കുടിവെളള ക്ഷാമവും വരൾച്ചയും
നേരിടാൻ സർക്കാർ ജാഗ്രത പുലർത്തണം
കേരളത്തിൽ വരൾച്ചയും കുടിവെളള ക്ഷാമവും ഭയാനകമായ വിധം വർദ്ധിച്ചു കൊണ്ടിരിക്കുകയാണ് . . കഴിഞ്ഞ വർഷം ഇതേ കാലയളവിലേതിനെക്കാൾ ഉയർന്ന അന്തരീക്ഷ ഊഷ്മാവാണ്‌ സംസ്ഥാനത്ത്‌ പലയിടത്തും രേഖപ്പെടുത്തിയിട്ടുളളത്‌. പല സ്ഥലങ്ങളിലും സാധാരണയിലും രണ്ട്‌ ഡിഗ്രി സെൽഷ്യസ്‌ ഉയർന്ന ചൂടാണ്‌ അനുഭവപ്പെടുന്നത്‌. പല ജില്ലകളിലും അത്‌ ഇനിയും ക്രമാതീതമായി ഉയരുമെന്ന സൂചനയാണ്‌ കാലാവസ്ഥാ നിരീക്ഷകർ നൽകുന്നത്‌. വേനൽമഴയ്ക്കായി പതിവിലും ഏറെ കാത്തിരിക്കേണ്ടിവരുമെന്ന മൂന്നാര്റിയിപ്പുമുണ്ട്‌. ചൂടും വരൾച്ചയും കുടിവെളളക്ഷാമത്തിനും വൈദ്യുതി ക്ഷാമത്തിനും വഴിവെയ്ക്കുമെന്നും ഉത്തരവാദപ്പെട്ടവർ മൂന്നാര്റിയിപ്പ്‌ നൽകുന്നു. അത്തരമൊരു അടിയന്തിരാവസ്ഥയെ നേരിടാൻ യാതൊരു മുൻകരുതലും സർക്കാരിന്റെ ഭാഗത്തുനിന്നും ഇനിയും ഉണ്ടായിട്ടില്ല. ഇത്‌ ജനങ്ങളിൽ അസ്വസ്ഥതയും പരിഭ്രാന്തിയും സൃഷ്ടിച്ചിട്ടുണ്ട്‌. വേനലിനെ മുൻകൂട്ടിക്കണ്ട്‌ കുടിവെളളം ലഭ്യമല്ലാത്ത പ്രദേശങ്ങളിൽ ടാങ്കറുകളിൽ അത്‌ എത്തിക്കാൻ ആവശ്യമായ ഫണ്ട്‌ ഫെബ്രുവരി മാസത്തിൽ തന്നെ അനുവദിച്ചു നൽകാറുണ്ട്‌. അത്‌ മാർച്ച്‌ പകുതി പിന്നിട്ടിട്ടും നൽകുകയോ അതേപ്പറ്റി ആലോചന പോലും നടത്തുകയോ ഉണ്ടായില്ല എന്നാണു അറിയുന്നത് .. എൽ നിനോ പ്രതിഭാസത്തിന്റെ പശ്ചാത്തലത്തിൽ ദുരന്തനിവാരണ വകുപ്പ്‌ നൽകിയ മൂന്നാര്റിയിപ്പിന്റെ വെളിച്ചത്തിൽ ബന്ധപ്പെട്ട മന്ത്രിമാരും ഉദ്യോഗസ്ഥരും ഏതെങ്കിലും കൂടിയാലോചന നടത്തിയതിന്റെ സൂചന പോലും ഇല്ലെന്നാണ്‌ അന്വേഷണത്തിൽ അറിയുന്നത്. കൊടും ചൂടിന്റെയും വരൾച്ചയുടെയും കുടിവെളളക്ഷാമത്തിന്റെയും പശ്ചാത്തലത്തിൽ ജനജീവിതത്തെ .ദുരിതത്തിലേയ്ക്ക്‌ തളളിവിടാതെ സത്വര നടപടി സ്വീകരിക്കാൻ സർക്കാർ സന്നദ്ധമാവണം. .കുടിവെളള ക്ഷാമത്തെ നേരിടാൻ ജില്ലാതലത്തിൽ ഇതിനുവേണ്ടി കളക്ടറുടെയും ബന്ധപ്പെട്ട വകുപ്പ്‌ മേധാവികളുടേയും ഗ്രാമ, ബ്ലോക്ക്‌, ജില്ലാ പഞ്ചായത്ത്‌ ഭാരവാഹികളുടേയും യോഗം വിളിച്ചുചേർക്കാൻ ഇനി കാലതാമസം പാടില്ല .ഉപയോഗശൂന്യവും വൃത്തിഹീനവുമായ കിണറുകൾ, കുളങ്ങൾ, മറ്റ്‌ ജലസംഭരണികൾ എന്നിവ ജനപങ്കാളിത്തത്തോടെ സത്വരം ഉപയോഗ്യമാക്കണം. തോടുകളുടെയും പുഴകളുടെയും ഇന്നത്തെ ശോച്യാവസ്ഥ പരിഹരിച്ച്‌ ജനങ്ങൾക്ക്‌ ഉപയോഗിക്കാൻ പറ്റുന്ന ജലസ്രോതസുകളാക്കി മാറ്റാനുളള അവസരമായി ഈ പ്രതിസന്ധിയെ മാറ്റാൻ തദ്ദേശ സ്വയംഭരണ സ്ഥാപനങ്ങൾക്ക്‌ കഴിയണം. പ്രാദേശിക സഹകരണ ബാങ്കുകളും സംഘങ്ങളും അടക്കം ധനകാര്യ സ്ഥാപനങ്ങളിൽ സാമൂഹ്യ ഉത്തരവാദിത്തം നിറവേറ്റാൻ തയാറാകണം .പ്രതിപക്ഷവും ഉത്തരവാദിത്വത്തിൽ നിന്ന് പിന്മാറരുത്‌ .
പ്രൊഫ്‌. ജോൺ കുരാക്കാർ .
No comments:
Post a Comment