ഹര്‍ത്താല്‍ എന്തിന്?
ബദല്‍ മാര്‍ഗ്ഗം എന്ത്?
ഹര്‍ത്താല്‍ പ്രാകൃതവും ആഭാസകരവുമായ ഒരു സമരരീതിയാണ് എന്നതില്‍ ആര്‍ക്കും തര്‍ക്കമില്ല. പ്രഖ്യാപിതവും അപ്രഖ്യാപിതവുമായ ഹര്‍ത്താല്‍ മൂലം കേരളത്തിനുണ്ടാകുന്ന കോടിക്കണക്കിനു രൂപയുടെ നഷ്ടവും ജനങ്ങളുടെ ബുദ്ധിമുട്ടുകളും പരിഹരിക്കാന്‍ കഴിയുന്നതുമല്ല. പക്ഷേ ജനവിരുദ്ധമായ ഇത്തരം സമരമാര്‍ഗ്ഗങ്ങള്‍ക്കെതിരെ പ്രതികരിക്കാന്‍ ഭയം മൂലം ജനങ്ങള്‍ തയ്യാറാവുന്നില്ല. ഈ ഭയത്തെ മുതലെടുത്ത് രാഷ്ട്രീയക്കാരും സംഘടനകളും വിജയം നേടുന്നു. ഭയം ജനങ്ങളെ വീടുകളില്‍ തളച്ചിടുമ്പോള്‍ അതിനെ ഹര്‍ത്താലിന്റെ വിജയമായി കണ്ട് ഇത്തരക്കാര്‍ അതാഘോഷിക്കുന്നു. ഹര്‍ത്താല്‍ സമ്പൂര്‍ണ്ണമെന്നും വിജയകരമെന്നും അവര്‍ വിധിയെഴുതുകയും ചെയ്യുന്നു.ഹര്‍ത്താലിനെതിരെ പലകോണുകളില്‍ നിന്നും പ്രതിഷേധത്തിന്റെ സ്വരമുയരുകയാണ്. ഒറ്റപ്പെട്ടു കേള്‍ക്കുന്ന ഈ സ്വരങ്ങള്‍ യോജിപ്പിച്ചു കൊണ്ടു വരികയാണ് ആദ്യം ചെയ്യേണ്ടത്. ഭയത്തെ കീഴടക്കി ജനം ഈ അനീതിക്കെതിരെ പ്രതികരിക്കാനും പ്രവര്‍ത്തിക്കാനും തയ്യാറാവണം. ബന്ദ്, ഹര്‍ത്താല്‍ എന്നീ സമരമാര്‍ഗ്ഗത്തോട് താല്‍പര്യമില്ലാത്തവരുടെ മേല്‍ അത് അടിച്ചേല്‍പ്പിക്കാന്‍ ആര്‍ക്കും അവകാശമില്ല. ഹര്‍ത്താല്‍ ദിനത്തില്‍ വാഹനങ്ങള്‍ക്കു നേരെയും ജനങ്ങള്‍ക്കു നേരെയും കല്ലെറിയുന്നതും ആളുകളെ വിരട്ടി ഓടിക്കുന്നതും കാടത്തവും ഗുണ്ടായിസവുമാണ്. ഇത്തരം സംഭവങ്ങള്‍ത്തെതിരെ ശക്തമായി പ്രതികരിക്കാനാണ് ജനപക്ഷത്തിന്റെ തീരുമാനം
ഹര്‍ത്താല്‍ കൊണ്ട് വ്യക്തിപരമായ നഷ്ടങ്ങള്‍ ഉണ്ടാകാത്തിടത്തോളം കാലം അത് ആസ്വദിക്കാനാണ് മലയാളികള്‍ക്ക് താല്‍പര്യം. ഹര്‍ത്താലിനെ ദേശീയോത്സവമാക്കി കള്ളും കോഴിയുമായി വീടിനുള്ളില്‍ സുരക്ഷിതനാവുന്നു ഒരു ശരാശരി മലയാളി. അന്നന്നത്തെ ആഹാരത്തിനു വേണ്ടി പണിയെടുക്കുന്ന, ഒരു ദിവസത്തെ അധ്വാനം മുടങ്ങിയാല്‍ പട്ടിണിയാകുന്ന ആളുകളെക്കുറിച്ച് അത്തരക്കാര്‍ക്കു ചിന്തിക്കേണ്ട കാര്യവുമില്ല. ഹര്‍ത്താല്‍ മൂലം നഷ്ടമാകുന്ന കോടികളെക്കുറിച്ചും മലയാളി ബോധവാനല്ല. ബോധമുണ്ടായാല്‍ തന്നെ മറ്റാരെങ്കിലും ഇതിനെതിരെ പ്രതികരിക്കട്ടെ എന്ന മനോഭാവവും. ഈ ചിന്താഗതിക്കാണു മാറ്റമുണ്ടാകേണ്ടത്. ഓരോ ഹര്‍ത്താലും ഓരോ വ്യക്തിയുടേയും കീശയില്‍ വലിയ ഓട്ടകള്‍ ശേഷിപ്പിച്ചിട്ടാണ് കടന്നു പോകുന്നതെന്ന് ജനങ്ങള്‍ ബോധപൂര്‍വ്വം ചിന്തിക്കുകയും മനസിലാക്കുകയും വേണം. നേട്ടമുണ്ടാക്കുന്നുവെങ്കില്‍ അത് ഹര്‍ത്താല്‍ നടത്തുന്നവര്‍ മാത്രമാണ്. ഹര്‍ത്താല്‍ രാഷ്ട്രീയ പ്രവര്‍ത്തകരെ സംബന്ധിച്ചിടത്തോളം തങ്ങളുടെ സാന്നിധ്യം ജനങ്ങളെ അറിയിക്കാനുള്ള ഏറ്റവും നല്ല മാര്‍ഗ്ഗമാണ്. അതിനാല്‍ അത് സമ്പൂര്‍ണ്ണ വിജയമാക്കുവാനാവും അതിന് ആഹ്വാനം ചെയ്യുന്ന ഓരോ പാര്‍ട്ടിയുടേയും സംഘടനയുടേയും ശ്രമം. എന്തൊക്കെ ആയാലും പൊതുജനം മടുത്തു. ഇവിടുത്തെ രാഷ്ട്രീയ പാര്‍ട്ടികള്‍ വിചാരിച്ചാല്‍ 100 പേരെ പോലും ഹര്‍ത്താലിനായി അണിനിരത്താനാവില്ല. എന്നിട്ടും ഏതെങ്കിലുമൊരു ഈര്‍ക്കില്‍ പാര്‍ട്ടി വിചാരിച്ചാല്‍ പോലും കേരളം നിശ്ചലമാകുന്നു. നിസ്സാരമായ കാര്യങ്ങള്‍ക്കു പോലും ഹര്‍ത്താല്‍ നടത്തി രാഷ്ട്രീയ പാര്‍ട്ടികള്‍ ജനങ്ങളില്‍ നിന്നും അകലുകയാണ്. ബ്രിട്ടീഷുകാരുടെ കൊള്ളയ്‌ക്കെതിരെ പോരാടുന്നതിന് മഹാത്മാഗാന്ധി സമാധാനപരമായ മാര്‍ഗ്ഗങ്ങളിലൂടെ നടപ്പാക്കിയ ബന്ദ് ഇന്ന് ജനങ്ങളെ ദ്രോഹിക്കുന്നതിനും അവര്‍ക്കെതിരെ അക്രമം അഴിച്ചു വിടുന്നതിനുമുള്ള അവസരമാക്കി രാഷ്ട്രീയ പാര്‍ട്ടികള്‍ മാറ്റിയിരിക്കുന്നു. സ്വന്തം കാര്യസാധ്യത്തിനു വേണ്ടി പോലും ഹര്‍ത്താലും ബന്ദും ഗുണ്ടായിസവും പ്രയോഗിക്കുന്നവരെ ജനങ്ങള്‍ നേരിടുകയാണു വേണ്ടത്. ഏതെങ്കിലുമൊരു രാഷ്ട്രീയ പാര്‍ട്ടി ഹര്‍ത്താലിനു ആഹ്വാനം ചെയ്യുമ്പോള്‍ തങ്ങള്‍ കടകള്‍ നിര്‍ബന്ധപൂര്‍വ്വം അടപ്പിക്കില്ലെന്നും ബസിനു കല്ലെറിയില്ലെന്നും പറയാന്‍ ചങ്കൂറ്റമുണ്ടോ? രാഷ്ട്രീയപാര്‍ട്ടികള്‍ ഉന്നയിക്കുന്ന വിഷയങ്ങളോട് ജനങ്ങള്‍ കൂടി അനുകൂലിക്കുമ്പോള്‍ മാത്രമല്ലേ ആ ബന്ദോ ഹര്‍ത്താലോ ജനങ്ങളുടെ അറിവോടെയും അവര്‍ക്കുവേണ്ടിയും നടത്തപ്പെടുന്നു എന്നു പറയാനാവൂ?
പ്രൊഫ്‌. ജോണ്‍ കുരാക്കാർ
No comments:
Post a Comment