വീടിന്റെ മുറ്റം എങ്ങനെ മനോഹരമാക്കാം

വീടിന്റെ മുറ്റം എങ്ങനെ  മനോഹരമാക്കാം

ഇന്ത്യയിൽ ലാൻഡ്സ്കേപ്പിങ്ങിന്റെ വ്യത്യസ്തമായ മുഖം കാണിച്ചുതന്നത് മുഗൾ രാജവംശമാണ്. ഡൽഹിയിലെ അത്യുഷ്ണത്തെ പ്രതിരോധിക്കാൻ അവര്‍ മനോഹരമായ ഉദ്യാനങ്ങളും ജലാശയങ്ങളും നിർമിച്ചു. കെട്ടിടങ്ങൾക്ക് ഇണങ്ങുന്ന ശൈലിയിലാണ് പൂന്തോട്ടങ്ങളെ ഒരുക്കേണ്ടതെന്ന കാര്യം അവർ പ്രത്യേകം ശ്രദ്ധിച്ചിരുന്നു. പക്ഷേ പൂർവികർക്കുണ്ടായിരുന്ന വിവേകം നമുക്കിന്നുണ്ടോ എന്ന് സംശയിക്കുന്നു. എടുത്തു കാട്ടാൻ വേണ്ടി ലാൻഡ്സ്കേപ് നിർമിക്കുന്നവരാണ് ഈ സംശയം ബലപ്പെടുത്തുന്നത്. വീടിന്റെ ഭംഗി പൂർണമാകണമെങ്കിൽ പച്ചപ്പ് കൂടിയേ തീരൂ. ആ പച്ചപ്പ് കാടു പിടിക്കാതെ ശ്രദ്ധിക്കുകയും വേണം

വെറുതേ കിടക്കുന്ന ഒരു പ്ലോട്ടിൽ പ്രകൃതിദത്തമായ പല പ്രക്രിയകളും നടക്കുന്നുണ്ട്. മഴ പെയ്യുന്നു, വെള്ളം താഴുന്നു, ചെടികൾ വളരുന്നു, അവ വാടിവീണ് മണ്ണിന് വളമാകുന്നു അങ്ങനെ പലതും. ആ പ്ലോട്ടിൽ ഒരു വീട് അല്ലെങ്കിൽ എന്തെങ്കിലും നിർമാണം നടക്കുമ്പോൾ ഒരു അസന്തുലിതാവസ്ഥ ഉണ്ടാകുന്നു. ഇതിനെ പൂർവസ്ഥിതിയിലാക്കുക എന്നതാണ് ലാൻഡ്സ്കേപിങ് എന്നതുകൊണ്ട് ഉദ്ദേശിക്കുന്നത് ലാൻഡ്സ്കേപ് ആർക്കിടെക്ചറിനെ പ്രധാനമായും മൂന്നായി തിരിക്കാം....

1.       ലാൻഡ് എൻജിനീയറിങ് നിർമാണത്തിനായി പ്ലോട്ടിനെ ഒരുക്കുന്ന ആദ്യഘട്ടം. പ്ലോട്ട് ലെവലാക്കുക, മണ്ണിട്ട് പൊക്കുക എന്നിവയൊക്കെ ഈ ഘട്ടത്തിലാണ് സംഭവിക്കുക

2.       2. ഹാർഡ് ലാൻഡ്സ്കേപ്പിങ്..

വീട് വച്ചതിനുശേഷമാണ് ഈ ഘട്ടത്തിലേക്കു കടക്കുക. നടപ്പാതകൾ, കോംപൗണ്ട് വോൾ, സ്റ്റെപ്പുകൾ എന്നിവയൊക്കെ ഈ സമയത്ത് ഒരുക്കാം...

