കേരള സര്‍വ്വകലാശാലയില്‍ നടന്ന അസിസ്റ്റന്റ് ഗ്രേഡ് നിയമനം അടിമുടി അഴിമതിയിലും പക്ഷപാതത്തിലുമാണു നടന്നതെന്നു നിയമസ്ഥാപനങ്ങള്‍ ഒന്നിലധികം തവണ തെളിവുകള്‍ നിരത്തി പ്രസ്താവിച്ചതാണ്.മാന്യമായി കരുതിയിരുന്ന വൈസ് ചാന്‍സലര്‍, പ്രോ വൈസ് ചാന്‍സലര്‍ പദവികള്‍ കുറേ നാളുകളായി രാഷ്ട്രീയക്കാരുടെ പിണിയാളുകള്‍ക്കാണു നല്‍കാറ്.അങ്ങനെ ആ സ്ഥാനങ്ങളില്‍ കയറിപ്പറ്റുന്നവര്‍ സ്വാഭാവികമായി തങ്ങളെ ആ സ്ഥാനങ്ങളിലെത്തിച്ച മൂന്നാംകിട രാഷ്ട്രീയക്കാരന്റെ ചെല്ലം ചുമക്കുന്നവരായി ചുരുങ്ങിയാല്‍ അതിശയിക്കാനില്ല.
സെനറ്റിലും സിന്‍ഡിക്കേറ്റിലുമൊക്കെ കയറിക്കൂടുന്നവരും രാഷ്ട്രീയക്കാരുടെ ചട്ടുകങ്ങളായിരിക്കും.ഇത്തരത്തിലുള്ളവര്‍ക്ക് നാടിന്റെ ഉന്നത വിദ്യാഭ്യാസമേഖലയെ പോഷിപ്പിക്കുന്നതിനോ നിലനിര്‍ത്തുന്നതിനോ അല്ല, ആ സ്ഥാപനം ഉപയോഗിച്ച് കോടികള്‍ കീശയിലാക്കാന്‍ മാത്രമായിരിക്കും താല്‍പര്യം.40,000 പേര്‍ എഴുതിയ ഒരു പരീക്ഷയുടെ ഹാജര്‍ രേഖ കാണാനില്ല.
അതീവരഹസ്യമായി സൂക്ഷിക്കേണ്ട പരീക്ഷയുടെ ഒഎംആര്‍ പേപ്പര്‍ കാണുന്നില്ല.100 മാര്‍ക്കിനു നടത്തിയ പരീക്ഷയുടെ മാര്‍ക്ക് പരീക്ഷയ്ക്കു ശേഷം 75 ആയി കുറയ്ക്കുന്നു.മുഖാമുഖത്തിന് 25 മാര്‍ക്ക് .എഴുത്തു പരീക്ഷയില്‍ താഴെത്തട്ടില്‍ നിന്നവര്‍ റാങ്ക്‌ലിസ്റ്റില്‍ ആദ്യസ്ഥാനങ്ങളില്‍!ഇത്തരം നെറികെട്ട പ്രവര്‍ത്തനങ്ങളുടെ ഉദ്ദേശം വളരെ വ്യക്തം.
സര്‍വ്വകലാശാല ഭരണാധികാരികളുടെയും സിന്‍ഡിക്കേറ്റ് അംഗങ്ങളുടേയും രാഷ്ട്രീയ ദല്ലാളന്മാരുടേയും പിണിയാളുകള്‍ക്ക് ഉദ്യോഗം ഉറപ്പിക്കുന്നതിന്റെ പേരില്‍ കോടികള്‍ സമ്പാദിക്കുക. പാവപ്പെട്ട മിടുക്കരായ ഉദ്യോഗാര്‍ത്ഥികള്‍ തഴയപ്പെടുക. സാക്ഷര കേരളത്തിന് അഭിമാനിക്കാന്‍ ഇനി എന്തുവേണം!
പ്രൊഫ്‌. ജോണ്‍ കുരാക്കാര്‍
No comments:
Post a Comment