേന്ദ്രീകരിച്ച് അടങ്ങിയിരിക്കാന്‍ കഴിയാതെവരിക, ഓര്‍മിച്ചെടുക്കാനും ചിന്തിക്കാനുമുള്ള കഴിവ് ഇല്ലാതിരിക്കുക, ഉച്ചാരണത്തിലും സംസാരത്തിലും കുറവുണ്ടാവുക തുടങ്ങിയ ലക്ഷണങ്ങളെ ശ്രദ്ധയോടെ കാണണം.
പ്രതിഭകളെ നേരത്തെ കണ്ടെത്താം
അറിവ്, മനസ്സിലാക്കാനും സംഗ്രഹിക്കാനും സത്ത ഉള്‍ക്കൊള്ളാനുമുള്ള കഴിവ്, ആശയങ്ങളും അറിവും വിലയിരുത്താനുള്ള കുട്ടികളുടെ കഴിവ്, അപഗ്രഥനം ഇവയുടെ അടിസ്ഥാനത്തില്‍ അധ്യാപകര്‍ക്ക് പ്രതിഭകളെ കണ്ടെത്താം. (മാന്നാര്‍ കോട്ടക്കല്‍ ആര്യവൈദ്യശാലയില്‍ ഡോക്ടറാണ് ലേഖിക)
Prof. John Kurakar
No comments:
Post a Comment