മലങ്കര സഭയിൽ സമാധാനം ആഗ്രഹിക്കുന്നവരും.സമാധാനത്തെ കുറിച്ച് വാതോരാതെ സംസാരിക്കുന്നവരും

                             

മലങ്കര സഭയിൽ സമാധാനം ആഗ്രഹിക്കുന്നവരും.സമാധാനത്തെ കുറിച്ച്  വാതോരാതെ  സംസാരിക്കുന്നവരും

മലങ്കര സഭയിൽ സമാധാനം ആഗ്രഹിക്കുന്നവരും  സമാധാനത്തെ കുറിച്ച്  വാതോരാതെ  സംസാരിക്കുന്നവരുമുണ്ട് . പാത്രിയർക്കീസ് വിഭാഗവുമായി  ഇനി ഒരു സന്ധി സംഭാഷണത്തിലൂടെ  സമാധാനം ഉണ്ടാകാനുള്ള അവസരം വിരളമാണ്. പാത്രിയർക്കീസിനോട്  വിധേയപ്പെടുന്ന   ഒരു മലങ്കര സഭയാണ്  യാക്കോബായാക്കാർക്ക്  വേണ്ടത് .അതായത്  വിദേശ സഭയായ അന്ത്യോക്ക്യായുടെ  ആധിപത്യം  ഇപ്പോഴും വിഘടിത വിഭാഗമായ  യാക്കോബായക്കാർ ആഗ്രഹിക്കുന്നു. കേരളത്തിലെ യാക്കോബായക്കാർക്ക്  ഇന്ത്യൻ ഓർത്തഡോൿസ്  സഭയുമായി ഒന്നിച്ചു പോകുവാൻ താല്പര്യമില്ലഎന്നതാണ്  സത്യം . അവർക്ക് അന്ത്യോക്യൻ  ഓർത്തഡോൿസ് സുറിയാനി സഭയിൽ  ചേർന്നു നടക്കാനാണ്  ഇഷ്ടം.

കോടതി വിധിയുടെ വെളിച്ചത്തിൽ യാക്കോബായ സുറിയാനിക്കാരെ രണ്ടു കൈയും നീട്ടി മലങ്കര  ഓർത്തഡോൿസ് സഭ   2002-ൽ. സ്വീകരിച്ചതാണ് . അപ്പോൾ അവർക്കതിൽ താല്പര്യമില്ല. ഇപ്പോഴും താത്പര്യമില്ല എന്നല്ലെ അവരുടെ പ്രധാന നേതാവായ ഒരു മെത്രാപ്പോലീത്താ ഈ അടുത്ത സമയത്ത്  പോലും ഒരു അഭിമുഖത്തിൽ പറഞ്ഞത് . പിന്നെയെന്താണ്  അവർ  സമാധാനം കൊണ്ട് ഉദ്ദേശിക്കുന്നത്? പള്ളിപിടിക്കുന്ന കാര്യമാണോ? ഇവിടെ ആരും പള്ളി പിടിക്കുന്നില്ല. കോടതി തന്ന വിധി നടപ്പാക്കുകയല്ലേ ?

പണ്ട്  മലങ്കര സഭയും യാക്കോബായക്കാരും ഒരുമിച്ചല്ലേ   കേസിനു കോടതിയിൽ പോയത്? അല്ലാതെ മലങ്കര സഭ ഒറ്റക്കായിരുന്നോ ? എന്നിട്ടു വിധി വന്നപ്പോഴോ?  എന്താ കഥ. അയ്യോ  ഞങ്ങൾക്ക് വിധി അംഗീകരിക്കാൻ മടിയാണേ. ഞങ്ങളുടെ പള്ളികളെല്ലാം പിടിച്ചോണ്ട് പോകുന്നെ. എന്തെലാം നാടകങ്ങൾ. പരിശുദ്ധ ബാവ തിരുമേനിയും എപ്പിസ്കോപ്പൽ സുന്നഹദോസും പല തവണ സമാധാനത്തിനായി വിഘടിത വിഭാഗമായ യാക്കോബായക്കാരെ  ക്ഷണിക്കുകയായിരുന്നു.  അപ്പൊൾ  അവർക്കു മലങ്കര സഭയുടെ ഭരണഘടന അനുസരിച്ചുള്ള സമാധാനം വേണ്ട.നാഴികക്ക് നാൽപതു വട്ടം പരിശുദ്ധ ബാവ തിരുമേനിയെയും മലങ്കര ഓർത്തഡോൿസ്  സഭയെയും അറപ്പുളവാക്കുന്ന രീതിയിൽ സാമൂഹിക മാധ്യമങ്ങളിലും മറ്റും അധിക്ഷേപിക്കുന്നത് പൊതുസമൂഹം കണ്ടുകൊണ്ടിരിക്കുകയാണ് . പള്ളികളിൽ വിധി നടപ്പാക്കുന്നതു കണ്ട് കരഞ്ഞിട്ട് കാര്യമില്ല . വിധി പരിപൂർണ്ണമായി  നടപ്പാവുകതന്നെ  ചെയ്യും .

