അപൂർവ ജ്യോതിശാസ്ത്ര പ്രതിഭാസമായ രക്തചന്ദ്ര പരന്പരയിലെ ആദ്യ ഉദയം ഇത്തവണ വിഷുവിന്. നാല് സന്പൂർണ ചന്ദ്രഗ്രഹണങ്ങൾ അടങ്ങുന്ന ടെട്രാഡ് (ചതുർഗ്രഹണം) എന്ന പ്രതിഭാസവും ഈ നൂറ്റാണ്ടിൽ എട്ടു തവണ സംഭവിക്കുമെന്ന് ശാസ്ത്ര പ്രവചനം.
സന്പൂർണ ചന്ദ്രഗ്രഹണത്തോടൊപ്പം ചന്ദ്രൻ ചുവക്കുന്ന പ്രതിഭാസം (Blood Moon) ഏപ്രിൽ 14, 15 തിയതികളിൽ ദൃശ്യമാകും. ക്രൈസ്തവ വിശ്വാസമനുസരിച്ച് നാശത്തിന്റെ ദിനങ്ങളെയാണ് രക്തചന്ദ്രൻ വിളംബരം ചെയ്യുന്നത്. ബൈബിൾ വാചകത്തിൽ പറയുന്നത് ഇങ്ങനെ: ദൈവത്തിന്റെ മഹത്തായതും ഭയാനകവുമായ ദിവസം വരുന്നതിനുമുന്പ് സൂര്യൻ ഇരുണ്ടുതുടങ്ങും, ചന്ദ്രൻ ചോരയുടെ നിറമണിയും. ജൂതകലണ്ടറിലെ രണ്ട് പ്രധാന ദിനങ്ങളിൽ പൂർണ ചന്ദ്രഗ്രഹണം സംഭവിക്കുന്നതും അശുഭമാണെന്നാണ് ഇവരുടെ പക്ഷം. ഈ ദിനങ്ങളിൽ വൻപ്രകൃതിക്ഷോഭമുണ്ടാകുന്നത് സൂചിപ്പിക്കുന്ന പരാമർശങ്ങളും ബൈബിളിലുണ്ട്.
ഇത്തരം അന്ധവിശ്വാസങ്ങളോട് വിയോജിക്കുന്ന ശാസ്ത്രലോകം പക്ഷേ അതീവ താല്പര്യത്തോടെയാണ് രക്തചന്ദ്രനെയും ടെട്രാഡിനെയും വീക്ഷിക്കുന്നത്.
2014 ഏപ്രിൽ, ഒക്ടോബർ, 2015 ഏപ്രിൽ, സെപ്റ്റംബർ എന്നിവയാണ് സന്പൂർണമായ ചതുർ ചന്ദ്രഗ്രഹണങ്ങൾ അരങ്ങേറുന്ന ദിനങ്ങൾ. ഇതിൽ ആദ്യത്തേതുതന്നെ രക്തചന്ദ്രനായി മാറുന്നതും അപൂർവം. ചന്ദ്രനും സൂര്യനുമിടക്ക് ഭൂമി പ്രത്യക്ഷപ്പെടുകയും ഭൂമിയുടെ നിഴൽ ചന്ദ്രനെ മറയ്ക്കുകയും ചെയ്യുന്നതാണ് ചന്ദ്രഗ്രഹണം. ഈ സമയത്ത് ഭൂമിയുടെ അന്തരീക്ഷത്തിലൂടെ കടന്നുപോകുന്ന സൂര്യരശ്മികൾ വക്രീകരിക്കപ്പെടുന്പോൾ അല്ലെങ്കിൽ മാർഗഭ്രംശം സംഭവിച്ച് ചന്ദ്രനിൽ പതിക്കുന്പോഴാണ് ചന്ദ്രൻ ചുവപ്പായി കാണുന്നത്. സൂര്യാസ്തമയത്തിൽ സംഭവിക്കുന്നതുതന്നെയാണിത്.
ശാസ്ത്രജ്ഞരുടെ കണക്കനുസരിച്ചുള്ള ചതുർഗ്രഹണങ്ങൾ 2001നും 2100-നുമിടയ്ക്ക് എട്ടുതവണയാണ് സംഭവിക്കുന്നത്. ഒരു നൂറ്റാണ്ടിൽ ഇത്രയും ചതുർഗ്രഹണങ്ങൾ സംഭവിക്കുന്നത് ചരിത്രത്തിലാദ്യമായാണ്. കഴിഞ്ഞ നൂറ്റാണ്ടിലെ അവസാനത്തെ ചതുർഗ്രഹണം 1967-68 വർഷങ്ങളിലാണ് സംഭവിച്ചത്. ഈ നൂറ്റാണ്ടിലെ ആദ്യത്തേത് 2003-04 വർഷങ്ങളിലും.
വിശ്വാസികളിൽ ആശങ്ക സൃഷ്ടിക്കുന്ന മറ്റൊരു പ്രതിഭാസം ഇന്നുണ്ടാകും. സൂര്യനും ഭൂമിയും ചൊവ്വയും നേർരേഖയിലെത്തുന്ന പ്രതിഭാസം എന്നാണ്. 778 ദിവസത്തിലൊരിക്കലാണ് ഇത് സംഭവിക്കുന്നത്. രക്തചന്ദ്രനുമുന്പ് ഇങ്ങനെ സംഭവിക്കുന്നത് അശുഭകരമാണെന്നാണ് വിശ്വാസികളുടെ പക്ഷം.
പ്രൊഫ്. ജോണ് കുരാക്കാർ
No comments:
Post a Comment