യാത്രക്കാരെ
വലയ്ക്കുന്ന
എയര്‍
ഇന്ത്യ
കേരളത്തില്‍നിന്ന് ഗള്‍ഫിലേക്കുള്ള 11 സര്‍വീസുകള്‍
റദ്ദാക്കിക്കൊണ്ട് എയര്‍ ഇന്ത്യ വീണ്ടും യാത്രക്കാരെ വിഷമത്തിലാക്കി.
വിവിധകോണുകളില്‍നിന്നുയരുന്ന പ്രതിഷേധങ്ങള്‍ അവഗണിച്ച് എയര്‍ ഇന്ത്യ തുടരുന്ന
നിഷേധാത്മകമായ സമീപനം ആ കമ്പനിയുടെ ഉദ്ദേശ്യശുദ്ധിയില്‍ത്തന്നെ സംശയമുണ്ടാക്കുന്നു.
ഒക്ടോബര്‍ രണ്ടാമത്തെ ആഴ്ചവരെയുള്ള ചില സര്‍വീസുകളാണ് ഇപ്പോള്‍
റദ്ദാക്കിയിരിക്കുന്നത്. തിരുവനന്തപുരത്തുനിന്ന് ദുബായിലേക്കുള്ള മൂന്നും ഷാര്‍ജയിലേക്കുള്ള
രണ്ടും എയര്‍ ഇന്ത്യ എക്‌സ്പ്രസ് സര്‍വീസുകള്‍ റദ്ദാക്കിയവയില്‍ ഉള്‍പ്പെടുന്നു.
കോഴിക്കോട്ടുനിന്ന് ദമാമിലേക്കുള്ള മൂന്ന് സര്‍വീസുകളും റദ്ദാക്കിയിട്ടുണ്ട്.
കൊച്ചിയില്‍നിന്ന് കുവൈത്തിലേക്കുള്ള ഒരു എയര്‍ ഇന്ത്യ എക്‌സ്പ്രസ് സര്‍വീസും
റിയാദിലേക്കുള്ള രണ്ട് എയര്‍ ഇന്ത്യ സര്‍വീസുകളുമാണ് റദ്ദാക്കിയത്.
മുന്നറിയിപ്പില്ലാതെ സര്‍വീസുകള്‍ റദ്ദാക്കുമ്പോള്‍ യാത്രക്കാര്‍ക്കുണ്ടാകുന്ന
ബുദ്ധിമുട്ടുകള്‍ ഊഹിക്കാവുന്നതേയുള്ളു. എയര്‍ ഇന്ത്യ എക്‌സ്പ്രസിന്റെ
തിരുവനന്തപുരം-ഷാര്‍ജ സര്‍വീസ് റദ്ദാക്കിയപ്പോള്‍ യാത്രക്കാര്‍ വിമാനത്താവളത്തില്‍
ബഹളം വെച്ചത് സ്വാഭാവികമാണ്. രാവിലെ എത്തിയപ്പോള്‍ മാത്രമാണ് ഈ വിമാനം റദ്ദാക്കിയ
കാര്യം അറിയുന്നതെന്ന് യാത്രക്കാരില്‍ പലരും പരാതിപ്പെട്ടു. ഹജ്ജ്‌സര്‍വീസ് നടത്താന്‍ വിമാനങ്ങള്‍ കൊണ്ടുപോയതാണ് കേരളത്തില്‍നിന്നുള്ള സര്‍വീസുകള്‍ റദ്ദാക്കാന്‍ കാരണമെന്ന് പറയുന്നു. എന്നാല്‍, വേണ്ടത്ര ബദല്‍ സംവിധാനങ്ങള്‍ ഏര്‍പ്പെടുത്തുന്നതില്‍ എയര്‍ഇന്ത്യ താത്പര്യം കാണിക്കുന്നില്ലെന്ന് ആക്ഷേപമുണ്ട്. കേരളത്തില്‍നിന്ന് ഗള്‍ഫ് രാജ്യങ്ങളിലേക്ക് ഒട്ടേറെ യാത്രക്കാരുണ്ട്. അവരില്‍ ജോലിക്കാരും ജോലിതേടിപ്പോകുന്നവരും വിദ്യാര്‍ഥികളും ഉള്‍പ്പെടും. വിസയുടെ കാലാവധി കഴിയാറായവര്‍ക്കും അവധികഴിഞ്ഞ് ജോലിക്കു കയറേണ്ട അധ്യാപകരടക്കമുള്ളവര്‍ക്കും വിമാനസര്‍വീസ് റദ്ദാക്കല്‍ ആശങ്കയുണ്ടാക്കുന്നു. അത്യാവശ്യകാര്യങ്ങള്‍ക്കായി