പരിശുദ്ധ മാർത്തോമാ പൗലോസ് രണ്ടാമൻ ബാവ തിരുമേനിയെ പോലെ പോലെ ഇത്രയധികം വ്യക്തിഹത്യക്കു പാത്രമായ ഒരു പിതാവ് മലങ്കരയിൽ ഉണ്ടായിട്ടുണ്ടോ? യാക്കോബായ  വിഭാഗം കാണിക്കുന്ന ഈ വൃത്തികേടുകൾ എത്രമാത്രമാണ്.സുറിയാനി ഓർത്തഡോൿസ് സഭയുടെ ഭാഗമായിരിന്നിട്ടു കൂടി അവർ  ഓർത്തഡോൿസ് സഭയ ല്ലെന്നാണ് യാക്കോബായക്കാർ  പറയുന്നത്.  അവരുടെ വിശ്വാസം വേറെയാണുപോലും . ഇനി യാക്കോബക്കാർക്കു രണ്ടു സമാധാന ഓപ്ഷനികളാണ് ഉള്ളത്  ഒന്നുകിൽ ഭരണഘടന  അനുസരിച്ചു മലങ്കര സഭയുടെ ഭാഗമായി നിൽക്കുക. അല്ലെങ്കിൽ വേറെ പള്ളി വെച്ച് പോവുക. അമ്മയെ മറന്നാലും  അന്ത്യോക്ക്യയെ  മറക്കില്ല  എന്ന്  മുദ്രാവാക്യം  മുഴക്കുന്ന  പാവം  യാക്കോബായാക്കാർ  ഒന്നും അറിയുന്നില്ല . അവർ ശരിക്കും  അന്ത്യോക്യൻ സഭയുടെ ഭാഗമല്ല . പാത്രിയർക്കീസിനെ  തെരഞ്ഞടുക്കുന്നതിൽ  അവരുടെ മെത്രാന്മാർക്ക്  ഒരു പങ്കുമില്ല . അവർ വഞ്ചിതരാകുകയാണ് . സത്യത്തിൽ അവർ ഇന്ത്യൻ ഓർത്തഡോൿസ്  സഭയുടെ ഭാഗമല്ലേ ? വല്ലാത്ത കുരുക്കിലാണ് അവർ അകപ്പെട്ടിരിക്കുന്നത് . യാക്കോബായ  എന്നപേരുപോലും  അവരുടെ സഭക്ക്  ഉപയോഗിക്കാൻ  നിയമപരമായി  കഴിയുമെന്ന് തോന്നുന്നില്ല  സത്യം മനസിലാക്കി മാതൃസഭയിലേക്ക്   മടങ്ങി വരുന്നതാണ്  വിശ്വാസികൾക്ക്  നല്ലത് .

മലങ്കര സഭയുടെ സ്വത്തു ആരുടെയും ഔദാര്യമല്ല. നസ്രാണികളുടെ വിയർപ്പിന്റെയും കഷ്ടപ്പാടിന്റെയും ഫലം ആണ്.  അതിന്റെ കാവൽ ഭടനാണ് മലങ്കര മെത്രാപോലിത്ത.പിന്നെ ഒരു കാര്യം കൂടി. നാളിതുവരെയും മലങ്കര സഭക്ക് തിരുച്ചു കിട്ടിയ ദേവാലങ്ങൾ ഇപ്പോൾ  കാണുവാൻ ശ്രെമിക്കുക. പഴയ അവസ്ഥയും ഇപ്പോഴത്തെ അവസ്ഥയും കൂടി ഒരു താരതമ്യ പഠനം കൂടി നടത്തുന്നത് നന്നായിരിക്കും. അപ്പോൾ  കാര്യങ്ങളുടെ കിടപ്പ് മനസിലാകും.പാത്രിയര്കിസിന്റെ കീഴിൽ നില്ക്കാൻ മലങ്കര സഭ മക്കൾക്ക് തീരെ താല്പര്യമില്ല. എന്നാൽ ഒരു സഹോദര സഭയുടെ തലവന് കൊടുക്കേണ്ട എല്ലാ ബഹുമാനവും മലങ്കര മക്കൾ അദ്ദേഹത്തിന് കൊടുക്കുന്നുണ്ട്.