3. സോഫ്റ്റ് ലാൻഡ്സ്കേപ്പിങ് പൂന്തോട്ടത്തിലേക്കുള്ള ചെടികളും മരങ്ങളും നടുക, ലോൺ ഒരുക്കുക എന്നിവയാണ് സോഫ്റ്റ് ലാൻഡ്സ്കേപ്പിങ്ങിൽ ഉൾപ്പെടുക. ലാൻഡ്സ്കേപ് ഒരുക്കുമ്പോൾ ഭംഗിക്കും ഉപരിയായി ശ്രദ്ധിക്കേണ്ട കാര്യങ്ങളുണ്ട്. പ്ലോട്ടിലേക്ക് വെള്ളം ഇറങ്ങുക എന്നതാണ് ഏറ്റവും പ്രധാനം. മുറ്റം മുഴുവൻ പേവ്മെന്റ് ടൈലുകൾ പിടിപ്പിച്ച് വെള്ളം ഒഴുക്കി പുറത്തേക്ക് കളയും. എന്നിട്ട് കാശുമുടക്കി മഴവെള്ള സംഭരണി വാങ്ങി വയ്ക്കും. മലയാളികളുടെ ഏറ്റവും വലിയ വിരോധാഭാസമാണിത്...

ഫ്രന്റ് യാർഡ് ഗാർഡനിങ് അല്ലെങ്കിൽ ലാൻഡ്സ്കേപ്പിങ് എന്നു കേൾക്കുമ്പോൾ മലയാളികളുടെ മനസ്സിലേക്ക് ആദ്യമെത്തുന്നത് ലോണിന്റെ ചിത്രമാണ് ലോൺ ഒരുക്കുന്ന ട്രെൻഡിന് ഇപ്പോൾ പഴയ പ്രഭാവമില്ലെന്നതാണ് സത്യം. കൂടുതൽ ലാഭകരമായ, എന്നാൽ ഭംഗി കുറയാത്ത കാര്യങ്ങളിലാണ് ഇന്ന് ആളുകൾ ശ്രദ്ധിക്കുന്നത്. ഇലച്ചെടികൾ (foliages) വളർത്തുകയാണ് ലോണിന് പകരമായി ചെയ്യാവുന്നത്. കുറ്റിച്ചെടികളും നല്ലൊരാശയമാണ്. പക്ഷേ ലോൺ ഏരിയ ഉപയോഗിക്കുംപോലെ ഈ സ്ഥലം ഉപയോഗയോഗ്യമല്ല പാർക്കിങ്ങിനോ പ്ലേ ഏരിയയായോ ഉപയോഗിക്കാൻ പറ്റില്ലെന്ന ദോഷമുണ്ട്. ഇനി ലോൺ നിർബന്ധമാണെങ്കിൽ ഗ്രൗണ്ടിന്റെ അതേ ലെവലിൽ പിടിപ്പിക്കരുത്. മഴവെള്ളത്തിന്റെ ഒഴുക്കിൽ പലതരം വിത്തുകൾ വന്നടിഞ്ഞ് കളകൾ എളുപ്പം കയറിപ്പിടിക്കും. അൽപം മണ്ണടിച്ചു പൊക്കിയിട്ടുവേണം ലോൺ പിടിപ്പിക്കാൻ. മുറ്റം മുഴുവനും ലോൺ ലോൺ പിടിപ്പിക്കുന്നതും ബുദ്ധിയല്ല. കാരണം വലിയൊരളവിൽ വെള്ളം നൽകിയാലേ ലോൺ പച്ചപിടിക്കൂ. ഒരു ഭാഗത്തേക്ക് ലോൺ ചുരുക്കുന്നതാണ് ബുദ്ധി....

