ഈ കാലഘട്ടത്തിൽ നാം വിളിക്കപ്പെട്ടിരിക്കുന്നു --പ്രൊഫ്. ജോൺ കുരാക്കാർ

 

ഈ കാലഘട്ടത്തിൽ  നാം വിളിക്കപ്പെട്ടിരിക്കുന്നു

കാലം മാറുകയാണ് , അതിവേഗം മാറിക്കൊണ്ടിരിക്കുന്ന  ഒരു കാലഘത്തിലാണ്  നാം ജീവിക്കുന്നത് .ശാസ്ത്ര സാങ്കേതിക വിദ്യ  അനുദിനം മാറി കൊണ്ടിരിക്കുന്നു. ആർട്ടിഫിഷ്യൽ ഇന്റലിജന്റ്സിന്റെ  കാലമാണ് . ഇത്തരം  ഒരു കാലഘത്തിലാണ് നാം ജീവിക്കുന്നത് .ബൈബിളിലെ വളരെ പ്രസിദ്ധമായ ഒരു വാക്കാണിത്  .പഴയനിയമത്തിലെ എസ്തേറിന്റെ പുസ്തകത്തിൽ, മൊർദ്ദെഖായി തന്റെ വളർത്തുമകളായ എസ്തേർ രാജ്ഞിയോട് പറയുന്ന വാക്കുകളാണിത്. യഹൂദ ജനതയെ നശിപ്പിക്കാനുള്ള ഗൂഢാലോചന നടക്കുമ്പോൾ, രാജാവിന്റെ അടുത്ത് ചെന്ന് സ്വന്തം ജനതയ്ക്കായി സംസാരിക്കാൻ മൊർദ്ദെഖായി എസ്തേറിനെ പ്രേരിപ്പിക്കുന്നു.

സമൂഹവും ജീവിതരീതികളും ചിന്തകളും മൂല്യബോധവുമെല്ലാം അതിവേഗം മാറിക്കൊണ്ടിരിക്കുന്നു. ശാസ്ത്രസാങ്കേതിക വിദ്യയുടെ വളർച്ച മനുഷ്യന് സങ്കൽപ്പിക്കാൻ കഴിയാത്ത സൗകര്യങ്ങൾ സമ്മാനിച്ചിരിക്കുന്നു. ലോകം വിരൽത്തുമ്പിലേക്ക് ചുരുങ്ങിയിരിക്കുന്നു.  ലോകം ഒരു തറവാട് ആയികൊണ്ടിരിക്കുന്നു .എന്നാൽ ഈ പുരോഗതിക്കിടയിൽ മനുഷ്യൻ മനുഷ്യനിൽനിന്ന് അകലുകയാണോ എന്ന ഗൗരവമായ ചോദ്യം ഇവിടെ  ഉയരുന്നു.ഒരുകാലത്ത് സ്നേഹത്തിനും സഹകരണത്തിനും പരസ്പര വിശ്വാസത്തിനും വലിയ വിലയുണ്ടായിരുന്നു. അയൽക്കാരന്റെ ദുഃഖം സ്വന്തം ദുഃഖമായി കാണുന്ന മനസ്സുകൾ നമുക്കുണ്ടായിരുന്നു. ഇന്ന് സ്വന്തം നേട്ടങ്ങൾക്കും താൽപര്യങ്ങൾക്കും മുൻഗണന നൽകുന്ന ഒരു മനോഭാവം വളരുകയാണ്. പണവും അധികാരവും പദവിയും മനുഷ്യന്റെ മഹത്വം അളക്കുന്ന മാനദണ്ഡങ്ങളായി മാറുന്നു.

രാഷ്ട്രീയരംഗത്തും വലിയ മാറ്റങ്ങളാണ് സംഭവിക്കുന്നത്. ജനാധിപത്യം ജനങ്ങളുടെ ശബ്ദമാകേണ്ടതാണ്. എന്നാൽ അധികാരത്തിനുവേണ്ടിയുള്ള മത്സരങ്ങളും രാഷ്ട്രീയ പകപോക്കലുകളും അഴിമതിയും സ്വജനപക്ഷപാതവും ജനാധിപത്യത്തിന്റെ അന്തസ്സിനെ ചോദ്യം ചെയ്യുന്നു. ജനങ്ങളുടെ അടിസ്ഥാന പ്രശ്നങ്ങൾ പലപ്പോഴും അവഗണിക്കപ്പെടുന്നു.

വിദ്യാഭ്യാസരംഗത്തും പുതിയ വെല്ലുവിളികൾ ഉയരുന്നു. അറിവ് നേടുന്നതിനേക്കാൾ സർട്ടിഫിക്കറ്റുകൾ നേടുന്നതിനാണ് പലരും പ്രാധാന്യം നൽകുന്നത്. തൊഴിൽരഹിതരായ യുവാക്കളുടെ എണ്ണം വർധിക്കുന്നു. കുടുംബബന്ധങ്ങൾ ദുർബലമാകുന്നു. ലഹരിയും അക്രമവും കുട്ടിക്കുറ്റകൃത്യങ്ങളും സമൂഹത്തെ ആശങ്കയിലാഴ്ത്തുന്നു. വാർത്താമാധ്യമങ്ങളും  ഇന്ന്  വിശ്വാസയോഗ്യമല്ല.

നാം ജീവിക്കുന്ന കാലഘട്ടത്തെ കുറ്റപ്പെടുത്തുന്നതുകൊണ്ടുമാത്രം ഒന്നും മാറുകയില്ല. മാറ്റം ഓരോ വ്യക്തിയിലും കുടുംബത്തിലും വിദ്യാലയത്തിലും സമൂഹത്തിലും ആരംഭിക്കണം. അധികാരത്തേക്കാൾ സേവനത്തിനും സമ്പത്തിനേക്കാൾ സത്യസന്ധതയ്ക്കും സ്വാർത്ഥതയേക്കാൾ സഹാനുഭൂതിക്കും പ്രാധാന്യം നൽകാൻ നമുക്ക് കഴിയണം.കാലം നമ്മെ വിളിക്കുന്നത് എന്തിനാണ്? നിശ്ശബ്ദരായി കാഴ്ചക്കാരായി നിൽക്കാനോ?, അതോ സമൂഹത്തിൽ നല്ല മാറ്റങ്ങൾ സൃഷ്ടിക്കാനോ?

ഇത്തരം ഒരു കാലഘട്ടത്തിനായാണ് നാം വിളിക്കപ്പെട്ടിരിക്കുന്നതെങ്കിൽ, അതിന്റെ ഉത്തരവാദിത്വം തിരിച്ചറിയാനും കാലത്തിന്റെ വെല്ലുവിളികളെ ധൈര്യത്തോടെ നേരിടാനും നമുക്ക് കഴിയണം. . നല്ലൊരു നാളെയെ സൃഷ്ടിക്കേണ്ടത് മറ്റാരുമല്ല—നാം തന്നെയാണ്.

പ്രൊഫ്. ജോൺ കുരാക്കാർ