കാന്‍സര്‍ പിടിപെടാതിരിക്കാനുള്ള മാർഗ്ഗങ്ങൾ ഉടനടി ആരായണം
മനുഷ്യൻറെ ആരോഗ്യവും സമ്പത്തും നശിപ്പിച്ച്‌ വ്യക്‌തിയേയും പിന്നീട്‌ കുടുംബത്തേയും തകർക്കുന്ന ഒരു മഹാവ്യാധിയായി കാന്‍സര്‍ പടര്‍ന്നു പന്തലിച്ചു കഴിഞ്ഞു. പ്രതിവര്‍ഷം 50, 000 ത്തിലധികം പുതിയ കാന്‍സര്‍ രോഗികള്‍ കേരളത്തില്‍ ഉണ്ടായിവരുന്നുണ്ടെന്നാണ് കണക്ക് .കേരളത്തിൽ പത്തുശതമാനം വരുന്ന ജനത കാന്‍സറിന്‌ കീഴടങ്ങേണ്ടിവരുന്ന ദുരന്തസാഹചര്യത്തിലേക്കാണ്‌ നാം നടന്നടുക്കുന്നത്‌. സർക്കാരും ആരോഗ്യ മേഖലയും യുദ്ധകാലാടിസ്ഥാനത്തിൽ ഈ വിപത്തിനെ നേരിടാൻ തയാറാകണം .കാന്‍സര്‍ വ്യാപനം പഠിക്കാനും പ്രതിരോധ മാര്‍ഗങ്ങള്‍ ആവിഷ്‌കരിക്കാനുമായി സംസ്‌ഥാന സര്‍ക്കാര്‍ വിദഗ്‌ധ സമിതിയെ നിയോഗിക്കുമെന്നു സംസ്‌ഥാന ആരോഗ്യവകുപ്പു മന്ത്രി നിയമസഭയില്‍ നല്‍കിയ ഉറപ്പ്‌ ആശ്വാസം പകരുന്നതാണ് . കാന്‍സര്‍ ചികിത്സയ്‌ക്കായി വന്‍ ചെലവ്‌ വരുന്നത്‌ സാധാരണക്കാര്‍ക്ക്‌ താങ്ങാന്‍ കഴിയുന്നതല്ല. സര്‍ക്കാര്‍ മെഡിക്കല്‍ കോളജുകള്‍ ഇതിനായി കൂടുതല്‍ സജ്‌ജമാകേണ്ടിയിരിക്കുന്നു. പൊതുമേഖലയിലെ കാന്‍സര്‍ ചികിത്‌സാ കേന്ദ്രമായ ആര്‍.സി.സിയും കൂടുതല്‍ നവീകരിക്കപ്പെടണം. ഇതുപോലെ കൂടുതല്‍ സെന്ററുകള്‍ സംസ്‌ഥാനത്തിന്റെ വിവിധയിടങ്ങളില്‍ സ്‌ഥാപിക്കുകയും വേണം.
കാന്‍സര്‍ പിടിപെടാതിരിക്കാന്‍ മാര്‍ഗങ്ങള്‍ കണ്ടുപിടിക്കേണ്ടിയിരിക്കുന്നു . കാന്‍സറിനു ഹേതുവാകുന്ന കാര്യങ്ങള്‍ ലോകാരോഗ്യ സംഘടന ചൂണ്ടിക്കാട്ടിയിട്ടുണ്ട്‌; അമിതവണ്ണം, ആവശ്യത്തിനു പഴങ്ങളും പച്ചക്കറികളും കഴിക്കാത്തത്‌, ശാരീരികാധ്വാനമില്ലായ്‌മ, മദ്യപാനം, പുകവലി, വിഷമയമായ പച്ചക്കറികള്‍, കീടനാശിനികള്‍, രാസവളങ്ങള്‍ എന്നിവയിലൊക്കെ കാന്‍സറിനു കാരണമാകുന്ന ഘടകങ്ങളുണ്ട്‌. പച്ചക്കറികളിലും മറ്റു ഭക്ഷ്യവസ്‌തുക്കളിലും കീടനാശിനിയുടെ അളവ്‌ പരിശോധിക്കുന്ന സംവിധാനങ്ങളും ശക്‌തമാകേണ്ടിയിരിക്കുന്നു. സാമൂഹിക വികസന സൂചികകള്‍ വച്ചു നോക്കിയാല്‍ കേരളം ഇന്നു വികസിത രാജ്യങ്ങള്‍ക്കൊപ്പമാണ്‌. പാശ്‌ചാത്യവത്‌കരിക്കപ്പെട്ട ജീവിതശൈലികളും ആഹാരരീതിയും നാം പിന്തുടരുന്നുണ്ട്‌. അതും കാന്‍സര്‍ ബാധയ്‌ക്കു കാരണമാകുമെന്ന്‌ വിദഗ്‌ധര്‍ ചൂണ്ടിക്കാട്ടുന്നു.കാന്‍സറിനെ പ്രതിരോധിക്കാൻ സര്ക്കാരിനോടൊപ്പം ആരോഗ്യമേഖലയും സന്നദ്ധ സംഘടനകളും കൈകോർക്കണം .ആയൂർവേദം, അലോപ്പതി, ഹോമിയോപതി തുടങ്ങിയ ചികിത്സയിലെ അറിവുകൾ ചർച്ചചെയ്യണം . പ്രതിരോധിക്കാനുള്ള മാർഗ്ഗങ്ങളെ കുറിച്ചു സാധാരണ ജനങ്ങളെ ബോധവൽക്കരിക്കണം .
പ്രൊഫ്‌. ജോണ്‍ കുരാക്കാർ
No comments:
Post a Comment