മരങ്ങൾക്കും ഗാർഡനിൽ ഇടം കൊടുക്കണം. ഫലവൃക്ഷങ്ങൾ, പൂമരങ്ങൾ എന്നിവ പൂന്തോട്ടത്തിന്റെ ഭംഗി കൂട്ടും. കണിക്കൊന്ന, ചാരക്കൊന്ന, ഇലഞ്ഞി, മന്ദാരം തുടങ്ങിയവയെല്ലാം ചുറ്റുവട്ടത്ത് സൗരഭ്യം പരത്തും. ചാമ്പ, പേര മാവ്, മംഗോസ്റ്റിൻ, മുള്ളാത്ത എന്നിങ്ങനെ ഫലവൃക്ഷങ്ങളും കേരളത്തിന്റെ കാലാവസ്ഥയിൽ നല്ലപോലെ വളരുന്നവയാണ് വിശ്വാസങ്ങളുടെ ഭാഗമായി നക്ഷത്രമരങ്ങൾ വളപ്പിൽ നടാനും ആളുകൾ താൽപര്യം പ്രകടിപ്പിക്കുന്നുണ്ട്. മുളയ്ക്കും പ്രാധാന്യം ഏറി വരുന്നുണ്ട്. കേരളത്തിന്റെ സ്വാഭാവികമായ ലാൻഡ്സ്കേപ് എന്നു പറഞ്ഞാൽ കാവുകളാണ്... ഈർപ്പം പുറത്തു വിടുന്ന മരങ്ങളുണ്ട്. ഇവ പഴയ വീടുകളുടെ പടിഞ്ഞാറ് ഭാഗത്താണ് നല്‍കിയിരുന്നത്. പടിഞ്ഞാറൻ കാറ്റിനൊപ്പം തണുപ്പും വീടിനകത്ത് കയറ്റാനായിരുന്നു ഈ വിദ്യ. വെയിൽ കൂടുതലടിക്കുന്ന തെക്കുവശത്തും മരങ്ങൾ നൽകാൻ ശ്രദ്ധിക്കണം...

ബാക് യാർഡ്...

