മദര്‍ തെരേസ-
യഥാര്‍ഥ മനുഷ്യസ്‌നേഹത്തിന്റെ
അണയാത്ത ദീപം
അണയാത്ത ദീപം
ജീവിച്ചിരുന്നപ്പോള്‍ തന്നെ വിശുദ്ധആയിരുന്ന അഗതികളുടെ അമ്മയായ മദര്‍ തെരേസയെ സെപ്‌റ്റംബര്‍ നാലിന്‌ വിശുദ്ധയായി പ്രഖ്യാപിക്കും.പാവങ്ങളെയും രോഗികളെയും ജാതിയുടെയും മതത്തിന്റെയും വേര്‍തിരിവുകളില്ലാതെ മനുഷ്യനായി മാത്രം കണ്ടുള്ള നിസ്‌തുലമായ പ്രേഷിത പ്രവര്‍ത്തനത്തിന്റെ ഉദാത്തരൂപമായിരുന്നു മദര്‍ തെരേസ.മദറിന്റെ മധ്യസ്‌ഥതയില്‍ സംഭവിച്ച്‌
അത്‌ഭുതങ്ങൾ ഫ്രാന്‍സിസ്‌ മാര്‍പാപ്പ അംഗീകരിച്ചതോടെയാണ്‌ അവരെ വിശുദ്ധപദവിയിലേക്ക്‌ അടുപ്പിച്ചത്‌. സമാധാനത്തിനുള്ള നൊബേല്‍ പുരസ്‌കാര ജേതാവുകൂടിയായ മദറിനെ വാഴ്‌ത്തപ്പെട്ടവളാക്കിയ ചടങ്ങില്‍ പങ്കെടുക്കാന്‍ വത്തിക്കാനില്‍ അന്ന്‌ തടിച്ചുകൂടിയത്‌ മൂന്നു ലക്ഷത്തോളം വിശ്വാസികളായിരുന്നു.സമൂഹം അറപ്പോടെ കണ്ട്‌ അകറ്റിനിര്‍ത്തിയ കുഷ്‌ഠരോഗികളെയും അനാഥരെയും അവര്‍ ശുശ്രൂഷിച്ചു. അഗതികളില്‍ മദര്‍ തെരേസ കണ്ടത്‌ ദൈവത്തെ തന്നെയായിരുന്നു. മനുഷ്യസ്‌നേഹത്തിന്റെ പകരംവയ്‌ക്കാനാകാത്ത മാതൃക കൂടിയായിരുന്നു ആ മഹദ്‌ജീവിതം.ചുറ്റുമുള്ള വേദന നിറഞ്ഞ ഇരുണ്ട ജീവിതങ്ങളിലേക്കു കാരുണ്യത്തിന്റെ പ്രകാശമായി ആ അമ്മ നിയോഗം പോലെ ഇറങ്ങിച്ചെല്ലുകയായിരുന്നു..1950-ല്‍ മിഷണറീസ്‌ ഓഫ്‌ ചാരിറ്റി ആരംഭിച്ചതോടെ അഗതികള്‍ക്കായുള്ള പ്രവര്‍ത്തനം കൂടുതല്‍ ആഴവും പരപ്പുമുള്ളതായി. കൊല്‍ക്കത്തയിലെ തെരുവില്‍ മരണവുമായി മല്ലിട്ടുകഴിഞ്ഞ രോഗികളെ മദര്‍ തെരേസ തന്റെ ശുശ്രൂഷാകേന്ദ്രമായ നിര്‍മല്‍ ഹൃദയില്‍ എത്തിച്ചു പരിചരിച്ചു. പലരും മരണത്തിനു തന്നെ കീഴടങ്ങി. അതിലേറെപ്പേര്‍ ജീവിതത്തിലേക്ക്‌ തിരിച്ചുവന്നു. അവര്‍ക്കൊക്കെ മദര്‍ തെരേസ ദൈവമായി. അവരങ്ങനെ മറ്റുള്ളവര്‍ക്കു മുന്നില്‍ മനുഷ്യരൂപം ധരിച്ചെത്തിയ ദൈവദൂതയായി മാറി.മദര്‍ തെരേസ കൊളുത്തിവച്ച യഥാര്‍ഥ മനുഷ്യസ്‌നേഹത്തിന്റെ ദീപശിഖ അണയാതെ മുന്നോട്ടു കൊണ്ടുപോകാൻ ലോകത്തിനു പ്രത്യേകിച്ച് ഭാരതീയർക്കു കഴിയണം .
പ്രൊഫ്‌. ജോൺ കുരാക്കാർ
No comments:
Post a Comment