തൃക്കുന്നത്ത് സെമിനാരിയിൽ
വിലക്ക് ലംഘിച്ച് ആരാധന ഓർത്തഡോക്സ് - യാക്കോബായ സഭാ തർക്കത്തെ തുടർന്ന് നാല് പതിറ്റാണ്ടായി പൂട്ടിക്കിടക്കുന്ന ആലുവ തൃക്കുന്നത്ത് സെമിനാരി പള്ളിയിൽ അതിക്രമിച്ചു കടന്ന് കുർബാനയർപ്പിച്ച ശ്രേഷ്‌ഠ കാതോലിക്ക ഡോ. ബസേലിയോസ് തോമസ് പ്രഥമൻ ബാവയെയും അനുയായികളെയും പൊലീസ് അറസ്റ്റ് ചെയ്തു നീക്കി. അറസ്റ്റിനുശേഷം വിട്ടയച്ച ബാവയെ കോതമംഗലം മാർ ബസേലിയോസ് ആശുപത്രിയിലെ ന്യൂറോ ഐ.സി.യുവിൽ പ്രവേശിപ്പിച്ചു.
തൃക്കുന്നത്ത് പള്ളിയിൽ ആരാധനാ സ്വാതന്ത്ര്യംഅനുവദിച്ചില്ലെങ്കിൽ മരണം വരെ നിരാഹാരം അനുഷ്‌ഠിക്കുമെന്ന് ബാവ ആലുവയിൽ പറഞ്ഞു. ആരോഗ്യം മോശമായതിനാൽ ആ തീരുമാനത്തിൽ നിന്ന് പിന്മാറണമെന്ന് ഡോക്ടർമാർ ബാവയോട് അഭ്യർത്ഥിച്ചിട്ടുണ്ട്. അറസ്റ്റ് ചെയ്ത എല്ലാവരെയും പിന്നീട് സ്വന്തം ജാമ്യത്തിൽ വിട്ടയച്ചു.ഇന്നലെ വെളുപ്പിന് നാല് മണിയോടെയാണ് പള്ളി വളപ്പിന്റെ പ്രധാന ഗേറ്റിന്റെയും പള്ളി വാതിലിന്റെയും താഴ് തകർത്ത് യാക്കോബായ വിഭാഗം അകത്ത് കടന്നത്. ഒന്നര മണിക്കൂറിന് ശേഷം ബലം പ്രയോഗിച്ചാണ് പൊലീസ് ഇവരെ അറസ്റ്റ് ചെയ്ത് നീക്കിയത്.
പള്ളിയോടു ചേർന്നുള്ള ഓർത്തഡോക്സ് വിഭാഗം ചാപ്പലിൽ നിന്ന് ശബ്ദം കേട്ട് എത്തിയ വികാരി ഫാ. യാക്കോബ് തോമസ്, വൈദിക വിദ്യാർത്ഥികളായ സ്റ്റാലിൻ (24), റിജോ (22) എന്നിവരെ മർദ്ദനമേറ്റ നിലയിൽ കോലഞ്ചേരി മെഡിക്കൽ മിഷൻ ആശുപത്രിയിൽ പ്രവേശിപ്പിച്ചു.
പൊലീസിന്റെ ബലപ്രയോഗത്തിൽ യാക്കോബായ സഭയുടെ ഇടുക്കി ഭദ്രാസനാധിപൻ ഏലിയാസ് മാർ യൂലിയോസിന് പരിക്കേറ്റു. ആരാധന നടത്തിയവരെ റൂറൽ എസ്.പി സതീഷ് ബിനോയുടെ നേതൃത്വത്തിൽ ഉന്നത പൊലീസ് ഉദ്യോഗസ്ഥർ എത്തിയാണ് അറസ്റ്റ് ചെയ്തത്. വിലങ്ങ് വയ്‌ക്കാതെ അറസ്റ്റിന് വഴങ്ങില്ലെന്ന് പറഞ്ഞ് പള്ളിത്തറയിൽ കിടന്ന ബാവയെ ബലം പ്രയോഗിച്ച് അറസ്റ്റ് ചെയ്തു. അതിനിടെ ബാവയുടെ കാലിൽ നേരിയ മുറിവുണ്ടായി.കോടതി ഉത്തരവ് ലംഘിച്ച് തൃക്കുന്നത്ത് സെമിനാരിയിൽ ആരാധന നടത്താൻ യാക്കോബായ പക്ഷത്തിന് സർക്കാരും പൊലീസും ഒത്താശ നൽകിയെന്ന് സംശയിക്കുന്നതായി ഫാ. യൂഹാനോൻ പോളികാർപ്പസ് മെത്രാപ്പൊലീത്ത പറഞ്ഞു. അല്ലെങ്കിൽ പൊലീസിന്റെ വീഴ്‌ചയാവണം. സെമിനാരിയുടെ അവകാശം ഓർത്തഡോക്സ് പക്ഷത്തിനാണെന്ന് കോടതി വ്യക്തമാക്കിയിട്ടുണ്ടെന്നും അദ്ദേഹം പറഞ്ഞു.
പ്രൊഫ്‌. ജോണ്‍ കുരാക്കാർ
No comments:
Post a Comment