ഏതാനും ദിവസത്തെ അവധിക്ക് നാട്ടിലെത്തിയവരും വിഷമത്തിലാണ്. യാത്ര വൈകിയാല്‍ അത് പലരുടെയും ഭാവിയെത്തന്നെ ബാധിച്ചേക്കാം. അയല്‍സംസ്ഥാനങ്ങളിലെത്തി അവിടെനിന്ന് വിദേശത്തേക്കുപോകാനുള്ള ഒരുക്കത്തിലാണ് പലരും. ഈ സാഹചര്യം തങ്ങള്‍ക്കനുകൂലമാക്കാന്‍ പല സ്വകാര്യ, വിദേശവിമാനക്കമ്പനികളും ശ്രമിക്കുന്നു. എയര്‍ഇന്ത്യ അതിന്റെ നിലനില്പിന് ആധാരമായ യാത്രക്കാരോട് കാട്ടുന്ന ഇത്തരം അവഗണനകള്‍ അപലപനീയമാണ്. ആ കമ്പനിയുടെ വരുമാനത്തില്‍ വലിയൊരു പങ്ക് പ്രവാസികളായ മലയാളിയാത്രക്കാരില്‍ നിന്നുള്ളതാണ്. എന്നാല്‍ എയര്‍ഇന്ത്യ ഏറ്റവുമേറെ അവഗണിക്കുന്നത് കേരളത്തിലെ യാത്രക്കാരെയാണെന്ന് പരാതിയുണ്ട്. സര്‍വീസ് റദ്ദാക്കല്‍, വൈകല്‍ എന്നിവയെല്ലാം കേരളത്തിലാണ് കൂടുതല്‍.
ബന്ധപ്പെട്ടവര്‍ ഗൗരവമായി കാണാത്തതുകൊണ്ടാവണം ഇത്തരം വീഴ്ചകള്‍ ആവര്‍ത്തിക്കുന്നത് . പലപ്പോഴും അവസാനനിമിഷത്തിലാണ് വിമാനം വൈകുന്നകാര്യം അറിയിക്കുക. എയര്‍ഇന്ത്യ ഉദ്യോഗസ്ഥരില്‍നിന്ന് ഇത്തരം വിഷമഘട്ടങ്ങളില്‍ ഒരു സഹായവും കിട്ടാറില്ലെന്ന് യാത്രക്കാര്‍ പറയുന്നു. പരാതിപ്പെടുന്നവരോട് ചില എയര്‍ഇന്ത്യാ അധികൃതര്‍ മോശമായി പെരുമാറുന്നതായും ആക്ഷേപമുണ്ട്. എന്തായാലും, ഈ സ്ഥിതിവിശേഷം തുടരാന്‍ അനുവദിച്ചുകൂടാ. ഗള്‍ഫിലേക്കുള്ള എയര്‍ഇന്ത്യയുടെ വിമാനങ്ങള്‍ ഇടയ്ക്കിടെ റദ്ദാക്കുന്നതില്‍ മുഖ്യമന്ത്രി ഉമ്മന്‍ചാണ്ടി ശക്തമായി പ്രതിഷേധിച്ചിട്ടുണ്ട്. പ്രധാനമന്ത്രി ഡോ. മന്‍മോഹന്‍സിങ് ഈ പ്രശ്‌നത്തില്‍ അടിയന്തരമായി ഇടപെടണമെന്നും ബദല്‍സംവിധാനം ഏര്‍പ്പെടുത്തണമെന്നും അദ്ദേഹം ആവശ്യപ്പെട്ടു. എയര്‍ഇന്ത്യ കേരളത്തോട് കടുത്ത അവഗണനയാണ് കാണിക്കുന്നതെന്ന് മന്ത്രി കെ.സി.ജോസഫും പരാതിപ്പെട്ടു. പ്രതിഷേധങ്ങള്‍ കൊണ്ടുമാത്രം ഫലം ഉണ്ടാകണമെന്നില്ല. മലയാളിയാത്രക്കാരുടെ വിഷമതകള്‍ പരിഹരിക്കാനും അവകാശങ്ങള്‍ സംരക്ഷിക്കാനും സംസ്ഥാനസര്‍ക്കാറും ഇവിടെനിന്നുള്ള കേന്ദ്രമന്ത്രിമാരും ജനപ്രതിനിധികളും ഒറ്റക്കെട്ടായി രംഗത്തിറങ്ങണം.
പ്രൊഫ്. ജോണ്‍ കുരാക്കാര്‍
No comments:
Post a Comment