മലങ്കര സഭയുടെ പൂർണ സ്വയം-ശീർഷക്തവും മാർത്തോമാ ശ്ലീഹായുടെ പൗരോഹിത്യവും സിംഹാസനവും അംഗീകരിക്കാത്ത ഒരു പാത്രിയര്കിസിനെയും മലങ്കര സഭ ഒരു കാലത്തും അംഗീകരിക്കില്ല എന്ന സത്യം  യാക്കോബായാക്കാർ   തിരിച്ചറിയണം.1653-ൽ കൂനൻ കുരിശ് സത്യത്തിൽ വിദേശാധിപത്യത്തിൽ ഞങ്ങളോ ഞങ്ങളുടെ സന്ധതി തലമുറകളോ നിലനിൽക്കില്ല എന്ന് പ്രതിജ്ഞ ചെയ്ത ആത്മാഭിമാനമുള്ള മലങ്കര നസ്രാണി പിതാക്കൻമാരുടെ മക്കൾക്ക് സമാധാനം മലങ്കര സഭയുടെ പൂർണ്ണമായ സ്വയം ഭരണവും സ്വയം ശീർഷകത്വവുമാണ്. പ.മാർത്തോമാ ശ്ലീഹായുടെ സിംഹാസനത്തിന് കീഴിൽ മലങ്കര ഓർത്തഡോക്സ് സഭ എന്നും സ്വതന്ത്രമായി ദൈവീക ചൈതന്യത്തോടെ നിലനിൽക്കും

പ്രൊഫ്. ജോൺ കുരാക്കാർ

 

 

 

 

 

 

 

കോവിഡ് വ്യാപനം തടയാൻ പോലീസ് നിയന്ത്രണങ്ങൾ കർശനമാക്കാം,പക്ഷെ പോലീസ് രാജ് വേണ്ടാ .

കോവിഡ് വ്യാപനം തടയാൻ പോലീസ് നിയന്ത്രണങ്ങൾ കർശനമാക്കാം,പക്ഷെ പോലീസ് രാജ് വേണ്ടാ .

സംസ്ഥാനത്ത് കോവിഡ് വ്യാപനം തടയാൻ നിയന്ത്രണങ്ങൾ കർശനമാക്കാൻ സർക്കാർ തീരുമാനിച്ചു. ഇതിന്‍റെ ഭാഗമായി പൊലീസിന് കൂടുതൽ അധികാരങ്ങൾ നൽകുമെന്നറിയുന്നു .ലോക്ക്ഡൗണിന്റെ ഒന്നാംഘട്ടത്തിൽ മികച്ച രീതിയിലാണ് പ്രതിരോധ പ്രവർത്തനങ്ങൾ നടപ്പിലാക്കാൻ പൊലീസ് ഇടപെട്ടത്. അതിനാൽ തന്നെ രോഗ വ്യാപനം തടയാൻ കഴിഞ്ഞു. ഇപ്പോൾ രോഗവ്യാപനം കൂടുതലാണ്. അതിനാൽ ഇനിയും ഇതേ രീതിയിൽ നിയന്ത്രണങ്ങൾ നടപ്പാക്കേണ്ടതുണ്ട്.  ലോക്ക്ഡൗൺ, ട്രിപ്പിൾ ലോക്ക്ഡൗൺ ഉൾപ്പെടെയുള്ള നിയന്ത്രണങ്ങളിൽ പൊലീസിന്  വലിയ പങ്കുണ്ട് . അനാവശ്യ യാത്രകൾ, മാസ്ക്, സമൂഹിക അകലം തുടങ്ങി നിയന്ത്രണങ്ങൾ പാലിക്കുന്നുണ്ടോ എന്ന് ഉറപ്പ് വരുത്തേണ്ടതും പൊലീസാണ്. പക്ഷെ  പോലീസ് രാജ് നടത്താൻ പാടില്ല  പോലീസ് മേധാവികൾ ഒരിക്കലും  ഭരണപക്ഷത്തിൻറെ കൈയ്യിലെ ചട്ടുകം ആയി മാറാൻ പാടില്ല .

