മദ്യത്തിനായി അനന്തമായ ക്യൂ:
പലയിടത്തും സംഘര്‍ഷം
ദേശീയപാതയോരത്തെ മദ്യശാലകള്‍ അടച്ചു പൂട്ടിയതിന് ശേഷമുള്ള രണ്ടാം ദിവസവും മദ്യവില്‍പന കേന്ദ്രങ്ങളില്‍ അനുഭവപ്പെട്ടത് വമ്പന്‍ ക്യൂ. മണിക്കൂറുകള്‍ നീണ്ട ക്യൂ സംഘര്‍ഷത്തിലേക്ക് നീണ്ടതോടെ പലയിടത്തും പോലീസെത്തിയാണ് ആളുകളെ നിയന്ത്രിക്കുന്നത്.സംസ്ഥാനത്തെ അവശേഷിക്കുന്ന മദ്യവില്‍പനശാലകളില്‍ എല്ലാം തന്നെ അതിരാവിലെ മുതല്‍ നീണ്ട ക്യൂവായിരുന്നു. രാവിലെ എഴ് മണി മുതല്‍ ആരംഭിച്ച ക്യൂ ഒന്‍പത് മണിയോട പലയിടത്തും കിലോമീറ്ററുകള്‍ നീണ്ടു.കടുത്ത വെയിലിനെ അവഗണിച്ചും മൂന്നും, നാലും മണിക്കൂര്‍ ക്യൂ നിന്നാണ് ആളുകള്‍ മദ്യം വാങ്ങിയത്. പ്രഭാതഭക്ഷണം പോലും ഒഴിവാക്കി ക്യൂവില്‍ നിന്ന പലര്‍ക്കും വെയില്‍ കൊണ്ട് നിര്‍ജലീകരണം സംഭവിക്കുകയും കുഴഞ്ഞു വീഴുകയും ചെയ്തു.
പരാമവധി മദ്യം വാങ്ങി ഇരട്ടിവിലയ്ക്ക് ആവശ്യക്കാര്‍ക്ക് മറിച്ചു വില്‍ക്കുന്നവരും രാവിലെ തന്നെ ക്യൂവിലെത്തിയിരുന്നു. ഇടയ്ക്ക് ക്യൂവില്‍ തള്ളിക്കേറാനും ക്യൂവില്‍ നില്‍ക്കുന്നവരെ മണിയടിച്ച് മദ്യം വാങ്ങാനും പലരും രംഗത്ത് വന്നതോടെ ഇടയ്ക്കിടെ സംഘര്‍ഷം രൂപപ്പെട്ടു. നിശ്ചിത തുക വാങ്ങി ആളുകള്‍ക്ക് ക്യൂ നിന്ന് മദ്യം വാങ്ങി കൊടുക്കുന്നവരും ഇപ്പോള്‍ സജീവമായി ഇറങ്ങിയിട്ടുണ്ട്. മദ്യവില്‍പനശാലകളിലെ തിരക്ക് കണക്കിലെടുത്ത് രാവിലെ ഏഴരമുതല്‍ തന്നെ എല്ലായിടത്തും പോലീസ് സാന്നിധ്യമുണ്ടായിരുന്നു. കോഴിക്കോട് നഗരത്തിലെ ഏകമദ്യവില്‍പനശാല സ്ഥിതി ചെയ്യുന്ന മാവൂര്‍ റോഡില്‍ എസ്.ഐയുടെ നേതൃത്വത്തില്‍ ഏഴംഗ പോലീസ് സംഘമാണ് ക്യൂ നിയന്ത്രിക്കുന്നത്. വൈകുന്നേരം തിരക്ക് കൂടുകയാണെങ്കില്‍ കൂടുതല്‍ പോലീസുദ്യോഗസ്ഥരെ ഇവിടെ വിന്യസിക്കാനും തീരുമാനിച്ചിട്ടുണ്ട്. മദ്യവില്‍പനശാലയ്ക്ക് മുന്നിലെ അത്ഭുതപൂര്‍വ്വമായ തിരക്ക് ഷൂട്ട് ചെയ്യാന്‍ എല്ലാ മാധ്യമങ്ങളും രാവിലെ തന്നെ ഇറങ്ങിയിരുന്നു. ടിവി ക്യാമറയോട് മുഖം മറച്ചു നിന്നെങ്കിലും നിലവിലെ അവസ്ഥയിലുള്ള പ്രതിഷേധം ആളുകള്‍ മാധ്യമപ്രവര്‍ത്തകരോട് മറച്ചു വച്ചില്ല.
സര്‍ക്കാരിന് കോടിക്കണക്കിന് രൂപ വരുമാനമായി നല്‍കുന്ന കുടിയന്‍മാരോട് ഇത്ര മോശമായി പെരുമാറുന്നത് ഒരു രീതിയിലും ന്യായീകരിക്കാനാവിലെന്ന് പലരും മാധ്യമപ്രവര്‍ത്തകരോട് പറഞ്ഞു. ഒരു കുപ്പി മദ്യം വാങ്ങാന്‍ മണിക്കൂറുകള്‍ വെയില്‍ കൊണ്ട് ക്യൂ നില്‍ക്കേണ്ടി വരുന്നതും മദ്യവില്‍പനശാലകള്‍ക്ക് മുന്നില്‍ അടിക്കടി രൂപപ്പെടുന്ന സംഘര്‍ഷാവസ്ഥയും ചിലരെയെങ്കിലും മദ്യം വാങ്ങാന്‍ വരുന്നതില്‍ പിന്നോക്കം വലിക്കുന്നുണ്ട്. അടിയന്തരമായി പ്രശ്‌നം തീര്‍ത്തിലെങ്കില്‍ സ്വന്തമായി മദ്യം വാറ്റിയെടുക്കേണ്ടി വരുമെന്ന ഭീഷണിയും ചിലര്‍ മാധ്യമപ്രവര്‍ത്തകരോട് നടത്തി
Prof. John Kurakar
No comments:
Post a Comment