മുല്ലപെരിയാര്‍ -സംരക്ഷണ ഡാം പണിയണം മുല്ലപ്പെരിയാര്‍ ഡാം നിലനിര്‍ത്തിക്കൊണ്ട്‌ പുതിയ 'സംരക്ഷണ ഡാം' നിര്‍മിക്കുന്നതിന്‌ പൊതുധാരണ ഉണ്ടാകുന്നു. നിലവിലുള്ള ഡാം പൂര്‍ണമായി ഡീ കമ്മീഷന്‍ ചെയ്‌ത്‌ പുതിയ ഡാമും പുതിയ കരാറും ഉണ്ടാക്കുക എന്ന ആവശ്യത്തില്‍ നിന്നു കേരളം താല്‍ക്കാലികമായി പിന്മാറും. പ്രധാനമന്ത്രിയുടെ ഇടപെടലിനെത്തുടര്‍ന്നാണ്‌ ഇത്തരമൊരു അപ്രഖ്യാപിത ഒത്തുതീര്‍പ്പ്‌. ഇതിന്‌ അന്തിമ രൂപമായിട്ടില്ല. എന്നാല്‍ കോണ്‍ഗ്രസ്‌ ദേശീയ നേതൃത്വത്തിന്റെയും കേന്ദ്ര സര്‍ക്കാരിന്റെയും നിര്‍ബന്ധത്തിനു യുഡിഎഫ്‌ സര്‍ക്കാര്‍ വഴങ്ങുന്നതായാണു വിവരം. ഇതിന്റെ ഭാഗമായാണ്‌ മുല്ലപ്പെരിയാര്‍ വിഷയത്തിലെ പ്രചണ്ഡമായ പ്രചാരണം കേരളം നിര്‍ത്തിവച്ചിരിക്കുന്നത്‌. പ്രശ്‌നത്തില്‍ തമിഴ്‌നാട്‌ വിട്ടുവീഴ്‌ചയ്‌ക്കു തയ്യാറാകാത്തതും അവരുടെ മേല്‍ പരിധിവിട്ട്‌ സമ്മര്‍ദം ചെലുത്താന്‍ കഴിയാത്തതുമാണ്‌ കേന്ദ്രത്തെ കുഴയ്‌ക്കുന്നത്‌. തമിഴ്‌നാട്ടിലെ മലയാളി സമൂഹത്തിന്റെ നിലനില്‍പ്‌ പ്രതിസന്ധിയിലായതും കൂടി കേരളം പരിഗണിക്കുകയും ചെയ്യുന്നു. പക്ഷേ, ഡാംഉള്‍പ്പെടുന്ന മേഖലയില്‍ ഇനിയും ഭൂചലനമുണ്ടായാല്‍ ഡാമിനെ അത്‌ എങ്ങനെ ബാധിക്കുമെന്ന ചോദ്യം അവശേഷിക്കുകയാണ്‌. കഴിഞ്ഞ ദിവസം ഡാം സന്ദര്‍ശിച്ച ഉന്നതാധികാര സമിതിയുടെ തീരുമാനം വരുന്നതോടെ ഇതിനുത്തരമാകുമെന്നാണ്‌ പ്രതീക്ഷിക്കപ്പെടുന്നത്‌. ഡാമിന്‌ ബലക്ഷയമില്ലെന്ന മുന്‍ നിലപാട്‌ ഉന്നതാധികാര സമിതി ആവര്‍ത്തിച്ചാല്‍ കേരളവും അത്‌ അംഗീകരിക്കേണ്ടി വരും. കരളത്തിന്റെ വാദങ്ങള്‍ക്ക്‌ അനുകൂലമായി മുമ്പ്‌ റിപ്പോര്‍ട്ട്‌ നല്‍കിയ റൂര്‍ക്കി ഐഐടി സംഘത്തിന്റെ ഡാം സന്ദര്‍ശനം മാറ്റിവെച്ചതിനു പിന്നിലും കേന്ദ്രത്തിന്റെ സമ്മര്‍ദമുണ്ടെന്നാണു വിവരം.
നിലവിലെ ഡാമിനു താഴേ ഭാഗത്താണ്‌ 'സംരക്ഷണ ഡാം' നിര്‍മിക്കുക. നിലവിലെ ഡാം തകര്‍ന്നാല്‍ അതിലെ ജലം തടഞ്ഞുനിര്‍ത്താന്‍ കഴിയുന്ന തരത്തില്‍ ഏറ്റവും നൂതന സാങ്കേതിക വിദ്യ ഉപയോഗിച്ചായിരിക്കും 'സംരക്ഷണ ഡാം' . അതോടെ ഡാം തകര്‍ന്നാലുള്ള ദുരന്തം ഒഴിവാകും. നിലവിലെ ഡാം അതേപടി നിലനിര്‍ത്തുന്നതുകൊണ്ട്‌ തമിഴ്‌നാടിന്‌ ഇപ്പോള്‍ കിട്ടിക്കൊണ്ടിരിക്കുന്ന ജലം അതേപോലെ കിട്ടുകയും ചെയ്യും. അതിനാല്‍ അവര്‍ `സംരക്ഷണ ഡാം' എന്ന ആശയത്തിന്‌ എതിരല്ല. സാങ്കേതിക വിദഗ്‌ധരും രണ്ടു സംസ്ഥാനങ്ങളുടെ പ്രതിനിധികളും ചേര്‍ന്ന്‌ ഇതിനു സ്ഥലം കണ്ടെത്തുകയും രൂപരേഖ തയ്യാറാക്കുകയും ചെയ്യും. പുതിയ ഡാമിനു കേരളം കണ്ടെത്തിയ സ്ഥലംതന്നെയാകും മിക്കവാറും അതിനുപയോഗിക്കുക.
