കുത്തിവയ്പുകൾക്ക് തടസ്സം നിൽക്കരുത്
രോഗപ്രതിരോധത്തിനായുള്ള കുത്തിവയ്പുകൾക്ക് തടസ്സം നിൽക്കുന്നത് സാക്ഷരകേരളത്തിനു ഭൂഷണമല്ല . രോഗപ്രതിരോധത്തിനായുള്ള കുത്തിവയ്പുകൾ ആധുനിക വൈദ്യശാസ്ത്രത്തിന്‍റെ വലിയ നേട്ടമാണ്. പല മാരക രോഗങ്ങളെയും അകറ്റിനിർത്തുന്നതിൽ പ്രതിരോധ കുത്തിവയ്പുകൾക്ക് വലിയ പങ്കാണ് ഉള്ളത് . മാതൃ-ശിശു ആരോഗ്യ സംരക്ഷണരംഗത്തു കേരളത്തിന് അന്താരാഷ്‌ട്രനിലവാരം പുലർത്താൻ സാധിക്കുന്നതു പ്രതിരോധ മരുന്നുകളോടും വാക്സിനേഷൻ പരിപാടികളോടും നാം കാട്ടിയ സഹകരണ മനോഭാവംകൊണ്ടുകൂടിയാണ്..ശാസ്ത്രീയ സത്യങ്ങളെയും ഗവേഷണങ്ങളെയും പാഴ്‌മുറം കൊണ്ട് മറയ്ക്കാൻ ശ്രമിക്കരുത് .കേരളത്തെ വീണ്ടും അന്ധവിശ്വാസത്തിലേക്കു കൊണ്ടുപോകരുത് .
മതത്തിന്‍റെയോ വിശ്വാസത്തിന്‍റെയോ പേരിൽ ജനങ്ങളെ ആശയക്കുഴപ്പത്തിലാക്കാൻ ശ്രമിക്കരുത് .അടുത്തകാലത്തു മീസൽസ്-റൂബല്ല(എംആർ) കുത്തിവയ്പിനെതിരേ വ്യാപകമായ പ്രചാരണം കേരളത്തിൽ നടക്കുന്നു. ജനങ്ങളെ തെറ്റിദ്ധരിപ്പിക്കുന്നവരുടെ ഗൂഢതന്ത്രത്തിൽ വീണുപോകുന്നവർ വരുംതലമുറകളുടെ ആരോഗ്യത്തെ നശിപ്പിക്കുകയാണ് .വസൂരിയും മലന്പനിയും പോലുള്ള രോഗങ്ങൾ പണ്ടു കേരളത്തിൽ എത്രയോ പേരുടെ ജീവനപഹരിച്ചു. പലകാലത്തും കൂട്ടമരണങ്ങൾതന്നെയുണ്ടായി. പോളിയോ രോഗം അനേകം പേരുടെ ജീവിതം ദുരിതമയമാക്കി. ആ രോഗങ്ങളെ പ്രതിരോധിക്കാനുള്ള മരുന്നുകൾ എത്തിയതിനുശേഷം അവയിൽ ചില രോഗങ്ങൾ നമ്മുടെ നാട്ടിൽനിന്ന് അപ്രത്യക്ഷമായി.ഇതൊക്കെ ജനങ്ങൾ മറന്നുപോയത് കഷ്‌ടം തന്നെയാണ് . ചികിത്സ തേടുന്നതു വിശ്വാസപരമായി ശരിയല്ലെന്നു കരുതുന്ന ചില മതവിഭാഗങ്ങളുണ്ട്. വിലപ്പെട്ട പല ജീവനുകളും അങ്ങനെ നഷ്‌ടമായി. ഒരു ജനാധിപത്യരാജ്യത്ത് ആർക്കും തന്‍റെ മതവിശ്വാസം പുലർത്താൻ സ്വാതന്ത്ര്യമുണ്ട്. എന്നാൽ ജനങ്ങളുടെ -പ്രത്യേകിച്ചു ഭാവി തലമുറയുടെ- ആരോഗ്യം സമൂഹത്തിനു പ്രധാനപ്പെട്ടതാണ്. പൗരന്മാർ അരോഗ്യമുള്ളവരായി വളരേണ്ടതു സർക്കാരിന്‍റെകൂടി ഉത്തരവാദിത്വമാണ്.
കുത്തിവയ്പിനെതിരേ തെറ്റായ പ്രചാരണം നടത്തുന്നവർക്കെതിരേ കർശന നടപടി സ്വീകരിക്കാൻ സർക്കാർ തയാറാകണം ജനങ്ങളെ തെറ്റായ വിശ്വാസങ്ങളിൽ നിന്ന് മോചിപ്പിക്കാൻ മാധ്യമങ്ങളും സോഷ്യല്മീഡിയകള്ക്കും വലിയ പങ്കാണുള്ളത് . പ്രതിരോധ കുത്തിവയ്പിനെതിരേ പ്രചാരണം നടത്തുന്ന നവമാധ്യമങ്ങളെ നിലക്കുനിർത്താൻ നമുക്ക് കഴിയണം .രാജ്യത്തെ ജനസംഖ്യ കുറയ്ക്കാനും കുട്ടികളിൽ ഓട്ടിസവും മാനസിക പ്രശ്നങ്ങളും ഉളവാക്കാനുമുള്ള അന്താരാഷ്‌ട്ര ഗൂഢാലോചനയാണു കുത്തിവയ്പു യജ്ഞത്തിനു പിന്നിലെന്നും മറ്റുമാണ് നവമാധ്യങ്ങൾ പ്രചരിപ്പിക്കുന്നത്. കുറച്ചുപേരെയെങ്കിലും തെറ്റിദ്ധരിപ്പിക്കാൻ ഇവർക്കു കഴിയും. ആധുനിക വൈദ്യശാസ്ത്രത്തിന്‍റെ നേട്ടങ്ങളെ സാധാരണ ജനങ്ങളിൽ എത്തിക്കാൻ ശ്രമിക്കുകയാണ് വേണ്ടത് .അന്ധവിശ്വാസങ്ങളും അബന്ധധാരണകളും സമൂഹത്തിൽ പ്രചരിപ്പിക്കരുത് .
പ്രൊഫ്. ജോൺ കുരാക്കാർ
No comments:
Post a Comment