ലോകസമാധാനം
ജനമനസ്സുകളിൽ നിറയണം
ലോകത്ത് ഇനിയുമൊരു യുദ്ധമുണ്ടാവരുതെന്നാണ് സമാധാനപ്രീയരായ ജനം ആഗ്രഹിക്കുന്നത് .അമേരിക്കൻ ജനതയുടെ ആഗ്രഹവും ഇതുതന്നെയാണ് . . പക്ഷേ, സിറിയയ്‌ക്കുമേല്‍ അമേരിക്കയുടെ ആക്രമണം ഏതു നിമിഷവും ഉണ്ടായേക്കാമെന്ന അമേരിക്കന്‍ പ്രസിഡന്റ്‌ ബറാക്‌ ഒബാമയുടെ തന്നെ സൂചനകള്‍ സമാധാനപ്രേമികളില്‍ കടുത്ത ആശങ്കയാണുളവാക്കിയിരുന്നത്‌. ആ ആശങ്കകള്‍ക്കിടയില്‍ ആശ്വാസത്തിന്റെ കുളിര്‍സ്‌പര്‍ശമായാണ്‌ കഴിഞ്ഞദിവസം ഒബാമയുടെ വാക്കുകള്‍ ജനങ്ങള്‍ ശ്രവിച്ചത്‌. സിറിയയ്‌ക്കെതിരേ തത്‌ക്കാലം യുദ്ധത്തിനില്ലെന്ന ഒബാമയുടെ വാക്കുകള്‍ ലോകമെമ്പാടുമുള്ള സമാധാനപ്രേമികള്‍ സ്വാഗതം ചെയ്യുകയും ചെയ്‌തു. പക്ഷേ, ഇന്നലെ പെട്ടെന്നു വീണ്ടും ഒബാമ വാക്കുമാറ്റി പറഞ്ഞത്‌ സ്വന്തം രാജ്യത്തെ ജനങ്ങളെയുള്‍പ്പെടെ വീണ്ടും ആശങ്കയിലാഴ്‌ത്തിയിരിക്കുന്നു.
സിറിയന്‍ പ്രസിഡന്റ്‌ ബാഷര്‍ അല്‍ അസദിന്റെ ഗവണ്‍മെന്റ്‌ തന്നെയാണ്‌ രാസായുധ പ്രയോഗം നടത്തിയതെന്നും ഈ ചെയ്‌തിയിലൂടെ സിറിയ രാജ്യാന്തര നിയമലംഘനം നടത്തിയിരിക്കുന്നുവെന്നും അതുകൊണ്ട്‌ സിറിയ്‌ക്കെതിരേ നിയന്ത്രിത സൈനികനടപടി വേണമെന്നുമാണ്‌ ഒബാമയുടെ പുതിയ ഭാഷ്യം. സിറിയയുടെ രാസായുധ പ്രയോഗത്തിനെതിരേ കണ്ണടച്ചാല്‍ അതു മറ്റ്‌ ആയുധപ്രയോഗങ്ങള്‍ക്കും കാരണമാകുമെന്നും ആഗോള സുരക്ഷയുടെ ചുക്കാന്‍ അമേരിക്കയുടെ കൈയിലാണെന്നും അതിനാലാണ്‌ അമേരിക്ക മറ്റു രാജ്യങ്ങളുടെ കാര്യത്തില്‍ ഇടപെടുന്നതെന്നുമാണ്‌ ഒബാമയുടെ ന്യായീകരണം. ഇന്നലെ അമേരിക്കന്‍ ജനതയെ അഭിസംബോധന ചെയ്യവേയാണ്‌ ഒബാമ തലേദിവസത്തെ വാക്കുകളില്‍നിന്ന്‌ മലക്കം മറിഞ്ഞത്‌. മാറ്റിമാറ്റി പറഞ്ഞ്‌ വ്യക്‌തതയൊട്ടുമില്ലാത്ത ഒരുതരം 'വേണ്ടണം' നയമാണ്‌ ഒബാമ ഇപ്പോള്‍ സ്വീകരിക്കുന്നത്‌.
ജനപ്രതിനിധിസഭയില്‍നിന്നും കാര്യമായ പിന്തുണയില്ലായിരുന്നു. ഈ സാഹചര്യത്തില്‍ സിറിയക്കെതിരേയുള്ള സൈനിക നടപടിയില്‍നിന്നു തന്ത്രപൂര്‍വം പിന്‍വാങ്ങാനുള്ള ഒരു മാര്‍ഗം റഷ്യയുടെ നിര്‍ദ്ദേശത്തില്‍നിന്ന്‌ ഒബാമയ്‌ക്കു വീണുകിട്ടുകയായിരുന്നു. അത്‌ ബുദ്ധിപൂര്‍വം ഉപയോഗിച്ചു. സിറിയന്‍ പ്രശ്‌നത്തില്‍ സുപ്രധാനമായ വഴിത്തിരിവുണ്ടായെന്ന്‌ പ്രഖ്യാപനം നടത്തുകയും ചെയ്‌തു. അതിനുശേഷമാണ്‌ ഇന്നലെ നയം മാറ്റിയത്‌.ഇപ്പോള്‍തന്നെ പതിനായിരക്കണക്കിനു സിറിയക്കാര്‍ അതിര്‍ത്തി രാജ്യങ്ങളിലേക്കു പലായനം ചെയ്‌തുകഴിഞ്ഞു. സ്വന്തം നാടും വീടും സ്വത്തുക്കളുമൊക്കെ വിട്ട്‌ അയല്‍രാജ്യങ്ങളില്‍ അഭയാര്‍ഥികളായെത്തി ദുരിതമനുഭവിക്കുന്നവരായിരിക്കുന്നു അവര്‍. കുഞ്ഞുങ്ങളും സ്‌ത്രീകളും വൃദ്ധരുമൊക്കെ യുദ്ധഭീഷണിയുടെ ബലിയാടുകളായി മാറിയിരിക്കുന്നു.
മലയാളികളടക്കം ആയിരക്കണക്കിന്‌ ഇന്ത്യക്കാരും സിറിയയിലുണ്ട്‌. അതുപോലെതന്നെ മറ്റു രാജ്യങ്ങളില്‍ നിന്നുള്ളവരും. അവരൊക്കെയും എല്ലാം ഉപേക്ഷിച്ച്‌ ആ രാജ്യം വിടേണ്ട അവസ്‌ഥയിലാണ്‌. ഭൂരിഭാഗംപേരും ജീവനെങ്കിലും കിട്ടട്ടെ എന്ന ആഗ്രഹത്തോടെ എല്ലാമുപേക്ഷിച്ച്‌ സ്വന്തം രാജ്യങ്ങളിലേക്കു മടങ്ങുകയാണ്‌.
പ്രൊഫ്‌. ജോണ്‍ കുരാക്കാർ
No comments:
Post a Comment