കോവിഡ് മഹാമാരിയെ തുടച്ചുനീക്കാൻ  അദ്ഭുതവിദ്യകളൊന്നുമില്ലെന്ന്  ലോകാരോഗ്യസംഘടന പ്രഖ്യാപിച്ചിരിക്കുകയാണ്. വാക്സിനുകൾ മൂന്നാംഘട്ട പരീക്ഷണത്തിലാണെന്നിരുന്നാലും അതൊക്കെ ഫലപ്രദമാകുമെന്ന് ലോകാരോഗ്യസംഘടനയ്ക്കുപോലും തത്‌കാലം ശുഭാപ്തിവിശ്വാസമില്ലെന്നാണ് വ്യക്തമാക്കിയിട്ടുള്ളത്. രോഗബാധിതരുടെ എണ്ണം ഒന്നേമുക്കാൽ കോടി കടക്കുകയും മരിച്ചവരുടെ എണ്ണം ഏഴു ലക്ഷത്തിലേക്കെത്തുകയും ചെയ്യുന്ന സാഹചര്യത്തിലാണ് വിശദീകരണം. എന്നാൽ, രോഗം ബാധിച്ചവരിൽ നൂറ്റിപ്പത്തു ലക്ഷത്തോളം പേർ ചികിത്സയിലൂടെ രോഗമുക്തരായി എന്ന നേട്ടത്തെ കുറച്ചുകാണാനാവില്ല. രോഗം വരാം, പക്ഷേ, അത് മാറ്റാനാകും, വരാതിരിക്കാനുള്ള അദ്ഭുതവിദ്യകളാണില്ലാത്തത്.

സംസ്ഥാനത്ത് മഹാമാരിയെ നേരിടുന്നതിൽ ആദ്യത്തെ മൂന്നു മാസത്തോളം നടത്തിയ പ്രവർത്തനം ലോകോത്തരമെന്ന്‌ പൊതുവേ  വാഴ്ത്തപ്പെട്ടതാണ്. പക്ഷേ, എത്രപെട്ടെന്നാണ് എല്ലാം കൈവിട്ടുപോയത്. ജാഗ്രത പോയ്‌പോയതാണ്, അലംഭാവമാണ് ഈ ദുരവസ്ഥയ്ക്ക് കാരണമെന്ന് മുഖ്യമന്ത്രി തുറന്നുപറഞ്ഞിരിക്കുകയാണ്. ദിവസേന ആയിരത്തിലേറെ പേർക്ക് രോഗബാധ, അതിൽ എൺപത് ശതമാനത്തോളവും സമ്പർക്കത്തിലൂടെ എന്ന അവസ്ഥയിലാണിപ്പോൾ കേരളം. രാജ്യത്ത് സമൂഹവ്യാപനം ആദ്യം സ്ഥിരീകരിച്ചത് തിരുവനന്തപുരത്താണ്. അവിടെ വലിയതോതിൽ ജാഗ്രതക്കുറവുണ്ടായെന്നത് നേരാണുതാനും. ദൈനംദിനജീവിതം തള്ളിനീക്കുന്നതിനുള്ള വ്യഗ്രതയും വേവലാതിയുമാണ് അവിടെ അലംഭാവത്തിനടിസ്ഥാനമെന്നിരിക്കിലും തെറ്റ് തെറ്റുതന്നെയാണ്.

സംസ്ഥാനത്തിന്റെ തലസ്ഥാനത്ത് രോഗപ്പകർച്ച ശ്രദ്ധയിൽപ്പെട്ട ഉടനെ കുറേക്കൂടി ജാഗരൂകമായ പ്രവർത്തനം ദുരന്തനിവാരണ അതോറിറ്റിയുടെയും ആരോഗ്യവകുപ്പിന്റെയും ഭാഗത്തുനിന്നുണ്ടായിരുന്നെങ്കിൽ സമൂഹവ്യാപനത്തെ കുറച്ചൊക്കെ നിയന്ത്രിക്കാനായേക്കുമായിരുന്നു.

