കാലാവസ്ഥയിൽ വരുന്ന മാറ്റങ്ങൾ തിരിച്ചറിയുക
വേനൽമഴയുടെ രൂക്ഷത കേരളം കണ്ടുകൊണ്ടിരിക്കയാണ് .കൊടുങ്കാറ്റും പേമാരിയും ശക്തമായ ഇടിമിന്നലും ഇക്കുറി കേരളം കണ്ട വേനൽമഴയുടെ പ്രത്യേകതയായിരുന്നു. ചുട്ടുപഴുത്ത് ദാഹാർത്തമായി കിടക്കുന്ന മണ്ണിന് ആശ്വാസവുമായാണ് മുൻകാലങ്ങളിൽ വേനൽ മഴ എത്തിയിരുന്നതെങ്കിൽ ഇത്തവണ ഭയാനകമായ അവസ്ഥയാണ് അത് പലഭാഗത്തും സൃഷ്ടിച്ചത്. കന്യാകുമാരിക്ക് സമീപം കടലിൽ രൂപംകൊണ്ട ശക്തമായ ന്യൂനമർദ്ദമാണ് ഇത്തവണത്തെ അതിശക്തമായ വേനൽമഴയായി രൂപാന്തരം പ്രാപിച്ചത്.
വേനൽമഴ എല്ലാ വർഷവും ഉണ്ടാകുന്നത് കടലിലെ ന്യൂനമർദ്ദത്തിൽ നിന്നുതന്നെയാണ്. ഇത്തവണ അതിന്റെ രൂക്ഷത സംഹാരാത്മകമായി മാറുകയായിരുന്നു. ഏഴ് മുതൽ 13 സെന്റീമീറ്റർവരെ മഴ ഉണ്ടാകുമെന്നാണ് പ്രവചനം. അതോടൊപ്പം വീശിയടിക്കുന്ന കാറ്റിന് 55 കിലോമീറ്റർ വരെ വേഗതയുണ്ടാകാം. ഇടിമിന്നൽ ഈ വർഷം പതിവിൽ കൂടുതലായിരുന്നു. സംസ്ഥാനത്ത് പല ഭാഗത്തും അതു മരണം വിതച്ചു. ഇത്തരം പ്രകൃതിക്ഷോഭങ്ങൾ നേരിടാൻ നമ്മുടെ ഔദ്യോഗിക സംവിധാനങ്ങൾ എത്രമാത്രം അപര്യാപ്തമാണെന്ന് ഈ ദിനങ്ങളിൽ കേരളം വീണ്ടും അറിയുകയാണ്. ഐഎസ്ആർഒ തൊടുത്തുവിട്ട ഉപഗ്രഹനിരീക്ഷണങ്ങളിലൂടെ 48 മണിക്കൂർ മുൻകൂട്ടി ഇത്തരം പ്രതിഭാസങ്ങൾ അറിയാൻ ഇപ്പോൾ കഴിയും. എന്നാലും അവയെ ഫലപ്രദമായി നേരിടാനുള്ള സംവിധാനങ്ങളോ സന്നാഹങ്ങളോ കേരളത്തിൽ ഇല്ലെന്നുള്ള സത്യം നമ്മെ തുറിച്ചുനോക്കുന്നു.
വർഷത്തിൽ പകുതിയോളം മഴ പെയ്യുന്ന പ്രദേശമാണ് കേരളം. എന്നിട്ടും ഒരു മഴവന്നാൽ ജനജീവിതം സ്തംഭിക്കുന്നു. റോഡുകളെല്ലാം അപ്പോൾ തോടുകളായി മാറും. എങ്ങോട്ടും നീങ്ങാനാകാതെ ജനങ്ങൾ വലയും. നമ്മുടെ റോഡുകൾ പണിതവർ മഴവെള്ളം ഒഴുകിപ്പോകാൻ ഫലവത്തായ വഴിവേണമെന്ന് അറിയില്ലാത്തവരായിരുന്നോ? ടൗൺ പ്ളാനിങിന്റെയും റോഡ് നിർമാണത്തിന്റെയും ഭാവനാശൂന്യത കാണണമെങ്കിൽ മഴക്കാലത്ത് കേരളത്തിലെ റോഡുകൾ നോക്കിയാൽ മതിയാകും. വെള്ളം ഒഴുകിപ്പോകാനുള്ള എല്ലാ വഴികളും ഓടകളും ചാലുകളും തോടുകളും വയലുകളും തണ്ണീർത്തടങ്ങളുമെല്ലാം നികത്തുന്നതാണ് വികസനമെന്നു കണ്ടുപിടിച്ചവർ ഇവിടെയുണ്ട്. അവരുടെ വിവരക്കേടിന്റെ സാക്ഷ്യപത്രമാണ് മഴക്കാലത്തെ റോഡുകളും നഗരചത്വരങ്ങളുമെല്ലാം.
