സ്ട്രോക്ക് മുൻ കണ്ടു പിടിക്കാൻ

 

പ്രായം വെറുമൊരു അക്കം മാത്രമാണെന്ന് തെളിയിച്ചിരിക്കുകയാണ് അമേരിക്കയിലെ ന്യൂ ഓർലിയൻസിൽ നിന്നുള്ള നയ എല്ലിസ് (Naya Ellis) എന്ന 14 വയസ്സുകാരി. സ്ട്രോക്ക് അഥവാ പക്ഷാഘാതത്തിന്റെ പ്രാരംഭ ലക്ഷണങ്ങൾ മുൻകൂട്ടി തിരിച്ചറിയാൻ സഹായിക്കുന്ന 'വിംഗ്ഇറ്റ്' (WingItt) എന്ന സ്മാർട്ട് വാച്ച് പ്രോട്ടോടൈപ്പ് വികസിപ്പിച്ചാണ് ഈ മിടുക്കി ശാസ്ത്ര ലോകത്തിന്റെ ശ്രദ്ധ പിടിച്ചു പറ്റിയത്.

തന്റെ മുത്തശ്ശിക്ക് സ്ട്രോക്ക് വന്നപ്പോഴുണ്ടായ വിഷമകരമായ അവസ്ഥയിൽ നിന്നാണ് പുറമെ കാണുന്ന ലക്ഷണങ്ങൾക്ക് മുൻപ് തന്നെ ശരീരത്തിനുള്ളിൽ നടക്കുന്ന മാറ്റങ്ങൾ തിരിച്ചറിയാൻ ഒരു ഉപകരണത്തിന് സാധിച്ചാലോ എന്ന ചിന്ത നയയ്ക്ക് ഉണ്ടാകുന്നത്. ഹൃദയമിടിപ്പിലെ അസ്വാഭാവിക വ്യതിയാനങ്ങളും നാഡി മിടിപ്പുകളിലെ മാറ്റങ്ങളും നിരീക്ഷിച്ച് പ്രവർത്തിക്കുന്ന ഈ ഉപകരണം അമേരിക്കയിലെ പ്രശസ്തമായ 'നാഷണൽ STEM ചലഞ്ചിൽ' വലിയ അംഗീകാരവും നേടിയിരുന്നു.

ലോകത്ത് പ്രതിവർഷം ലക്ഷക്കണക്കിന് ആളുകൾ സ്ട്രോക്ക് മൂലം മരണപ്പെടുന്ന സാഹചര്യത്തിൽ, കുറഞ്ഞ ചെലവിൽ സാധാരണക്കാർക്ക് ലഭ്യമാകുന്ന രീതിയിൽ ഈ ഉപകരണം വികസിപ്പിച്ചെടുത്ത് മനുഷ്യജീവനുകൾ സംരക്ഷിക്കുക എന്ന വലിയ സ്വപ്നമാണ് ഭാവിയിൽ ഒരു ഡോക്ടറാകാൻ ആഗ്രഹിക്കുന്ന ഈ കൊച്ചു മിടുക്കിക്കുള്ളത്.