സമ്പർക്കത്തിലൂടെയാണ് രോഗബാധ കൂടുതൽ എന്ന യാഥാർഥ്യമാണ് അലംഭാവമുണ്ടായെന്ന തിരിച്ചറിവിന് നിദാനം. തൊഴിൽശാലകൾ ഭാഗികമായെങ്കിലും പ്രവർത്തിക്കാൻ തുടങ്ങുകയും പൊതുയാത്രാ സംവിധാനം പുനരാരംഭിക്കുകയുമെല്ലാം ചെയ്യുമ്പോൾ എത്രതന്നെ ജാഗ്രത പാലിച്ചാലും രോഗപ്പകർച്ച സാധ്യതയുണ്ടാവുമെന്ന് ഊഹിക്കാവുന്നതേയുള്ളൂ. ആരുടെയെങ്കിലും മനഃപൂർവമായ അലംഭാവമായി അതിനെ കാണാനാവില്ല. തലസ്ഥാനജില്ലയിലേതുപോലെ സ്ഥിതി കൈവിട്ടുപോകാതിരിക്കുന്നതിനുള്ള കരുതലായാണ് അടുത്തദിവസംമുതൽ നിയന്ത്രണങ്ങൾ കർക്കശമാക്കാൻ തീരുമാനിച്ചത്. ആദ്യഘട്ടത്തിൽ കോവിഡ് വ്യാപനമുണ്ടായ കാസർകോട് ജില്ലയിലും മറ്റും ഏർപ്പെടുത്തിയതുപോലുള്ള നിയന്ത്രണങ്ങളാണ് വരാൻപോകുന്നത്. പൂർണമായും പോലീസിന്റെ നിയന്ത്രണം ഏർപ്പെടുത്തുമെന്നാണ് മുഖ്യമന്ത്രി  അറിയിച്ചിട്ടുള്ളത്. ജനങ്ങൾക്ക് ഇത് പ്രയാസം സൃഷ്ടിക്കുമെന്നറിയാമെന്നും പക്ഷേ, ജീവനല്ലേ വലുത് എന്നും മുഖ്യമന്ത്രി പറയുകയുണ്ടായി.

കൺടെയ്‌ൻമെന്റ് സോണുകളിൽ പുറത്തുനിന്നുള്ള ആരെയും പ്രവേശിപ്പിക്കാതെയുള്ള കർശന അടച്ചുപൂട്ടൽ വേണ്ടിവരുമെന്നതിൽ സംശയമില്ല. ക്വാറന്റീൻ ലംഘനവും മറ്റും കർശനമായി തടയുകയും വേണം. എന്നാൽ പോലീസ്  പലപ്പോഴും  ബുദ്ധിപൂർവം  പെരുമാറേണ്ടിയിരിക്കുന്നു .ഗുണത്തിന് പകരം ദോഷമായി ഭവിക്കരുത് .പോലീസിന് അമിതാധികാരം നൽകുന്നത്  പലപ്പോഴും ദോഷം ചെയ്യും .അതിജീവനത്തിനൊപ്പം അന്നന്നത്തെ അപ്പത്തിനുള്ള വക കണ്ടെത്താൻ  പാവപ്പെട്ടവന് കഴിയാതെ വന്നാൽ  എല്ലാം തകരും.ലോക്ഡൗണിന് അയവുവരുത്തിയത് രോഗപ്പകർച്ചാ സാധ്യത ഇല്ലാതായതുകൊണ്ടല്ല. ജീവിതം വഴിമുട്ടുന്നനിലയിൽ എല്ലാ വാതിലുകളും അനിശ്ചിതമായി അടച്ചിടുന്നത് ആത്മഹത്യാപരമാണെന്നതിനാലാണ്.പോലീസിന് നൽകുന്ന അധികാരം  പരിധിക്കപ്പുറത്തേക്ക് കടക്കാതിരിക്കാൻ സർക്കാർ  ശ്രമിക്കണം .അല്ലെങ്കിൽ  എല്ലാം താളം തെറ്റും.

 

