ഹൈറേഞ്ചിലെ വീഥികളെ ആകർഷകമാക്കി
'മാലാഖമാരുടെ കാഹളം' എന്ന സുന്ദരമായ പേരുള്ള
പുഷ്പമാണ് ഏലത്തോട്ടത്തോട് ചേര്ന്നുള്ള ഹൈറേഞ്ചിന്റെ വഴികളെ ഇപ്പോള് അടിമുടി
അഴകണിയിക്കുന്നത്. എയ്ഞ്ചല്സ് ട്രംപറ്റ് എന്ന് അറിയപ്പെടുന്ന ഈ ചെടി വര്ഷംമുഴുവന്
പുഷ്പിക്കുമെങ്കിലും വസന്തത്തിന്റെ അറുതിയോടെ വേനലിലാണ് കൂടുതലായി പൂക്കളാല്
നിറയുന്നത്. ജൂണ് മാസത്തിലും ഈ സുന്ദര പുഷ്പങ്ങള് മഴയണിഞ്ഞുനില്ക്കും.
ബ്രഗ്മാന്സിയ എന്ന ജനുസ്സില്പ്പെട്ട ഈ ചെടി ഏലത്തോട്ടങ്ങളുടെ അതിരുകളിലെ
വേലിച്ചെടിയായാണ് പൊതുവെ ഹൈറേഞ്ചില് കാണപ്പെടാറുള്ളത്.ലോകമെമ്പാടുമുണ്ടെങ്കിലും ദക്ഷിണ അമേരിക്കന് ഭൂഖണ്ഡത്തില് വ്യാപകമായ സസ്യമായാണ്
ബ്രഗ്മാന്സിയ അറിയപ്പെടുന്നത്. ഏലത്തോട്ടങ്ങളിലേക്കും മറ്റുമായി വിദേശികള്
ഹൈറേഞ്ചിലെത്തിച്ചുവെന്ന് കരുതുന്ന ഈ മാലാഖ പുഷ്പത്തിന്റെ രണ്ടിനം സ്പീഷിസുകളാണ്
ജില്ലയില് പ്രധാനമായും കാണുന്നത്. വെളുത്ത നിറത്തില് തുടങ്ങി അഗ്രങ്ങളിലേക്ക്
ചുവപ്പുരാശി പ്രകടമായി പടര്ന്ന കൈപ്പത്തിയോളം വലിപ്പമുള്ള പുഷ്പങ്ങളുണ്ടാകുന്ന
ഒരിനവും പൂര്ണ്ണമായും വെള്ള നിറത്തിലുള്ള പൂക്കളുണ്ടാവുന്ന മറ്റൊരിനവും
ഏലത്തോട്ടത്തിന്റെ അതിരുകളെ പുഷ്പസാമ്രാജ്യമാക്കി മാറ്റുന്നു.
തേക്കടി-മൂന്നാര് സംസ്ഥാന പാതയുടെ ഇരുവശങ്ങളെയും വസന്തമേഖലയാക്കി
മാറ്റിയിരിക്കുന്ന ഈ സ്വര്ഗ്ഗീയ പുഷ്പങ്ങളുടെ ചുവപ്പുകലര്ന്ന ഇനമാണ്
പൂപ്പാറവരെയുള്ള വഴിയില് കൂടുതലായി കാണാനാവുക. പൂപ്പാറ മുതല് മൂന്നാര് വരെയുള്ള
പ്രദേശത്ത് വെള്ള പുഷ്പങ്ങളാണ് നിറഞ്ഞുനില്ക്കുന്നത്.മാലാഖമാരുടെ കാഹളമെന്നാണ് പേരെങ്കിലും ദക്ഷിണ അമേരിക്കയില് സാത്താന്റെ പുഷ്പമായും
ഇവ അറിയപ്പെടുന്നുണ്ട്. സോളനേസിയ കുടുംബത്തില്പ്പെട്ട ഈ ചെടിയില്
അടങ്ങിയിരിക്കുന്ന കടുത്ത വിഷാംശം മയക്കുമരുന്നായി പരിണമിപ്പിച്ചു കൊണ്ടുള്ള
ഉപയോഗത്തെ ത്വരപ്പെടുത്തുന്നതുകൊണ്ടാണിത്. സമതല പ്രദേശങ്ങളില് കാണപ്പെടുന്ന
ഉമ്മത്ത് എന്ന വിഷാംശമുള്ള കായുണ്ടാകുന്ന സസ്യത്തിന്റെ ജനുസ്സായ ദത്തുറ എന്ന
ജനുസ്സിന്റെ ഭാഗമായാണ് സസ്യശാസ്ത്രജ്ഞര് ആദ്യകാലങ്ങളില് ബ്രഗ്മാന്സിയയെ
കണ്ടിരുന്നത്. പിന്നീട് ടോം ഇ ലോക്ക്വുഡ് തുടങ്ങിയ ശാസ്ത്രജ്ഞരുടെ പഠനങ്ങളിലൂടെ
ബ്രഗ്മാന്സിയ പ്രത്യേക ജനുസ്സായി അംഗീകരിക്കപ്പെട്ടു.ബ്രഗ്മാന്സിയ ഉള്പ്പെടുന്ന സസ്യകുടുംബത്തില്ത്തന്നെയാണ് പുകയിലയും ഉള്പ്പെടുന്നത്.
അതുകൊണ്ടുതന്നെ ഏലത്തോട്ടങ്ങളില് ജൈവപ്രതിരോധത്തിനുള്ള ഉപാധിയായി കൂടിയാവാം
ബ്രഗ്മാന്സിയയെ വിദേശികള് കൊണ്ടുവന്നതെന്ന് പാലാ സെന്റ് തോമസ് കോളേജിലെ
സസ്യശാസ്ത്രവിഭാഗം മേധാവി ജോമി അഗസ്റ്റിന് പറയുന്നു. ഈ സസ്യത്തിന്റെ വിഷാംശം
ജൈവപ്രതിരോധവാദത്തെ സാധൂകരിക്കുന്നതാണ്.
പകല്നേരങ്ങളില് സുഗന്ധം പൊഴിക്കാത്ത ഈ പുഷ്പങ്ങള് സായാഹ്നത്തോടെ കടുത്ത സുഗന്ധവാഹികളാവും. ഇവയുടെ പരാഗണം നിര്വ്വഹിക്കുന്ന നിശാശലഭങ്ങളെ ആകര്ഷിക്കാനാണ് ഇവ പ്രദേശം മുഴുവന് നിറയുന്ന ഗന്ധം സ്വന്തമാക്കിയിരിക്കുന്നത്.
പകല്നേരങ്ങളില് സുഗന്ധം പൊഴിക്കാത്ത ഈ പുഷ്പങ്ങള് സായാഹ്നത്തോടെ കടുത്ത സുഗന്ധവാഹികളാവും. ഇവയുടെ പരാഗണം നിര്വ്വഹിക്കുന്ന നിശാശലഭങ്ങളെ ആകര്ഷിക്കാനാണ് ഇവ പ്രദേശം മുഴുവന് നിറയുന്ന ഗന്ധം സ്വന്തമാക്കിയിരിക്കുന്നത്.
No comments:
Post a Comment