ഭംഗിയായി സൂക്ഷിക്കേണ്ട ഒന്നാണ് പിൻമുറ്റം. വീട്ടുകാരുടെ മാത്രം ഇടമായി പിൻമുറ്റത്തെ മാറ്റിയെടുക്കാം. വീടിന്റെ പ്ലാനിങ്ങിൽത്തന്നെ ഇക്കാര്യം ചിന്തിച്ചു വയ്ക്കാം. ഡൈനിങ്, അല്ലെങ്കിൽ അടുക്കളയിൽനിന്ന് പിൻമുറ്റത്തേക്കിറങ്ങാൻ ഒരു ഗ്ലാസ് വാതിൽ നൽകാം. ഗ്ലാസ് വാതിലാണെങ്കിൽ വീടിനകത്തിരുന്നും പിൻമുറ്റത്തിന്റെ ഭംഗി ആസ്വദിക്കാം. ചെറിയൊരു ലോൺ, അതിന്റെ ഒത്ത നടുക്കായി ഒരു ചുവന്ന ഒരു ചുവന്ന ചെമ്പകവും നിൽക്കുന്ന കാഴ്ചയൊന്ന് ആലോചിച്ചു നോക്കൂ. അതിരിലായി ചെറിയ കുറ്റിച്ചെടികള്‍ നൽകാം അത്യാവശ്യം സ്ഥലമുള്ളവരാണെങ്കിൽ ഒരു ചെറിയ ഗസീബോ കൂടി പണിതിട്ടാല്‍ വൈകുന്നേരത്തെ ചായയ്ക്കു പറ്റിയ ഇടമായി. മിന്റ്, പുതിന, ഇഞ്ചി തുടങ്ങിയ കുറ്റിച്ചെടികള്‍ പിന്‍മുറ്റത്തിന് പറ്റിയവയാണ്.... വീട് വയ്ക്കുന്നതിന്റെ ആദ്യത്തെ കമ്പത്തിന് നമ്മൾ സ്ഥിരം ബാൽക്കണിയിൽ പോയിരുന്ന് ചായ കുടിക്കും. ക്രമേണ അങ്ങോട്ടുള്ള പോക്ക് കുറഞ്ഞ് ആരും തിരിഞ്ഞുനോക്കാതെയാവും. അതുകൊണ്ട് ബാൽക്കണിയിൽ ചെടി വയ്ക്കുകയാണെങ്കിൽ പരിചരണം കുറഞ്ഞവ വച്ചാൽ മതിയാകും. പ്രായമായവർ മാത്രമുള്ള വീടാണെങ്കിൽ എപ്പോഴും സ്റ്റെപ് കയറിപ്പോകുന്ന ബുദ്ധിമുട്ടും അങ്ങനെ ഒഴിവാക്കാം... വെർട്ടിക്കൽ ഗാർഡനാണ് ഇപ്പോൾ ട്രെൻഡിൽ ഒന്നാമത്. സ്ഥലം കുറവുള്ള വീട്ടുകാർക്ക് ഇതിലും നല്ലൊരു ഓപ്ഷനില്ല... ചുറ്റുമതിലിൽ, വീടിന്റെ പുറംഭിത്തിയിൽ, ബാൽക്കണിയിൽ അങ്ങനെ പലയിടത്തും വെർട്ടിക്കൽ ഗാർഡൻ നൽകാം. ഒരു സ്ക്വയർഫീറ്റിൽ 10 ചെടികൾ വയ്ക്കാം. ചെലവു കൂടുമെങ്കിലും വെർട്ടിക്കൽ ഗാർഡനിൽ കൂടുതൽ സ്ഥലം ലഭിക്കും. നല്ല വെളിച്ചം കിട്ടുന്ന സ്ഥലത്തു വേണം വെർട്ടിക്കൽ ഗാർഡൻ നൽകാൻ. വീടിനുള്ളിലാണെങ്കിൽ കൃത്രിമ വെളിച്ചം നൽകാൻ മറക്കരുത്.... ഹാർഡ്സ്കേപ്പിങ്ങിന്റെ കാര്യത്തിലും ശ്രദ്ധ വേണം. പ്രകൃതിദത്തമായ കല്ലുകൾകൊണ്ട് പാതയൊരുക്കുന്നതാണ് നല്ലത്. കാരണം ഇത്തരം കല്ലുകൾ വെള്ളം വലിച്ചെടുക്കും. പക്ഷേ, കോൺക്രീറ്റ് പോലുള്ളവയിൽ വെള്ളം കെട്ടിക്കിടന്ന് പായൽ പിടിക്കും. വഴുക്കി വീഴാൻ അതുമതി.... ലാൻഡ്സ്കേപിൽ വാട്ടർബോഡി ഒരുക്കുന്നവരും ഇന്നൊട്ടും കുറവല്ല. പക്ഷേ, കുറച്ചു നാളുകൾക്കുള്ളിൽ പലരും ഇതുപേക്ഷിക്കുന്നതാണ് കാണുന്നത്. വെള്ളം കറുത്ത് ഭംഗിയില്ലാതായി എന്നതാണ് പലരും കാരണം പറയുന്നത്. ഒടുവിൽ ആർക്കും വേണ്ടാതെ അഴുക്കും പായലും അടിഞ്ഞ് വാട്ടർബോഡി ഒരു ദുരന്തകഥാപാത്രമാകും. ഒന്നു രണ്ടു കാര്യങ്ങൾ ശ്രദ്ധിച്ചാല്‍ കാര്യം ശരിയാക്കാം. വാട്ടർബോഡി അല്ലെങ്കിൽ പൂൾ ഒരിക്കലും തണലത്ത് നൽകരുത്. പൂളിൽ നല്ല വായുസഞ്ചാരം (എയറേഷൻ) നൽകാൻ ഉപകരണം പിടിപ്പിച്ചാൽ വെള്ളം കറുത്തു പോകുന്നത് ഒഴിവാക്കാം. പൂളിനകത്ത് ഒരു ചട്ടിയിൽ ആമ്പൽ, അല്ലെങ്കിൽ താമര വളർത്താം. അലങ്കാര മത്സ്യങ്ങളും ആകർഷണീയമാണ്....