പ്രൊഫ്. ജോൺ കുരാക്കാർ

പത്തനംതിട്ട, കുടപ്പനകുളം സ്വദേശി പി.പി മത്തായിക്ക് (പൊന്നു ) നീതികിട്ടണം

പത്തനംതിട്ട, കുടപ്പനകുളം സ്വദേശി

പി.പി മത്തായിക്ക്  (പൊന്നു ) നീതികിട്ടണം

വനപാലകരുടെ കസ്റ്റഡിയിൽ ദുരൂഹ സാഹചര്യത്തിൽ  പത്തനംതിട്ട, കുടപ്പനകുളം സ്വദേശി പി.പി മത്തായി (പൊന്നു ) മരണമടഞ്ഞതിൽ  ഒരു നാടുമുഴുവൻ  ദുഃഖിക്കുകയും .കുറ്റക്കാരായ  വനപാലകരെ ഉടനടി അറസ്റ്റുചെയ്ത്  നിയമത്തിൻറെ  മുന്നിൽ കൊണ്ടുവരണമെന്നും ആവശ്യപെടുന്നു .പൊന്നു എന്ന മത്തായിയുടെ മരണം വല്ലാത്ത സങ്കടം ഉണ്ടാക്കുന്നു . ഒരു നാടിൻ്റെ പൊതു ധാരയിൽ നിന്ന് നല്ലതുമാത്രം ചെയ്തു ശീലിച്ച ഒരു ചെറുപ്പക്കാരൻ കാട്ടാളൻമാരായ ഒരു പറ്റം ഫോറസ്റ്റുകാരുടെ ക്രൂരമായ ഉപദ്രവം ഏറ്റ് കൊല്ലപ്പെട്ടിരിക്കുന്നു . അവിവാഹിതയും സുഖമില്ലാത്തതുമായ സഹോദരി.. വിധവയായ മറ്റൊരു സഹോദരി . വൃദ്ധയായ മാതാവ്.ഭാര്യയും രണ്ടു കുഞ്ഞുങ്ങളുമുൾപ്പെടെ വലിയ ബാധ്യതകൾ ഉള്ള ഒരു കുടു:ബത്തിൻ്റെ ആകെ ആശ്രയമായിരുന്നു പൊന്നു ..  നാല്പതു വയസ്സുള്ള നാട്ടിൽ മാന്യമായി കൃഷിയും, ബിസിനസ്സും നടത്തി കുടുംബം നോക്കുന്ന ഒരു യുവാവിനെ, സ്വന്തം ഭാര്യയുടെ മുന്നിൽ നിന്നും കുറച്ചു ഫോറസ്റ്റുകാർ വന്നു അവരുടെ വനത്തിൽ വെച്ച നിരീക്ഷണ കാമറ തകർത്തു എന്നു പറഞ്ഞു ഉച്ചകഴിഞ്ഞ് 3 മണിയോടെ പിടിച്ചിറക്കി കൊണ്ട് പോവുന്നു.ഏതാനും മണിക്കൂറുകൾക്കുള്ളിൽ വീട്ടുകാരെയോ, സമീപവാസികളെയോ അറിയിക്കാതെ ആ യുവാവിനെ തെളിവെടുപ്പിന് എന്ന പേരിൽ സ്വന്തം വീടിരിക്കുന്ന ഭൂമിയിൽ തിരിച്ചു കൊണ്ടുവരുന്നു. ഇതിനിടയിൽ ഭാര്യയെ ആരോ ഫോണിൽ വിളിച്ചു 75000 രൂപ കൊടുത്താൽ ഭർത്താവിനെ കേസെടുക്കാതെ വിടാം എന്നു വാഗ്‌ദാനം ചെയ്യുന്നു. എന്റെ ഭർത്താവിന് പങ്കില്ലാത്ത കേസിൽ ഒരു രൂപയും കൊടുക്കില്ല എന്നറിയിക്കുന്നു.അല്പസമയത്തിനുള്ളിൽ തെളിവെടുപ്പിനിടയിൽ ഓടി രക്ഷപെടുമ്പോൾ സ്വന്തം പറമ്പിലെ കിണറ്റിൽ വീണ് ആ യുവാവ് മരിച്ചു എന്നു 7 ഫോറസ്റ്റുകാർ അറിയിക്കുന്നു.കള്ളകേസെടുത്തു ഒരു കുടുംബത്തിന്റെ അത്താണിയെ തല്ലിക്കൊന്നു തിരിച്ചു കൊണ്ടുവന്നു അയാളുടെ വീട്ടിലെ തന്നെ കിണറ്റിൽ ഇട്ടിട്ടു, കിണറിൽ വീണു എന്നു പറഞ്ഞു കയ്യൊഴിയാൻ ഇതു പോലീസ് രാജോ, ഫോറസ്റ്റ് രാജോ ഉള്ള നാടാണോ? ഈ നാട്ടിൽ നിയമമില്ലേ? സാധാരണക്കാരന്റെ ജീവന് പുല്ലു വിലയോ?. ഈ വിഷയത്തിൽ  സർക്കാർ ഇടപെടണം . കുറ്റക്കാരെ മാതൃകാപരമായി  ശിക്ഷിക്കണം .മത്തായിയുടെ കുടുംബത്തിന്  അർഹമായ  സഹായം നൽകാൻ  തയാറക്കണം .മത്തായിക്ക്  നീതികിട്ടണം .

പ്രൊഫ്. ജോൺ കുരാക്കാർ