തമിഴ്‌നാടിനു ജലം, കേരളത്തിനു സുരക്ഷ എന്ന നയമാണ്‌ മുല്ലപ്പെരിയാര്‍ പ്രശ്‌നത്തില്‍ കേരളം മുന്നോട്ടുവെച്ചിരിക്കുന്നത്‌. എന്നാല്‍ പുതിയ ഡാമുണ്ടാകുമ്പോള്‍ അതില്‍ നിന്നു ലഭിക്കുന്ന ജലത്തിന്‌ ഇപ്പോഴത്തേക്കാള്‍ കൂടിയ തുക കേരളത്തിനു തരേണ്ടിവരും. പുതിയ കരാര്‍ ആ വിധത്തിലാകും തയ്യാറാവുക എന്നു തിരിച്ചറിഞ്ഞാണ്‌ തമിഴ്‌നാട്‌ പുതിയ ഡാമിന്‌ ഉടക്കിടുന്നത്‌. ദേശീയതലത്തില്‍ തന്നെ ചര്‍ച്ച ചെയ്യുന്ന വിഷയമായി മുല്ലപ്പെരിയാര്‍ ഡാം മാറിയതോടെ കേന്ദ്രസര്‍ക്കാരിന്റെ മുഖം രക്ഷിക്കേണ്ടത്‌ കേരളത്തിലെ യുഡിഎഫിന്റെ ആവശ്യവുമായി മാറി. ഇതും ഇപ്പോഴത്തെ വിട്ടുവീഴ്‌ചയ്‌ക്കു കാരണമായിട്ടുണ്ട്‌. ഉത്തര്‍ പ്രദേശ്‌ ഉള്‍പ്പെടെ അഞ്ചു സംസ്ഥാനങ്ങളില്‍ ഫെബ്രുവരിയില്‍ നിയമസഭാ തെരഞ്ഞെടുപ്പു നടക്കാനിരിക്കുകയാണ്‌. രണ്ടു സംസ്ഥാനങ്ങള്‍ തമ്മിലുള്ള തര്‍ക്കത്തില്‍ ശരിയായ പരിഹാരം ഉണ്ടാക്കാന്‍ കഴിയാത്ത സര്‍ക്കാരാണ്‌ കേന്ദ്രം ഭരിക്കുന്നതെന്ന പ്രചാരണം തെരഞ്ഞെടുപ്പു രംഗത്ത്‌ ബിജെപിയും മറ്റും ഉപയോഗിക്കുമെന്നു കോണ്‍ഗ്രസ്‌ ഹൈക്കമാന്‍ഡിനു ഭയമുണ്ട്‌. ഹൈക്കമാന്‍ഡ്‌ അതും കൂടി കേരളത്തിലെ കോണ്‍ഗ്രസ്‌ നേതൃത്വത്തെ ധരിപ്പിച്ചാണത്രേ നിലപാട്‌ മയപ്പെടുത്തിയത്‌. തമിഴ്‌നാട്‌ ഭരിക്കുന്ന എഐഎഡിഎംകെ യുപിഎയുടെ ഭാഗമല്ലാത്തതിനാല്‍ അവരെ ഇതു പറഞ്ഞ്‌ വഴിക്കുകൊണ്ടുവരാന്‍ കഴിയില്ല. അതുകൊണ്ട്‌ അവസാന വിട്ടുവീഴ്‌ച കേരളത്തിന്റേതു തന്നെയായേ പറ്റൂ എന്ന വ്യക്തമായ സന്ദേശമാണ്‌ ഹൈക്കമാന്‍ഡ്‌ കൈമാറിയത്‌.
കേന്ദ്രത്തിന്‌ പ്രശ്‌നപരിഹാര ശ്രമത്തില്‍ വിജയിക്കാന്‍ കഴിഞ്ഞില്ലെന്നു തുറന്നു സമ്മതിച്ച പ്രതിരോധ മന്ത്രി എ കെ ആന്റണി, ശ്രമം തുടരമെന്നു പറഞ്ഞത്‌ ഇതു കൂടി പരിഗണിച്ചാണ്‌. എന്നാല്‍ ആന്റണി നേരിട്ടല്ല കേരളത്തെ അനുനയിപ്പിക്കുന്നത്‌. കേരളത്തില്‍ നിന്നും തമിഴ്‌നാട്ടില്‍ നിന്നുമല്ലാത്ത കേന്ദ്ര മന്ത്രിമാരും കോണ്‍ഗ്രസ്‌ നേതാക്കളുമാണ്‌ ഇടപെടുന്നത്‌.
പ്രൊഫ്‌.ജോണ്‍ കുരാക്കാര്‍
No comments:
Post a Comment