കിച്ചൻ ഗാർഡൻ...

അടുക്കളയിൽനിന്ന് കയ്യെത്തുന്ന ദൂരത്തായിരിക്കണം കിച്ചൻ ഗാർഡൻ. സ്ഥലപരിമിതി ഉണ്ടെങ്കിൽ സംഭവം ടെറസ്സിലേക്ക് മാറ്റാം. വെണ്ടയ്ക്ക, ചീര, വഴുതനങ്ങ, കറിവേപ്പില, മല്ലി, ലെറ്റ്യൂസ് എന്നിവയ്ക്കെല്ലാം കിച്ചൻ ഗാർഡനിൽ ഇടം കൊടുക്കാം....

ടെറസ് ഗാർഡൻ...

ടെറസ് ഗാർഡൻ ചെയ്യുന്ന വീടുകളിലെ പ്രധാന പ്രശ്നം ചോർച്ചയാണ്. ചെടികൾക്കൊഴിക്കുന്ന വെള്ളം പിന്നീട് റൂഫിലേക്ക് കിനിഞ്ഞിറങ്ങി ചോർച്ചയാകുന്നത് കാരണമാണ് പലരും ടെറസ് ഗാർഡൻ ചെയ്യാൻ മടിക്കുന്നത്. എന്നാൽ ഇപ്പോൾ ഈ പ്രശ്നത്തിനും പ്രതിവിധിയായിരിക്കുന്നു. ‘ഗ്രീൻ റൂഫ്’ എന്ന പുത്തൻ ആശയം ടെറസ് ഗാർഡന് കൂടുതൽ സാധ്യതകൾ നൽകുന്നു. റൂഫിന് തൊട്ടു മുകളിലായി മറ്റൊരു റൂഫ് നൽകുന്നതിനാണ് ഗ്രീന്‍ റൂഫിങ് എന്ന് പറയുന്നത്. ഈ രണ്ടാമത്തെ റൂഫിന്റെ മുകളിലാണ് ടെറസ് ഗാർഡൻ ഒരുക്കേണ്ടത്. ചോർച്ചയെ തടുക്കുന്ന ഈ ഇരട്ടപ്പാളി റൂഫിങ് പക്ഷേ ചെലവു കൂടിയ പരിപാടിയാണ്. അസ്ഥിക്കു പിടിച്ച കൃഷിപ്രേമമുള്ളവരാണ് ഗ്രീൻ റൂഫിന് തയ്യാറാകുന്നത്

കോംപൗണ്ട് വോൾ

ലാൻഡ്സ്കേപ് വീട്ടുകാർക്കും അതിഥികൾക്കും മാത്രം ആസ്വദിക്കാവുന്നതാണെങ്കിൽ ചുറ്റുമതിൽ ഭംഗിയാക്കിയാൽ വഴിയാത്രക്കാര്‍ക്കും നല്ലൊരു കാഴ്ചയാകും. മതിലിനു മുകളിലേക്ക് ഗ്രിൽ അല്ലെങ്കിൽ മെഷ് പിടിപ്പിച്ചാൽ ക്രീപ്പറുകൾ പടർത്തിയിടാം. ബൊഗെയ്ൻവില്ല, തംബർജിയ, ഹോപ്പേണിയ, ടെക്കോമ എന്നിവയെല്ലാം ചുറ്റുമതിലിന് ഭംഗിയേറ്റുന്ന ചെടികളാണ്. മതിലിന്റെ നിറവുമായി ഒത്തുപോകുന്നതായിരിക്കണം ഈ ചെടികൾ എന്നത് പ്രത്യേകം ശ്രദ്ധിക്കണം എന്നുമാത്രം..( Ref: Manorama)

Prof. John Kurakar