MARUTI ALTO CAR

മാരുതിയുടെ ഓൾട്ടോ

 ലോകത്തിലെ ഏറ്റവും വില്‌പനയുള്ള കാർ 

ലോകത്തിൽ എറ്റവുമധികം വില്‌പനയുള്ള ചെറുകാർ എന്ന സ്‌തുതി ഇനി മാരുതി സുസുക്കിയുടെ ഓൾട്ടോയ്‌ക്ക് സ്വന്തം. 2010ലും 2011ലും ഇതേ പട്ടം ഓൾട്ടോ ചൂടിയിരുന്നു. നിരവധി വാഹന നിർമ്മാതാക്കൾ ചെറിയ കാറുകളുമായി വിപണിയിൽ മത്സരത്തിനെത്തിയെങ്കിലും ഓൾട്ടോ സൃഷ്‌ടിച്ച വില്‌‌പന തരംഗത്തിന്റെ സമീപത്തെത്താൻ പോലും അവർക്ക് കഴിഞ്ഞില്ല. കഴിഞ്ഞ ഒമ്പത് വർഷമായി ഇന്ത്യയിൽ ചെറുകാറുകളുടെ വില്‌പനയിൽ മുൻനിരയിലുള്ള മോഡലാണ് ഓൾട്ടോ.

ജപ്പാനിലെ ടൊയോട്ട അക്വ,  ബ്രസീലിലെ ഫോക്‌സ്‌‌‌‌വാഗൺ ഗോൾ,  ജർമ്മനിയിലെ ഫോക്‌സ്‌‌വാഗൺ ഗോൾഫ് എന്നീ മോഡലുകളെ പിന്തള്ളിയാണ് ഇക്കുറിയും ലോകത്തിലെ ഏറ്റവും വില്‌പനയുള്ള കാറെന്ന പദവി ഓൾട്ടോ സ്വന്തമാക്കിയത്.
2013 കലണ്ടർ വർഷം 2.65 ലക്ഷം ഓൾട്ടോ കാറുകൾ മാരുതി സുസുക്കി വിറ്റഴിച്ചു. ടൊയോട്ട അക്വയുടെ  2.62 ലക്ഷവും ഫോക്‌സ്‌വാഗൺ ഗോളിന്റെ 2.55 ലക്ഷവും ഗോൾഫിന്റെ  2.44 ലക്ഷം മോഡലുകളാണ് ഇക്കാലയളവിൽ വിറ്റുപോയത്.

വാഹന വിപണി ഏറ്റവും മോശം അവസ്ഥയിൽ തുടരുമ്പോഴാണ് ഓൾട്ടോ ഈ നേട്ടം കൊയ്‌തതെന്നത് മികവിന്റെ മാറ്റു കൂട്ടുകയാണെന്ന് മാരുതി സുസുക്കി മാർക്കറ്റിംഗ് ആൻഡ് സെയിൽസ് സി.ഒ.ഒ  മയങ്ക്  പരേഖ് പറഞ്ഞു.  2000 സെപ്‌തംബറിൽ വിപണിയിലെത്തിയ ഓൾട്ടോയുടെ 24.51 ലക്ഷം മോഡലുകൾ ഇതിനകം ഇന്ത്യയിൽ തന്നെ വിറ്റഴിക്കപ്പെട്ടു.  ഓൾട്ടോയുടെ നവീകരിച്ച മോഡൽ 2012ലും വിപണിയിലെത്തി. ലിറ്ററിന്  22.74 കിലോമീറ്റർ മൈലേജാണ് ഓൾട്ടോ വാഗ്‌ദാനം ചെയ്യുന്നത്. സി.എൻ.ജി വേരിയന്റിന്   30.46 കിലോമീറ്ററാണ് അവകാശപ്പെടുന്ന മൈലേജ്. ഓൾട്ടോയുടെ കൊച്ചി എക്‌സ്‌ ഷോറൂം വില ₹ 2.60 ലക്ഷം

                                                            പ്രൊഫ്‌. ജോണ്‍ കുരാക്കാർ