ആഗോളതാപനത്തിന്റെ കാലത്താണ് ഇനി മനുഷ്യർ ജീവിക്കേണ്ടത്. എല്ലാ പ്രകാരത്തിലും അതിനു സജ്ജമാകാൻ സമൂഹത്തെ പഠിപ്പിക്കേണ്ടതുണ്ട്. ഇത്തവണത്തെ വേനൽമഴ ഇത്രയും രൂക്ഷമായതിന്റെ കാരണം ആഗോളതാപനത്തിന്റെ പ്രത്യാഘാതങ്ങളാണ്. പരിസ്ഥിതിവാദികളെ ശകുനംമുടക്കികളായി കാണുന്നവരെല്ലാം ഇത്തരം സത്യങ്ങൾ ഇപ്പോഴല്ലെങ്കിൽ പിന്നെ എപ്പോഴാണ് മനസിലാക്കുക? കാലാവസ്ഥാ നിരീക്ഷണ കേന്ദ്രത്തിന്റെ ഭൂപടങ്ങളിൽ പണ്ടൊന്നും വേനൽമഴ അടയാളപ്പെടുത്തിയിട്ടില്ലാത്ത ഭൂപ്രദേശങ്ങൾ ഇപ്പോൾ വേനൽമഴയുടെ കെടുതികൾ അനുഭവിക്കുന്നു. കാലാവസ്ഥയുമായി ബന്ധപ്പെട്ട സൂക്ഷ്മമായ പഠനങ്ങളും നിരന്തരബോധവൽക്കരണവും അടിയന്തരമായി നടക്കേണ്ടതാണ്. സ്ഥൂലമായ (ാമരൃീ) നിരീക്ഷണങ്ങൾകൊണ്ട് ഈ ലക്ഷ്യം കാണാനാവില്ല. സൂക്ഷ്മ (ാശരൃീ) മായ വിശകലനങ്ങളാണ് ഉണ്ടാകേണ്ടത്. അതിനുള്ള കർമപദ്ധതി ആവിഷ്കരിക്കേണ്ട സർക്കാർ അതിൽ വീഴ്ചവരുത്തുകയാണ്. കാലാവസ്ഥാ ശാസ്ത്രം ലോകത്ത് ഒട്ടേറെ വികസിച്ചത് ആഗോളതാപനത്തിന്റെ വെല്ലുവിളികളുടെ പശ്ചാത്തലത്തിലാണ്. ആ വെല്ലുവിളി ഇന്ത്യയും കേരളവും വൻതോതിൽ നേരിടുന്നുണ്ട്. നമ്മുടെ സർവകലാശാലകൾക്കും ഔദ്യോഗിക സന്നാഹങ്ങൾക്കും ഗവേഷകർക്കും ഈ രംഗത്ത് അനിഷേധ്യമായ പങ്കുവഹിക്കാൻ കഴിയും. സമൂഹത്തിന്റെ ആവശ്യങ്ങൾ മുൻനിർത്തി ഗവേഷണങ്ങൾക്ക് അവരെ സജ്ജമാക്കേണ്ടത് സർക്കാർ തന്നെയാണ്. എന്നാൽ നമ്മുടെ നാട്ടിലെ ഗവേഷണം മിക്കവാറും ഗവേഷകന്മാരുടെ മനോധർമത്തെമാത്രമാണ് ആശ്രയിക്കുന്നത്. ആഗോളതാപനം കെട്ടഴിച്ചുവിടുന്ന വേനൽമഴ അടക്കമുള്ള പ്രകൃതിപ്രതിഭാസങ്ങളെ നേരിടാനുള്ള ഗവേഷണ പ്രവർത്തനങ്ങളാണ് ഇവിടെ അടിയന്തരമായി നടക്കേണ്ടത്. നമ്മുടെ വികസനസങ്കൽപങ്ങളിലും ജീവിതശൈലികളിലും വരുത്തേണ്ട മാറ്റങ്ങളും ചർച്ചാവിഷയമാകണം.
60 കോടിയിൽപ്പരം രൂപയുടെ കൃഷിനാശമാണത്രെ ഇതുവരെ ഉണ്ടായത്. 2.19 കോടി രൂപയുടെ വീടുകൾ പൂർണമായി തകർന്നു. ഭാഗികമായി തകർന്നത് 4.09 കോടി രൂപയുടേതും. ഇതെല്ലം സർക്കാർ കണക്കാണ്. വസ്തുത ഇതിനേക്കാളേറെയായിരിക്കും. ഈ മനുഷ്യർക്ക് തൃപ്തികരമായ നഷ്ടപരിഹാരം നൽകാൻ കഴിയണം. പ്രകൃതിക്ഷോഭത്തിന്റെ പട്ടികയിൽ ഏതെല്ലാം ദുരന്തങ്ങൾപ്പെടുത്താം എന്നതിനെക്കുറിച്ചുള്ള ചർച്ചകൾ ഇപ്പോഴും പൂർത്തിയായിട്ടില്ല. അത്തരം കഥയില്ലാത്ത ചർച്ചകൾ അവസാനിപ്പിച്ച് നഷ്ടം നേരിട്ട എല്ലാവരേയും സഹായിക്കാൻ ഗവൺമെന്റ് അമാന്തം കാണിക്കരുത്.
പ്രൊഫ്. ജോണ് കുരാക്കാർ
No comments:
Post a Comment