ഉണ്ണിയേശുവിനെ കണ്ട് മടങ്ങിയ 3 രാജാക്കന്മാര് എത്തിച്ചേര്ന്നത്
കേരളത്തിലെ ഓർത്തഡോൿസ് പള്ളിയില്
ഉണ്ണിയേശുവിനെ കണ്ട് മടങ്ങിയ 3 രാജാക്കന്മാര് എത്തിച്ചേര്ന്നത് കേരളത്തിലെ പള്ളിയില് ! : പിറവത്തിൻ്റെ സ്വന്തം രാജാക്കന്മാരുടെ പള്ളി | St. Mary's Orthodox Syrian Cathedral.ഏകദേശം രണ്ടായിരം വർഷങ്ങള്ക്ക് മുമ്പ്, ലോകരക്ഷകനായ യേശുക്രിസ്തു ബെത്ലഹേമിലെ കാലിത്തൊഴുത്തില് ജനിച്ചപ്പോള്, ആകാശത്ത് അത്ഭുതകരമായ ഒരു നക്ഷത്രം ഉദിച്ചുയർന്നു.ആ നക്ഷത്രത്തെ പിന്തുടർന്ന് കിഴക്കുദിക്കില് നിന്ന് ജ്ഞാനികളായ മൂന്ന് രാജാക്കന്മാർ-മെല്ക്കിയോർ, കാസ്പർ, ബല്ത്താസർ-യാത്ര തിരിച്ചു. അവർ ഉണ്ണിയേശുവിനെ കണ്ട് പൊന്നും മീറയും കുന്തിരിക്കവും കാഴ്ചവെച്ചു മടങ്ങി.(The St. Mary's Orthodox Syrian Cathedral in Piravom)ഐതിഹ്യങ്ങള് പറയുന്നത് ഈ മൂന്ന് രാജാക്കന്മാർ മടക്കയാത്രയില് എത്തിച്ചേർന്നത് കേരളത്തിലെ സുഗന്ധവ്യഞ്ജനങ്ങളുടെ നാടായ പിറവത്താണെന്നാണ്. അവർ ഉണ്ണിയേശുവിനെ വണങ്ങിയതിന്റെ സ്മരണയ്ക്കായി ഭാരതീയ വാസ്തുവിദ്യയില് ഒരു ആരാധനാലയം അവിടെ പണികഴിപ്പിച്ചു. 'പിറവി' (ജനനം) നടന്ന വാർത്തയുമായി രാജാക്കന്മാർ എത്തിയ ഇടമായതിനാലാണ് ഈ സ്ഥലത്തിന് 'പിറവം' എന്ന് പേര് ലഭിച്ചതെന്ന് വിശ്വസിക്കപ്പെടുന്നു.
ലോകത്തില് തന്നെ മൂന്ന് രാജാക്കന്മാരുടെ നാമത്തില് അറിയപ്പെടുന്ന അപൂർവ്വം പള്ളികളിലൊന്നാണ് പിറവം വലിയ പള്ളി. അതുകൊണ്ടാണ് ഈ ദേവാലയത്തിന് 'രാജാക്കന്മാരുടെ പള്ളി' എന്ന വിശേഷണം ലഭിച്ചത്. പില്ക്കാലത്ത് ഇത് പരിശുദ്ധ കന്യകമറിയത്തിന്റെ നാമധേയത്തിലായെങ്കിലും, ഇന്നും ജനമനസ്സുകളില് ഇത് 'രാജാക്കന്മാരുടെ പള്ളി' തന്നെ.പള്ളിക്കുള്ളിലെ അള്ത്താരയില് ഉണ്ണിയേശുവിന്റെ ജനനവും മൂന്ന് രാജാക്കന്മാരുടെ സന്ദർശനവും കൊത്തിവെച്ചിരിക്കുന്നത് ഈ ബന്ധത്തിന് അടിവരയിടുന്നു.
അഞ്ചാം നൂറ്റാണ്ടില് ഈ പള്ളി പേർഷ്യൻ ശൈലിയില് പുതുക്കിപ്പണിതു എന്ന് കരുതപ്പെടുന്നു. മൂവാറ്റുപുഴയാറിന്റെ തീരത്ത് ഒരു കോട്ട പോലെ തലയുയർത്തി നില്ക്കുന്ന ഈ പള്ളിക്ക് നാല് അടിയോളം കനമുള്ള ചുവരുകളുണ്ട്. പള്ളിയോട് ചേർന്നുതന്നെ പിഷാരുകോവില് ക്ഷേത്രം സ്ഥിതി ചെയ്യുന്നു. ഒരേ വളപ്പില് പള്ളിയും ക്ഷേത്രവും വരുന്നത് കേരളത്തിലെ മതസൗഹാർദ്ദത്തിന്റെ ഉത്തമ ഉദാഹരണമാണ്. എ.ഡി. 52-ല് തോമാശ്ലീഹ കേരളത്തില് വന്നപ്പോള് ഈ രാജാക്കന്മാരെ കാണുകയും അവർക്ക് ജ്ഞാനസ്നാനം നല്കുകയും ചെയ്തുവെന്നും ഒരു വിശ്വാസമുണ്ട്.
ഈ പള്ളിയിലെ ഏറ്റവും പ്രശസ്തമായ ചടങ്ങാണ് 'പൈതല് നേർച്ച'. ഈസ്റ്റർ ദിനത്തില് 12 ആണ്കുട്ടികള്ക്ക് സദ്യ നല്കുന്ന ഈ വഴിപാട് കാണാൻ ജാതിമതഭേദമന്യേ പതിനായിരങ്ങള് എത്താറുണ്ട്. കൂടാതെ ജനുവരി 6-ന് ആഘോഷിക്കുന്ന ദനഹ പെരുന്നാള് (എപ്പിഫാനി) രാജാക്കന്മാരുടെ സന്ദർശനത്തെ അനുസ്മരിപ്പിക്കുന്ന പ്രധാന ആഘോഷമാണ്. പള്ളിയിലെ ഒരിക്കലും കെടാത്ത കെടാവിളക്ക് വിശ്വാസികള്ക്ക് വലിയൊരു ആശ്വാസവും പ്രത്യാശയുമാണ്. കേരളത്തിലെ ക്രൈസ്തവ ചരിത്രത്തില് സവിശേഷമായ സ്ഥാനമുള്ള, ഐതിഹ്യങ്ങളും ചരിത്രവും ഇഴചേർന്ന ഒരു പുണ്യസങ്കേതമാണ് എറണാകുളം ജില്ലയിലെ പിറവം വലിയ പള്ളി .
പ്രൊഫ്, ജോൺ കുരാക്കാർ
No comments:
Post a Comment