ഹൃദയത്തിന്റെ താളംതെറ്റിക്കുന്ന കൊളസ്‌ട്രോൾ

ഹൃദയത്തിന്റെ താളംതെറ്റിക്കുന്ന

കൊളസ്‌ട്രോൾ
ടോട്ടൽ കൊളസ്‌ട്രോൾ
രക്തത്തിലെ മൊത്തത്തിലുള്ള കൊളസ്‌ട്രോളാണിത്. ഇതിന്റെ അളവ് സാധാരണ വ്യക്തികളിൽ 200 മില്ലീഗ്രാമിൽ താഴെ വരുന്നതാണ് നല്ലത്. ഹൃദ്രോഗബാധിതരായ വ്യക്തികളിലും പ്രമേഹം, രക്താതിസമ്മർദ്ദം, പുകവലി, പാരമ്പര്യമായി ഹാർട്ട് അറ്റാക്കിന് സാധ്യതയുള്ളവർ എന്നിവരിൽ ഇതിന്റെ അളവ് 160 മില്ലീഗ്രാമിന് താഴെ നിർത്തണം. കൊളസ്‌ട്രോളിന്റെ രണ്ട് പ്രധാന ഘടകങ്ങൾ കൊഴുപ്പും പ്രോട്ടീനുമാണ്. ഈ തന്മാത്രകളുടെ സാന്ദ്രത അനുസരിച്ച് കൊളസ്‌ട്രോളിനെ പ്രധാനമായി രണ്ടായി തിരിക്കാം. 1. സാന്ദ്രത കുറഞ്ഞ ലിപ്പോപ്രോട്ടീൻ കൊളസ്‌ട്രോളും( എൽ.ഡി.എൽ കൊളസ്‌ട്രോൾ). 2. സാന്ദ്രത കൂടിയ ലിപ്പോ പ്രോട്ടീൻ കൊളസ്‌ട്രോളും (എച്ച്.ഡി.എൽ കൊളസ്‌ട്രോൾ). 

എൽ.ഡി.എൽ കൊളസ്‌ട്രോൾ
ഈകൊളസ്‌ട്രോൾ ഘടകമാണ് ഹൃദയധമനികളിൽ അടിഞ്ഞുകൂടി തടസ്സം സൃഷ്ടിച്ച് ഹൃദ്രോഗബാധയുണ്ടാക്കുന്ന യഥാർത്ഥ കൊലയാളി. അതിനാൽ ഇതിനെ ചീത്ത കൊളസ്‌ട്രോൾ എന്നാണ് വിളിക്കുന്നത്. പ്രമേഹം, രക്താതിസമ്മർദ്ദം, പുകവലി, പാരമ്പര്യമായി ഹൃദ്രോഗബാധയുണ്ടാകാനുള്ള സാധ്യത എന്നിവ ഉള്ളവരിൽ ചീത്ത കൊളസ്‌ട്രോൾ ഹൃദയരക്തധമനികളിൽ തടസ്സങ്ങൾ ഉണ്ടാക്കാനുള്ള സാധ്യത നാലഞ്ചിരട്ടി കൂടുതലാണ്. ഇതിന്റെ അളവ് സാധാരണ വ്യക്തികളിൽ 130 മില്ലീഗ്രാമിന് താഴെ ആയിരിക്കുന്നതാണ് അഭികാമ്യം. അതേ സമയം ഹൃദ്രോഗബാധിതരിൽ 100 മില്ലീഗ്രാമിന് താഴെ നിർത്തണം. 

എച്ച്.ഡി.എൽ കൊളസ്‌ട്രോൾ
ഹൃദയധമനികളിൽ ബ്‌ളോക്കുകൾ ഉണ്ടാകാതെ സംരക്ഷിക്കുന്ന കൊളസ്‌ട്രോളാണ് എച്ച്.ഡി.എൽ കൊളസ്‌ട്രോൾ. കൂടാതെ ഹൃദയധമനികളിൽ അടിഞ്ഞുകൂടിയ ചീത്ത കൊളസ്‌ട്രോളിനെ അലിയിച്ചുകളയാനുള്ള കഴിവുമുണ്ട്. അതിനാൽ സാന്ദ്രത കൂടിയ എച്ച്.ഡി.എൽ കൊളസ്‌ട്രോളിനെ നല്ല കൊളസ്‌ട്രോൾ എന്നാണ് വിളിക്കുന്നത്. ഇതിന്റെ അളവ് 100 മില്ലീലിറ്റർ രക്തത്തിൽ 60 മില്ലീഗ്രാമിന് മുകളിലായിരിക്കുന്നതാണ് അഭികാമ്യം. രക്തത്തിലെ കുറഞ്ഞ എച്ച്.ഡി.എൽ കൊളസ്‌ട്രോൾ (40 ഗ്രാമിന് താഴെ) ഹൃദ്രോഗസാധ്യത കൂട്ടുമെന്ന് പഠനങ്ങൾ തെളിയിച്ചിട്ടുണ്ട്. സ്ത്രീ ഹോർമോണായ ഈസ്ട്രജൻ ഈ നല്ല കൊളസ്‌ട്രോളിന്റെ അളവ് വർധിപ്പിക്കും. ആർത്തവവിരാമത്തിന് മുമ്പുള്ള സ്ത്രീകളിൽ ഹൃദ്രോഗബാധ വിരളമാകാനുളള പ്രധാന കാരണം ഇതാണ്. ചിട്ടയായ വ്യായാമം, മിതമായ മദ്യത്തിന്റെ ഉപയോഗം (പ്രത്യേകിച്ചും ചുവന്ന വൈൻ)നല്ല കൊളസ്‌ട്രോളായ എച്ച്.ഡി.എല്ലിന്റെ രക്തത്തിലെ അളവ് വർദ്ധിപ്പിക്കും. 

ട്രൈഗ്ലിസറൈഡുകൾ
ഫാറ്റി ആസിഡുകൾ, ഫോസ്‌ഫോലിപ്പിഡുകൾ, ട്രൈഗ്ലിസറൈഡുകൾ, കൊളസ്‌ട്രോൾ എന്നിങ്ങനെ ശരീരത്തിലെ കൊഴുപ്പുകളെ നാലായി തരംതിരിക്കാം. 
ഇവയിൽ ഹൃദയാഘാതം, മസ്തിഷ്‌കാഘാതം തുടങ്ങിയ മാരക രോഗങ്ങളിലേയ്ക്ക് നയിക്കുന്ന പ്രധാന വില്ലൻ കൊളസ്‌ട്രോൾ ആണെങ്കിലും വർദ്ധിച്ച തോതിലുള്ള ട്രൈഗ്ലിസറൈഡും ഹൃദ്രോഗത്തിനും പക്ഷാഘാതത്തിനും ഇടയാക്കുന്നുവെന്നാണ് പുതിയ പഠനങ്ങൾ തെളിയിച്ചിരിക്കുന്നത്. ഇതിന്റെ അളവ് സാധാരണ വ്യക്തിയിൽ 200 മില്ലീഗ്രാമിന് താഴെയായിരിക്കണം. എന്നാൽ ഹൃദ്രോഗബാധിതരിൽ 150 മില്ലീഗ്രാമിന് താഴെ നിർത്തണം.

പ്രൊഫ്‌.ജോണ്‍ കുരാക്കാർ